പറവൂര്/അലുവ: ആകാശത്തും ഭൂമിയിലും പാതാളത്തിലും അഴിമതി നടത്തിയ സര്ക്കാരായിരുന്നു യുപിഎയുടേതെന്ന് ബിജെപി അഖിലേന്ത്യാ അദ്ധ്യക്ഷന് അമിത്ഷാ. 12 വര്ഷം കൊണ്ട് കോടികളുടെ അഴിമതിയാണ് നടത്തിയത്. പറവൂരിലും ആലുവയിലും എന്ഡിഎ സ്ഥാനാര്ത്ഥികളുടെ തെരഞ്ഞെടുപ്പ് യോഗങ്ങളില് പ്രസംഗിക്കുകയായിരുന്നു അദ്ദേഹം. എ.കെ. ആന്റണി പറയുന്നത് പോലെ ബിജെപിക്ക് കേരളത്തില് ഹിഡന് അജണ്ടയൊന്നുമില്ല. എല്ലാം സുതാര്യമാണ്. എല്ഡിഎഫിനെയും യുഡിഎഫിനെയും അറബിക്കടലിലേക്ക് വലിച്ചെറിയുകയെന്ന പരസ്യ അജണ്ടയാണ് ബിജെപിക്കുള്ളത്. ബിജെപി കേരളം ഭരിച്ചാല് മതേതരത്വം തകരുമെന്നാണ് എല്ഡിഎഫ് പ്രചരിപ്പിക്കുന്നത്. ഇന്ത്യയും 14 സംസ്ഥാനങ്ങളും ഭരിക്കുന്ന ബിജെപിയെയാണ് ഒരിടത്തുമില്ലാത്ത ഇടതുപക്ഷം കുറ്റപ്പെടുത്തുന്നത്.
ബിജെപി അധികാരത്തിലേറിയാല് സംഘര്ഷമുണ്ടാക്കാണ് ഇരുമുന്നണികളുടെയും ശ്രമം. ഇരുമുന്നണികളുടെയും പ്രീണന രാഷ്ട്രീയത്തിനും അഴിമതിക്കും അക്രമത്തിനുമെതിരായ വിധിയെഴുത്തായിരിക്കും ഇക്കുറി ഉണ്ടാകുക. യുഡിഎഫ് സര്ക്കാര് അഴിമതിയുടെ അവതാരങ്ങളായി മാറി. ഇരു മുന്നണികളും മാറി മാറി ഭരിച്ച കേരളത്തില് വികസം വഴി മുട്ടി നില്ക്കുകയാണ്. ഇതിനെ നേര്വഴിക്ക് നയിക്കാന് ബിജെപിക്ക് മാത്രമേ സാധിക്കൂ. നരേന്ദ്രമോദി സര്ക്കാര് അധികാരത്തിലേറി രണ്ട് വര്ഷമായിട്ടും ഒരാള്ക്കെതിരെ പോലും അഴിമതി ആരോപണമുണ്ടായിട്ടില്ല. കേരളത്തില് എന്ഡിഎ അധികാരത്തിലേറിയാല് നരേന്ദ്രമോദിയുടെ ചിറകിലൂടെ 50 വര്ഷം മുന്കൂട്ടികണ്ടുള്ള വികസനം നടപ്പാക്കാനാക്കാം.
വി.എസിനെ മുന്നിര്ത്തി പ്രചരണം നടത്തുന്ന സിപിഎം അധികാരം ലഭിച്ചാല് വി.എസിനെ മുഖ്യമന്ത്രിയാക്കുമെന്ന് പറയാന് തയ്യാറാകുമോയെന്നും അമിത്ഷാ ചോദിച്ചു. യോഗത്തില് ബിജെപി നിയോജക മണ്ഡലം പ്രസിഡന്റ് എം.എന്. ഗോപി അദ്ധ്യക്ഷനായിരുന്നു. ബിജെപി മുന് പ്രസിഡന്റ് വി. മുരളീധരന്, സുരേഷ് ഗോപി എം.പി, എ.കെ. നസീര്, എന്.പി. ശങ്കരന്കുട്ടി, എം.എ ബ്രഹ്മരാജ്, ഉദയകുമാര്, പി.ഡി. സതീശന് എന്നിവര് സംസാരിച്ചു. സ്ഥാനാര്ത്ഥികളായ ലതാ ഗംഗാധരന് (ആലുവ), വി. ഗോപകുമാര് (കളമശേരി), പി.ജെ. ബാബു (അങ്കമാലി), ബിഡിജെഎസ് നിയോജക മണ്ഡലം പ്രസിഡന്റ് എ.എന്. രാമചന്ദ്രന്, കെ.ജി. ഹരിദാസ്, എ. സെന്തില്കുമാര് എന്നിവര് വേദിയില് സന്നിഹിതരായിരുന്നു. പറവൂരില് നടന്ന പൊതുയോഗത്തില് സുരേഷ് ഗോപി എംപി, സംസ്ഥാന തെരഞ്ഞെടുപ്പ് സമിതി കണ്വീനര് വി.മുരളീധരന്, കേസരി ചീഫ് എഡിറ്റര് ഡോ.എന്.ആര്.മധു, കുരുവിള മാത്യു, എന്.പി.ശങ്കരന്കുട്ടി, എം.ബി. ജയപ്രകാശ്, മേജര് രവി, കെ.പി.രാജന്, ടി.ജെ.വിജയന്, അഡ്വ.കെ.എസ്. ഷൈജു, പി.എസ്. ജയരാജ്, സി.എന്.രാധാകൃഷ്ണന്, കെ.ആര്.രമേഷ് കുമാര്, എസ്.ദിവാകരന് പിള്ള, ആര്.വി. ബാബു,പി.എസ്. അജി, കെ.ടി. ബിനീഷ്. ഷിജുകൈലാസ്, വി.ഡി.രാധാകൃഷ്ണന്, സോമന് ആലപ്പാട്ട്, പി.സി. അശോകന്, പ്രൊഫ.എം.മോഹനന്, എം.സി.വേണു, ടി.ജെ. വിജയന്, ടി.എ.ദിലീപ്, എം.പി.ബിനു എന്നിവര് പങ്കെടുത്തു.
