വാഷിങ്ടണ്: അമേരിക്കന് പ്രസിഡന്റ് ബരാക് ഒബാമയുമയും ഭാരത പ്രധാനമന്ത്രി നരേന്ദ്ര മോദിയും തമ്മില് നടന്ന ചര്ച്ചയില് നിര്ണ്ണായകമായ ഒട്ടേറെ തീരുമാനങ്ങള്. രണ്ടു മണിക്കൂര് നീണ്ട ചര്ച്ചയില് ആണവ വിതരണ കൂട്ടായ്മയില് (എന്എസ്ജി) ഭാരതത്തിന് അംഗത്വം ഉറപ്പാക്കാന് പിന്തുണയ്ക്കുന്നുവെന്ന് ഒബാമ പ്രഖ്യാപിച്ചു.
രണ്ടു മണിക്കൂര് നീണ്ട ചര്ച്ചയില് മോദിയോടൊപ്പം ദേശീയ സുരക്ഷാ ഉപദേശകന് അജിത് ഡോവലും വിദേശകാര്യ സെക്രട്ടറി എസ്. ജയശങ്കറുമാണ് ഉണ്ടായിരുന്നത്. ചര്ച്ചകള്ക്കു ശേഷം നടന്ന ഉച്ചവിരുന്നില് വൈസ് പ്രസിഡന്റ് ജോ ബിദെനും പങ്കെടുത്തു. തുടര്ന്ന് ഓവല് ഓഫീസില് മാധ്യമപ്രവര്ത്തകരെ കണ്ടു. വൈറ്റ് ഹൗസിന്റെ ക്യാബിനറ്റ് റൂമിലായിരുന്നു ഉച്ചവിരുന്നും തുടര് ചര്ച്ചയും.
മൂന്നു ദിവസത്തെ സന്ദര്ശനത്തിനെത്തിയ മോദി ഇന്ന് യുഎസ് കോണ്ഗ്രസിന്റെ സംയുക്ത സമ്മേളനത്തെ അഭിസംബോധന ചെയ്യും. ഈ സംഘത്തില് അംഗമാകുന്നതോടെ ഭാരതവും ആണവ നിര്വ്യാപന കാര്യത്തില് മികച്ച അംഗമാകുമെന്ന് യുഎസ് ദേശീയ സുരക്ഷാ സഹ ഉപദേശകന് ബെഞ്ചമിന് റോഡ്സ് പറഞ്ഞു. ആണവകാര്യത്തില് ഭാരതത്തെ ഒപ്പം കൂട്ടുന്നതാണ് നല്ലതെന്ന് ഉത്തമ ബോധ്യമുള്ളതിനാലാണ് അമേരിക്ക ഇക്കാര്യത്തില് പിന്തുണയ്ക്കാന് തീരുമാനിച്ചതെന്നും ചോദ്യത്തിനു മറുപടിയായി റോഡ്സ് പറഞ്ഞു. ചൈനയുടെ എതിര്പ്പു മറികടക്കുകയാണ് അവസാന കടമ്പ.
അതേസമയം, മിസൈല് സാങ്കേതിക വിദ്യാ നിയന്ത്രണ ഭരണക്രമത്തില് നിര്ണ്ണായകമായ പ്രവേശനം ഭാരതം ഉറപ്പാക്കി. ഇനി ഉയര്ന്ന തലത്തിലുള്ള മിസൈല് സാങ്കേതിക വിദ്യ മറ്റു പ്രധാന രാജ്യങ്ങളെപ്പോലെ ഭാരതത്തിനും ലഭ്യമാകും.
അമേരിക്കയില് തിങ്കളാഴ്ച എത്തിയ മോദിയ്ക്ക് ഭാരതീയ സമൂഹമുള്പ്പെടെ ഗംഭീര സ്വീകരണമാണ് നല്കിയത്. സൈനികരുടെ സ്മരണാര്ത്ഥം ഉള്ള കുടീരത്തില് മോദി അനുശോചനം അര്പ്പിച്ചു. ആചാരപൂര്വ്വം അവിടെ പുഷ്പചക്രം സമര്പ്പിച്ചു. ആര്ലിങ്ക്ടണ് ദേശീയ സെമിത്തേരിയില് തകര്ന്ന ബഹിരാകാശ പേടകമായ കൊളംബിയയുടെ സ്മാരകത്തില് ഭാരതീയ ബഹിരാകാശ യാത്രികയായിരുന്ന കല്പ്പന ചൗളയ്ക്ക് സ്മരണാഞ്ജലി അര്പ്പിച്ചു. ബഹിരാകാശ യാത്രികയായ സുനിതാ വില്യംസ് പ്രധാനമന്ത്രിയോടൊപ്പം ചേര്ന്നു. തന്നെയും ഈ അവസരത്തില് കൂട്ടിയത് അഭിമാന നിമിഷമാണെന്ന് സുനിതാ വില്യംസ് അഭിപ്രായപ്പെട്ടു.
