പൂച്ചാക്കല്: ചേര്ത്തലയുടെ വടക്കന് മേഖലയില് അഗ്നിശമന കേന്ദ്രം വേണമെന്ന ആവശ്യം ശക്തമാകുന്നു. അഗ്നി ബാധയുണ്ടായാല് കിലോമീറ്ററോളം ഓടിവേണം ഫയര് വാഹനങ്ങള് എത്താന്. സമീപ പ്രദേശങ്ങളായ, പാണാവളളി, പൂച്ചാക്കല്, തൈക്കാട്ടുശേരി, പളളിപ്പുറം എന്നീ പ്രദേശങ്ങളിലായി നിരവധി വ്യവസായ സ്ഥാപനങ്ങള് പ്രവര്ത്തിക്കുന്നുണ്ട്.
പ്രധാനമായും അരുക്കുറ്റിയില് നിരവധി മത്സ്യ സംസ്കൃത ശാലകളും, കയറ്റുയിറക്കുമതി ശാലകളും പ്രവര്ത്തിക്കുന്നുണ്ട്.പളളിപ്പുറത്ത് വ്യവസായ വളര്ച്ചാകേന്ദ്രം വന്നതിനാല് പാചകവാതക സംഭരണ കേന്ദ്രം, കയര് സംഭരണ കേന്ദ്രം, ഇന്ഫോ പാര്ക്ക് തുടങ്ങിയ നിരവധി സ്ഥാപനങ്ങള് പ്രവര്ത്തിക്കുന്നുണ്ടെങ്കിലും ഇവിടങ്ങളില് അഗ്നിബാധയുണ്ടായാല് ചേര്ത്തല, എറണാകുളം എന്നിവിടങ്ങളിലെ അഗ്നിശമന സേനയുടെ സഹായം തേടണം.
ഇവിടങ്ങളില് നിന്നും അഗ്നിശമന സേനയുടെ വാഹനം ചുറ്റിക്കറങ്ങി സംഭവസ്ഥലത്ത് എത്തുമ്പോഴെക്കും നാട്ടുകാര് തീയണച്ചിട്ടുണ്ടാവും. വീടുകളില് പലപ്പോഴും ഷോട്ട് സര്ക്യൂട്ടുകള് മൂലം അഗ്നിബാധ ഉണ്ടാകുന്ന പെരുമ്പളം ദ്വീപ് നിവാസികളാണ് ഇതുമൂലം കൂടുതല് ദുരിതത്തിലാവുന്നത്. ഫയര്സ്റ്റേഷന് വേണമെന്ന ആവശ്യവുമായി നാട്ടുകാര് പലതവണ മുഖ്യമന്ത്രിയടക്കമുളളവരെ സമിപിച്ചിട്ടും സ്ഥലമില്ലയെന്ന വാദം പറഞ്ഞ് ഒഴിഞ്ഞു മാറുകയാണ്.
അരുക്കുറ്റിയിലും സമീപ പ്രദേശങ്ങളിലുമായി നിരവധി പുറംപോക്ക് ഭുമീ കാടുപിടിച്ചു കിടക്കുന്നത് അധികൃതരെ അറിയിച്ചിട്ടും കണ്ടില്ലായെന്ന ഭാവം നടിക്കുകയാണ് ചെയ്യുന്നതെന്നാണു നാട്ടുകാര് പറയുന്നത്.
