തൃപ്പൂണിത്തുറ: സ്വാഭാവിക മാറ്റങ്ങളല്ലാതെ മരട് മേഖലയില്‍ ഒരു പുരോഗതിയും കൊണ്ടുവരാന്‍ കാല്‍ നൂറ്റാണ്ടായി നിയമസഭയില്‍ പ്രതിനിധാനം ചെയ്യുന്ന യുഡിഎഫിന് കഴിഞ്ഞിട്ടില്ലെന്ന് എന്‍ഡിഎ കണ്‍വന്‍ഷന്‍. മരട് മുനിസിപ്പാലിറ്റിയിലെ വളന്തകാടിലെ ജനങ്ങള്‍ക്ക് നഗര ജീവിതവുമായി ബന്ധപ്പെടാനാകാതെ ഒറ്റപ്പെട്ട നിലയിലാണ്. 49 പട്ടികജാതി കുടുംബങ്ങളാണ് ഇവിടുള്ളത്.
വികസനത്തിന്റെ പേരില്‍ കളങ്കിതരുടെ കൗശല പ്രകടനങ്ങളാണ് നടക്കുന്നത്. യാഥാര്‍ഥ്യം തിരിച്ചറിഞ്ഞ് ജനങ്ങള്‍ ഈ കാപട്യത്തെ പരാജയപ്പെടുത്തുമെന്ന് മരടില്‍ നടന്ന എന്‍ഡിഎ കണ്‍വെന്‍ഷന്‍ അഭിപ്രായപ്പെട്ടു.
ബിജെപി ജില്ലാ ജനറല്‍ സെക്രട്ടറി എം.എന്‍ മധു കണ്‍വന്‍ഷന്‍ ഉദ്ഘാടനം ചെയ്തു. ആര്‍എസ്എസ് മുന്‍ ജില്ലാ കാര്യവാഹക് എം.എ. കൃഷ്ണകുമാര്‍ അധ്യക്ഷത വഹിച്ചു.
ബിജെപി ജില്ലാ സെക്രട്ടറി എം.എ. ബ്രഹ്മരാജ് വിശദീകരണ പ്രഭാഷണം നടത്തി. ബിഡിജെഎസ് തൃപ്പൂണിത്തുറ നിയോജകമണ്ഡലം അധ്യക്ഷന്‍ വിപിന്‍ മുഖ്യപ്രഭാഷണം നടത്തി. സ്ഥാനാര്‍ഥി പ്രൊഫ. തുറവൂര്‍ വിശ്വംഭരന്‍, സഹജ ഹരിദാസ്, യു.മധുസൂദനന്‍, സേവ്യര്‍ ജോര്‍ജ്, അഡ്വ.പി.എല്‍. ബാബു, എം. നന്ദനന്‍, എം.കെ. മധു എന്നിവര്‍ സംസാരിച്ചു. തൃപ്പൂണിത്തുറ ബാലാശ്രമം സന്ദര്‍ശിച്ച സ്ഥാനാര്‍ഥി തുറവൂര്‍ വിശ്വംഭരനെ പ്രസിഡന്റ് കെ.കെ.നായര്‍, സെക്രട്ടറി പി.ചന്ദ്രന്‍ എന്നിവര്‍ ചേര്‍ന്ന് സ്വീകരിച്ചു.
