മനില: അക്രമികളെ വെടിവെച്ച് കൊല്ലാൻ ജനങ്ങളോട് ആഹ്വാനം ചെയ്ത് ഫിലിപ്പീൻസിന്റെ പുതിയ പ്രസിഡന്റ് റോഡ്രിഗോ ഡുറ്റേർറ്റേ. രാജ്യത്തെ കളങ്കിതമാക്കുന്ന മയക്ക് മരുന്ന് സംഘങ്ങളെ കൊന്നുകളയണമെന്ന് അദ്ദേഹം ഫിലിപ്പീൻസിന്റെ തെക്കൻ നഗരമായ ദാവോയിൽ നടന്ന പൊതു ചടങ്ങിൽ ജനലക്ഷങ്ങളോടായി പറഞ്ഞു.
‘സ്വാതന്ത്ര്യത്തോടെ ഭീതിയില്ലാതെ നിങ്ങൾക്ക് ഭരണാധികാരികളെയോ, പോലീസിനെയോ വിളിക്കാം അതിന് സാധിച്ചില്ലെങ്കിൽ പ്രിയ സഹോദരങ്ങളെ നിങ്ങൾ തോക്കുകൾ എടുത്ത് അക്രമി സംഘത്തെ നേരിട്ടു കൊള്ളുക’- റോഡ്രിഗോ ജനങ്ങളോടായി പറഞ്ഞു.
‘ഏതെങ്കിലും മയക്കുമരുന്ന് ഇടപാടുകാരൻ നിയമത്തിന് മുന്നിൽ ഹാജരാകാതെ സാധാരണക്കാരെ അക്രമിക്കുകയാണെങ്കിൽ ആരുടെയും അനുവാദം നിങ്ങൾ നോക്കേണ്ടതില്ല, അപ്പോൾ തന്നെ അക്രമിയെ വെടിവെച്ചു കൊല്ലുക, അത്തരത്തിൽ കൊല്ലുകയാണെങ്കിൽ ഞാൻ നിങ്ങൾക്ക് മെഡൽ നൽകും’- റോഡ്രിഗോ തന്റെ പ്രസംഗത്തിൽ പറഞ്ഞു
കഴിഞ്ഞ മെയ് 9ന് നടന്ന പ്രസിഡന്റ് തെരഞ്ഞെടുപ്പിൽ 71കാരനായ റോഡ്രിഗോ വൻ ഭൂരിപക്ഷത്തോടെയാണ് അധികാരത്തിലെത്തിയത്. ആറ് മാസങ്ങൾക്കുള്ളിൽ അഴിമതി, ക്രിമിനൽ കുറ്റങ്ങൾ എന്നിവയെല്ലാം ഫിലിപ്പീൻസ് മണ്ണിൽ നിന്നും തുടച്ചു നീക്കുമെന്ന് അദ്ദേഹം ജനങ്ങൾക്ക് വാക്ക് നൽകിയിരുന്നു.
പോലീസ് അധികാരികൾ ഉൾപ്പെടെയുള്ളവർ രാജ്യത്തെ അഴിമതിക്കഥകളിൽ ഉൾപ്പെട്ട സാഹചര്യത്തിലാണ് അദ്ദേഹം ജനങ്ങളോട് നിയമം കൈയ്യിലെടുത്തോളാൻ ആവശ്യപ്പെടുന്നത്.
