കണ്ണൂര്: നിയമസഭാ തെരഞ്ഞെടുപ്പിനോടനുബന്ധിച്ചുളള ചെലവ് നിരീക്ഷണത്തിനായി അഞ്ച്തരം സ്ക്വാഡുകള് പ്രവര്ത്തിക്കും. ഫ്ളൈയിങ്ങ് സ്ക്വാഡ്, സ്റ്റാറ്റിക് സര്വയലന്സ് ടീം, വീഡിയോ സര്വയലന്സ് ടീം, വീഡിയോ വ്യൂവിങ്ങ് ടീം അക്കൗണ്ടിങ്ങ് ടീം എന്നീ സ്ക്വാഡുകളും എം സി എം സി യുമാണ് നിരീക്ഷണം നടത്തുക. ഇവയുടെ പ്രവര്ത്തനരീതി വിശദീകരിക്കാന് ബന്ധപ്പെട്ട ഉദ്യോഗസ്ഥര്ക്ക് കലക്ടറേറ്റ് കോണ്ഫറന്സ് ഹാളില് ക്ലാസ് നടന്നു.
അനധികൃതമായി കൊണ്ടുനടക്കുന്ന പണം, മദ്യം, സ്ഫോടകവസ്തുക്കള് എന്നിവ കണ്ടുകെട്ടി ട്രഷറിയില് ഏല്പ്പിക്കുകയാണ് ഫ്ളൈയിങ്ങ് സ്ക്വാഡിന്റെ ജോലി. ഇതിനായി അവധി ദിവങ്ങളിലുള്പ്പെടെ 24 മണിക്കൂറും ട്രഷറി പ്രവര്ത്തനമുണ്ടാകും. രേഖകളില്ലാതെ കൊണ്ടുപോകുന്ന 50000 രൂപക്ക് മുകളിലുളള തുകയാണ് കണ്ടുകെട്ടുക. അപ്പീല് സമിതിക്ക് മുന്നില് മതിയായ തെളിവുകള് ഹാജരാക്കിയാല് ഇവ പിന്നീട് തിരിച്ചുനല്കും. നിശ്ചിത സ്ഥലങ്ങളില് സ്ഥിരമായി നിന്ന് വാഹന പരിശോധനയും മറ്റും നടത്തുകയാണ് സ്റ്റാറ്റിക്കല് സര്വയലന്സ് ടീമിന്റെ ജോലി. രണ്ട് സ്ക്വാഡ് പ്രവര്ത്തനങ്ങളും വീഡിയോഗ്രാഫ് ചെയ്യും. ഫോണ് മുഖാന്തിരമോ അല്ലാതെയോ ലഭ്യമാകുന്ന വിവരം അനുസരിച്ച് അരമണിക്കൂറിനകം ഫ്ളൈയിങ്ങ് സ്ക്വാഡ് സംഭവസ്ഥലത്തെത്തണം. അവര്ക്ക് നിശ്ചിത സമയത്തിനകം എത്തിപ്പെടാന് പ്രയാസമുളള സ്ഥലമാണെങ്കില് സ്റ്റാറ്റിക് സര്വയലന്സ് ടീമിനെയോ ലോക്കല് പൊലീസിനെയോ ആശ്രയിക്കാം.
പൊതുയോഗം നടക്കുന്നത് പകര്ത്താന് വീഡിയോ സര്വയലന്സ് ടീമുണ്ടാകും. അവിടെയുളള കസേര, മറ്റ് ഉപകരണങ്ങള്, വരുന്ന വാഹനങ്ങള്, ആളുകള് ഒക്കെ വീഡിയോയില് പകര്ത്തി വോയ്സ് റിപ്പോര്ട്ട് കുടി ഉള്പ്പെടുത്തുകയാണിവരുടെ ജോലി. ഇത് സൂക്ഷ്മമായി നിരീക്ഷിക്കാന് വീഡിയോ വ്യൂവിങ്ങ് ടീമുണ്ട്. ഓരോ ഇനത്തിനും ചെലവ് കണക്കാക്കുന്ന റേറ്റ് ചാര്ട്ടുണ്ട്. അതനുസരിച്ച് അക്കൗണ്ടിങ്ങ് ടീം നിരക്ക് നിശ്ചയിക്കും. മാധ്യമങ്ങളില് വരുന്ന പരസ്യങ്ങള് പെയ്ഡ്ന്യൂസുകള് എന്നിവ നിരീക്ഷിക്കാന് എം സി എം സി എന്ന കമ്മിറ്റിയും പ്രവര്ത്തിക്കുന്നുണ്ട്. ഇതിന്റെയൊക്കെ അടിസ്ഥാനത്തില് സ്ഥാനാര്ത്ഥികള് ചെലവഴിക്കുന്ന തുക 28 ലക്ഷം കവിയാന് പാടില്ലെന്നാണ് കണക്ക്. തെരഞ്ഞെടുപ്പ് ചെലവ് നിരീക്ഷണം നോഡല് ഓഫീസര് പി എം മാണി, കോര്മാസ്റ്റര് ട്രെയിനര് ഇ സൂര്യകുമാര് എന്നിവര് ക്ലാസെടുത്തു. തെരഞ്ഞെടുപ്പ് വിഭാഗം ഡെപ്യൂട്ടി കലക്ടര് സി സജീവ് സംസാരിച്ചു.
