കണ്ണൂര്‍: ഫോക്‌ലോര്‍ അക്കാദമി മ്യൂസിയത്തിന്റെ ഉദ്ഘാടനവും പി.കെ.കാളന്‍ പുരസ്‌കാര സമര്‍പ്പണവും 20 ന് ചിറക്കലിലെ അക്കാദമി ആസ്ഥാനത്തെ ചെറുശ്ശേരി ഓഡിറ്റോറിയത്തില്‍ നടക്കുമെന്ന് അക്കാദമി ഭാരവാഹികള്‍ പത്രസമ്മേളനത്തില്‍ പറഞ്ഞു. മന്ത്രി കെ.സി.ജോസഫ് ഉദ്ഘാടനം നിര്‍വ്വഹിക്കും. കെ.എം.ഷാജി എംഎല്‍എ അധ്യക്ഷത വഹിക്കും. പി.കെ.ശ്രീമതി എംപി മുഖ്യാതിഥിയായി പങ്കെടുക്കും. ഡോയ.എന്‍.ജയരാജ് എംഎല്‍എ മുഖ്യ പ്രഭാഷണം നടത്തും. ജില്ലാ കലക്ടര്‍ പി.ബാലകിരണ്‍ സംബന്ധിക്കും. വിവിധ കലാപരിപാടികളും നടക്കും. ആദിവാസി കലാരൂപമായ ഗദികയെ ജനകീയമാക്കിയ പി.കെ.കാളന്റെ സ്മരണയ്‌ക്കായി അക്കാദമി ഏര്‍പ്പെടുത്തിയ 1 ലക്ഷം രൂപയുടെ പുരസ്‌ക്കാരം പ്രമുഖ ഫോക് ലോര്‍ പണ്ഡിതനും നെന്മാറ എന്‍എസ് കോളേജ് മുന്‍ പ്രിന്‍സിപ്പാളുമായ ഡോ.എന്‍.അജിത്ത് കുമാറിന് ചടങ്ങില്‍ വെച്ച് മന്ത്രി കൈമാറും. കേരളത്തിന്റെ കാര്‍ഷിക സംസ്‌കൃതിയുടെ അടയാളങ്ങള്‍, പൂര്‍വ്വികരുടെ ധീഷണാ സ്രോതസ്സായ നാട്ടറിവുകള്‍ തുടങ്ങിയവ നവീകരിച്ച മ്യൂസിയത്തിന്റെ പ്രത്യേക ആകര്‍ഷണമാണ്. ഉത്തര കേരളത്തിലെ തെയ്യങ്ങളെക്കുറിച്ചറിയാനും പഠിക്കുവാനും സാധിക്കുന്ന വിധത്തില്‍ അഞ്ഞൂറോളം തെയ്യങ്ങള്‍ ഉള്‍പ്പെടുത്തിക്കൊണ്ട് തയ്യാറാക്കിയ ടച്ച് സ്‌ക്രീന്‍ സംവിധാനവും മ്യൂസിയത്തോടനുബന്ധിച്ച് സജ്ജീകരിച്ചിട്ടുണ്ട്. ജില്ലാ നിര്‍മ്മിതി കേന്ദ്രയാണ് 70 ലക്ഷത്തോളം രൂപ ചിലവില്‍ മ്യൂസിയത്തിന്റെ നവീകരണം നിര്‍വ്വഹിച്ചിരിക്കുന്നത്. 20 ന് വൈകുന്നേരം 3 മണിമുതല്‍ 7 മണിവരെ പൊതുജനങ്ങള്‍ക്ക് സൗജന്യ പ്രവേശനം അനുവദിച്ചിട്ടുണ്ട്. പത്രസമ്മേളനത്തില്‍ അക്കാദമി ചെയര്‍മാന്‍ പ്രഫ.ബി.മുഹമ്മദ് അഹമ്മദ്, വൈസ് ചെയര്‍മാന്‍ സുരേഷ് കൂത്തുപറമ്പ്, സെക്രട്ടറി എം.പ്രദീപ് കുമാര്‍ എന്നിവര്‍ പങ്കെടുത്തു.
ഫോക്‌ലോര്‍ അക്കാദമി മ്യൂസിയത്തിന്റെ ഉദ്ഘാടനവും പി.കെ.കാളന്‍ പുരസ്‌കാര സമര്‍പ്പണവും 20 ന്
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
ജന്മഭൂമി ഓണ്‍ലൈന്‍© Mathruka Pracharanalayam Limited.
Tech-enabled by Ananthapuri Technologies.