പരവനടുക്കം: പരവനടുക്കം ടൗണില് പഞ്ചായത്ത് കോപ്ലക്സ് സ്ഥിതി ചെയ്യുന്ന കെട്ടിടത്തിന് പിറകില് പഞ്ചായത്ത് തന്നെ നിര്മ്മിച്ച ശൗചാലയം വെള്ളമില്ലാതെ ഉപയോഗശൂന്യമായി. കോപ്ലക്സിലും മറ്റുമായി 20 ഓളം വരുന്ന കച്ചവട സ്ഥാപനങ്ങളിലെ തൊഴിലാളികളും, ഓട്ടോ തൊഴിലാളികളും, യാത്രക്കാരും ആശ്രയിക്കുന്ന ശൗചാലയം വെളളമില്ലാതായതോടെയാണ് ഉപയോഗിക്കാനാകാതെ ദുരിതത്തിലായത്. സ്ത്രീകളാണ് കൂടുതലായി ബുദ്ധിമുട്ടുകള് അനുഭവിക്കുന്നത്. പേരിന് മാത്രം ഒരു ശൗചാലയം ഇവിടെ ആവശ്യമില്ലെന്ന് നാട്ടുകാര് പറയുന്നു. വെള്ളത്തിന് സംഭരണി സ്ഥാപിച്ചിട്ടുണ്ടെങ്കിലും വിതരണത്തിന് പൈപ്പുകള് പിടിപ്പിച്ചിട്ടില്ല. ശൗചാലയത്തിന്റെ 10 മീറ്റര് മാറി ആവശ്യത്തിന് വെള്ളമുണ്ടെന്നും നാട്ടുകാര് പറയുന്നു. എന്നാല് ഇത് ശൗചാലയത്തിേലക്കെത്തിക്കാനുള്ള സന്മനസ് അധികൃതര് കാണിക്കുന്നില്ല. വെള്ളമില്ലാത്ത ശൗചാലയത്തില് സാമൂഹ്യവിരുദ്ധര് പ്രാഥമിക കൃത്യങ്ങള് നടത്തുന്നതിനാല് ദുര്ഗന്ധം തൊട്ടടുത്ത അംഗണവാടിയിലെ കുട്ടികളടക്കമുളള പ്രദേശവാസികള്ക്ക് അസഹനീയമായിട്ടുണ്ട്. ഈച്ചകളും പെരുകിയിട്ടുണ്ട്. ഇവ അംഗണ്വാടിയിലെ കുട്ടികള്ക്ക് രോഗങ്ങള് പരത്തുമെന്ന ഭീതിയിലാണ് രക്ഷാകര്ത്താക്കള്.
ശൗചാലയത്തിന്റെ ശോചനീയാവസ്ഥ നിരവധി തവണ പഞ്ചായത്ത് അധികൃതരുടെ ശ്രദ്ധയില്പ്പെടുത്തിയിരുന്നതായി പരിസരവാസികള് പറയുന്നു. എന്നാല് അധികൃതര് കേട്ടഭാവം നടിക്കുന്നില്ലെന്നും ആക്ഷേപമുണ്ട്. നിലവിലുള്ള ഒറ്റമുറിയുള്ള ശൗചാലയം സ്ത്രീകള്ക്കും പുരുഷന്മാര്ക്കും വെവ്വേറെ ഉപയോഗിക്കുന്ന രീതിയില് പുനര്നിര്മ്മിക്കണമെന്ന് നാട്ടുകാര് ആവശ്യപ്പെട്ടു.
