ചക്കരക്കല്ല്: നിയമസഭാ തെരഞ്ഞെടുപ്പ് ഫലം ബിജെപി ഇതര രാഷ്‌ട്രീയ കക്ഷികളില്‍ അങ്കലാപ്പ് സൃഷ്ടിച്ചിരിക്കുകയാണെന്നും ബിജെപിയുടെ വോട്ടിങ്ങ് വര്‍ധനവ് പാര്‍ട്ടി പ്രവര്‍ത്തകര്‍ക്ക് ആത്മവിശ്വാസത്തോടൊപ്പം ഉത്തരവാദിത്തം വര്‍ദ്ധിപ്പിച്ചിരിക്കുകയാണെന്നും പാര്‍ട്ടി മേഖലാ പ്രസിഡണ്ട് വി.വി.രാജന്‍ അഭിപ്രായപ്പെട്ടു. എന്‍ഡിഎ ധര്‍മ്മടം നിയോജക മണ്ഡലം തെരഞ്ഞെടുപ്പ് അവലോകനയോഗത്തില്‍ സംസാരിക്കുകയായിരുന്നു അദ്ദേഹം.
കേരളത്തിലെ പല പ്രമുഖ രാഷ്‌ട്രീയ കക്ഷികള്‍ക്കും പല മണ്ഡലങ്ങളിലും ദയനീയ പരാജയമുണ്ടായി. ഇടത്-വലത് മുന്നണികളുടെ അസത്യപ്രചരണവും സിപിഎം ക്രിമിനലുകളുടെ അക്രമങ്ങളെയും അതിജീവിച്ചാണ് എന്‍ഡിഎ ഈ തെരഞ്ഞെടുപ്പിനെ നേരിട്ടത്. കേരളത്തിലെ യഥാര്‍ത്ഥ പ്രതിപക്ഷ പാര്‍ട്ടിയായി ഇന്ന് ബിജെപി മാറിയിരിക്കുകയാണ്. ഇതിനനുസരിച്ച് പ്രവര്‍ത്തകരുടെ ദൗത്യവും ഉത്തരവാദിത്തവും വര്‍ദ്ധിച്ചിരിക്കുകയാണെന്നും അദ്ദേഹം പറഞ്ഞു. ജില്ലാ പ്രസിഡണ്ട് പി.സത്യപ്രകാശന്‍ മാസ്റ്റര്‍ സംസാരിച്ചു. മണ്ഡലം പ്രസിഡണ്ട് ആര്‍.കെ.ഗിരിധരന്‍, കെ.പി.ഹരീഷ് ബാബു, പി.ആര്‍.രാജന്‍, ജിനചന്ദ്രന്‍, എ.അനില്‍ കുമാര്‍ തുടങ്ങിയവര്‍ സംസാരിച്ചു.
