അക്രമികളേയും അഴിമതിക്കാരേയും അറബിക്കടലില്‍ തള്ളണം: നളിന്‍ കുമാര്‍ കട്ടീല്‍

കൊച്ചി: അഴിമതി കോണ്‍ഗ്രസ് വേണോ അക്രമ സിപിഎം വേണോ വികസന ബിജെപി വേണോയെന്ന് കേരളീയര്‍ തെരഞ്ഞെടുപ്പില്‍ തീരുമാനിക്കുമെന്ന് ബിജെപി എംപി നളിന്‍ കുമാര്‍ കട്ടീല്‍. എന്‍ഡിഎ തൃപ്പൂണിത്തുറ മണ്ഡലം കണ്‍വെന്‍ഷന്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. അഴിമതിയില്‍ മുങ്ങികുളിച്ച കോണ്‍ഗ്രസ് സരിതയുടെ പിന്നാലെയായിരുന്നു അതുകൊണ്ട് കേരളത്തില്‍ വികസനത്തിന് അവര്‍ക്ക് സമയം ഇല്ലായിരുന്നു. ലോകത്ത് നിന്ന് അപ്രത്യക്ഷമാകുന്ന കമ്മ്യൂണിസ്റ്റ് പാര്‍ട്ടിക്ക് കേരളത്തില്‍ അക്രമത്തിനാണ് താല്‍പര്യം. അക്രമികളെയും അഴിമതിക്കാരെയും അറബിക്കടലില്‍ തള്ളാന്‍ ഈ തെരഞ്ഞെടുപ്പ് ഉപയോഗിക്കണം. കേരളത്തില്‍ പോരടിക്കുന്ന ഇവര്‍ ദല്‍ഹിയില്‍ ഒന്നിച്ച് ജനങ്ങളെ വഞ്ചിക്കുകയാണ്. കേരളത്തിനോട് അടുത്ത് കിടക്കുന്ന മംഗലാപുരം വികസനത്തില്‍ വളരെയേറെ മുന്നിലാണ്. 18 എഞ്ചിനിയറിംഗ് കോളേജ്, 8 മെഡിക്കല്‍ കോളേജ്, എയര്‍പോര്‍ട്ട്, 5 യൂണിവേഴ്‌സിറ്റി എന്നിവയുമായി മംഗലാപുരം മുന്നേറുമ്പോള്‍ തൊട്ട യല്‍പക്കത്തെ ജില്ലയായ കാസര്‍കോഡ് എത്ര വികസിച്ചെന്ന് വോട്ടര്‍മാര്‍ ചിന്തിക്കണം. ഏതു പ്രശ്‌നത്തിനും പെട്ടെന്ന് പരിഹാരം കാണുന്ന ഒരു പ്രധാനമന്ത്രിയാണ് ഭാരതത്തില്‍ ഉള്ളത്. അതുകൊണ്ടാണ് കൊല്ലത്ത് വെടിക്കെട്ട് ദുരന്തം ഉണ്ടായതറിഞ്ഞ് 4 മണിക്കൂറിനുള്ളില്‍ പ്രധാനമന്ത്രി സംഭവസ്ഥലത്തെത്തി ജനങ്ങളില്‍ ആത്മവിശ്വാസം ഉണര്‍ത്തുവാനും സഹായങ്ങള്‍ നല്‍കാനും കഴിഞ്ഞത്. മുഖ്യമന്ത്രി എന്നാല്‍ രണ്ട് മണിക്കൂറാണ് എടുത്തത്. ലോകം തന്നെ ആരാധിക്കുന്ന പ്രധാനമന്ത്രിയായി മോദി മാറി 48,000 കോടി രൂപയാണ് റോഡ് വികസനത്തിനായി മോദിസര്‍ക്കാര്‍ 23 മാസംകൊണ്ട് ചെലവഴിച്ചത്. കര്‍ഷകര്‍, യുവതി യുവാക്കള്‍ എന്നുവേണ്ട എല്ലാവിഭാഗം ജനങ്ങള്‍ക്കും പ്രയോജനപ്പെടുന്ന നിരവധിപദ്ധതികളാണ് ചുരുങ്ങിയ കാലംകൊണ്ട് മോദിസര്‍ക്കാര്‍ ചെയ്തത്. കമ്മ്യൂണിസ്റ്റുകാര്‍ കേരളത്തില്‍ ചുംബനസമരം നടത്തിയപ്പോള്‍ ഉമ്മന്‍ചാണ്ടി സരിതയുടെ പുറകെ പോവുകയായിരുന്നു വെന്ന് അദ്ദേഹം പറഞ്ഞു. യോഗത്തില്‍ ബിജെപി മണ്ഡലം പ്രസിഡന്റ് മധുസൂദനന്‍ അദ്ധ്യക്ഷത വഹിച്ചു. ബിജെപി സംസ്ഥാന ജനറല്‍ സെക്രട്ടറി എം.ടി.രമേശ് മുഖ്യപ്രഭാഷണം നടത്തി. ജില്ലാ പ്രസിഡന്റ് എന്‍.കെ.മോഹന്‍ദാസ്, ബിഡിജെഎസ് ജില്ലാ പ്രസിഡന്റ് എ.ബി. ജയപ്രകാശ്, സജിതുരുത്തിക്കുന്ന്, കെന്നഡി, എം.എന്‍. മധു, സഹജഹരിദാസ്, പി.ബി.സുജിത്, ബ്രഹ്മരാജ്, പി.ജയകുമാര്‍, എം.ആര്‍. സത്യന്‍, സുബ്രഹ്മണ്യന്‍, എം.എ. വാസുദേവന്‍, ബിനു തുടങ്ങിയവര്‍ സംസാരിച്ചു. സ്ഥാനാര്‍ത്ഥി പ്രൊ.തുറവൂര്‍ വിശ്വംഭരന്‍ നന്ദി പറഞ്ഞു.