മുഹമ്മ: പൊന്നാട് റൂട്ടിലെ യാത്രാക്ലേശം പരിഹരിക്കാന് നടപടി സ്വീകരിക്കണമെന്ന ആവശ്യമുയര്ന്നു. വിവിധ റൂട്ടുകളിലേയ്ക്ക് ഇതുവഴി ഉണ്ടായിരുന്ന കെഎസ്ആര്ടി സി ബസുകള് പലപ്പോഴായി അധികൃതര് നിര്ത്തലാക്കിയതാണ് യാത്രാക്ലേശം രൂക്ഷമാകാന് കാരണം.
സ്കൂള് തുറന്നതിന് ശേഷം വിദ്യാര്ത്ഥികള് അടക്കമുള്ളവര് ഇത് മൂലം ദുരിതത്തിലാണ്. ആലപ്പുഴ കെഎസ്ആര്ടി സി ഡിപ്പോയില് നിന്നും രാവിലെ 6.50ന് ആരംഭിക്കുന്ന സര്വ്വീസ് ഈയിടെ നിര്ത്തലാക്കിയിരുന്നു. ഈ ബസ് ഈ റൂട്ടിലൂടെ 9 തവണ സര്വ്വീസ് നടത്തിയിരുന്നു. യാതൊരു കാരണവുമില്ലാതെയാണ് അധികൃതര് ഈ സര്വ്വീസ് നിര്ത്തലാക്കിയത്.
രാവിലെ 9.40ന് ഇതുവഴി ആലപ്പുഴ ഭാഗത്തേയ്ക്ക് പോകുന്ന ബസ് വിദ്യാര്ത്ഥികള്ക്കും ഉദ്യോഗസ്ഥര്ക്കും പ്രയോജനം ചെയ്യുന്നില്ല. പത്തരയോടെയാണ് ഈ ബസ് ആലപ്പുഴയില് എത്തുന്നത്. രാവിലെ 9.15ന് മുഹമ്മയില് നിന്നും പൊന്നാട് വഴി ആലപ്പുഴയ്ക്ക് പോകുകയാണെങ്കില് യാത്രക്കാര്ക്ക് ഏറെ പ്രയോജനമാകും.
വൈകിട്ട് ആറിന് തണ്ണീര്മുക്കം ഭാഗത്തേയ്ക്ക് പോകുന്ന ബസാകട്ടെ മടങ്ങിപോകുന്നതും മറ്റു റൂട്ടുകളിലൂടെയാണ്. ചേര്ത്തലയില് നിന്നും മുഹമ്മ വഴി മണ്ണഞ്ചേരിയിലേയ്ക്ക് സര്വ്വീസ് നടത്തുന്ന കെഎസ്ആര്ടിസി ബസ് പൊന്നാട് വഴി ആക്കണമെന്ന ആവശ്യത്തിന് ദീര്ഘനാളത്തെ പഴക്കമുണ്ട്. പലപ്പോഴും ഈ ബസ് മുഹമ്മയില് നിന്നും മണ്ണഞ്ചേരിയിലേയ്ക്ക് പോകുമ്പോള് മൂന്നോ നാലോ യാത്രക്കാരെ ഉണ്ടാകൂ. ഇത് പൊന്നാട് വഴി തിരിച്ചുവിട്ടാല് പ്രദേശവാസികള്ക്ക് ഏറെ പ്രയോജനം ചെയ്യും.
