ജയരാജനെ പിന്‍തുണച്ച് കണ്ണൂര്‍ ലോബിമാത്രം സിപിഎമ്മില്‍ അഭിപ്രായ ഭിന്നത രൂക്ഷം

കണ്ണൂര്‍: ആര്‍എസ്എസ് നേതാവിനെ വെട്ടിക്കൊലപ്പെടുത്തിയ കേസില്‍ പ്രതിയായി ജയിലിലടക്കപ്പെട്ട ജില്ലാ സെക്രട്ടറി പി.ജയരാജനെ പിന്‍തുണച്ചത് സിപിഎം കണ്ണൂര്‍ ലോബി മാത്രം. അക്രമരാഷ്‌ട്രീയത്തിന് അകമഴിഞ്ഞ പിന്തുണ നല്‍കുന്ന കോടിയേരിയും പിണറായിയും മാത്രമാണ് ഇതുവരെ പരസ്യമായി ജയരാജനെ പിന്തുണച്ചത്. കണ്ണൂര്‍ ജില്ലയിലെ പിണറായിയുടെ സന്തതസഹചാരിയാണ് പി.ജയരാജന്‍. എന്നാല്‍ ജില്ലയില്‍ ചില നേതാക്കന്‍മാര്‍ വെച്ച് പുലര്‍ത്തുന്ന അര്‍ത്ഥഗര്‍ഭമായ മൗനം പാര്‍ട്ടി നേതൃത്വത്തില്‍ ആശങ്ക സൃഷ്ടിക്കുന്നുണ്ട്. ഈ വിഷയത്തില്‍ പി.ജയരാജന്റെ സ്വന്തക്കാരനായ ഇ.പി.ജയരാജന്‍ എംഎല്‍എയുടെ മൗനമാണ് സിപിഎം നേതൃത്വത്തെയും അണികളെയും അങ്കലാപ്പിലാക്കുന്നത്. സംഘടനക്കകത്തോ പുറത്തോ ഇതുസംബന്ധിച്ച് ഇ.പി.ജയരാജന്‍ ഇതുവരെ യാതൊരുവിധ പ്രതികരണവും നടത്തിയിട്ടില്ല. മാധ്യമങ്ങളില്‍ ഈ വിഷയത്തില്‍ ഇപ്പോള്‍ പ്രതികരിക്കുന്നത് പാര്‍ട്ടിക്കകത്തും പുറത്തും പ്രത്യേകിച്ച് സ്വാധീനമൊന്നുമില്ലാത്ത എ.എം.ഷംസീറാണ്. സിപിഎമ്മിന്റെ കണ്ണൂര്‍ ലോബിയുടെ നേതൃത്വത്തില്‍ നടക്കുന്ന കൊലപാതക പരമ്പരകളെ പാര്‍ട്ടിക്കകത്ത് പരസ്യമായി തള്ളിപ്പറയുന്നവരാണ് പാര്‍ട്ടിയുടെ മുതിര്‍ന്ന നേതാക്കളായ എം.എ.ബേബി, തോമസ് ഐസക്ക്, പി.കെ.ശീമതി എംപി തുടങ്ങിയവര്‍. എന്നാല്‍ പിണറായിയുടെയും കോടിയേരിയുടെയും മൗനാനുവാദത്തോടെ കണ്ണൂരില്‍ നടക്കുന്ന അക്രമങ്ങളില്‍ ഇവരാരും തന്നെ പരസ്യമായി നിലപാട് വ്യക്തമാക്കാറില്ല. അതുകൊണ്ട് തന്നെ ഇപ്പോള്‍ മനോജ് വധവുമായി ബന്ധപ്പെട്ട സംഭവവികാസങ്ങളില്‍ പരസ്യമായി പ്രതികരിക്കേണ്ടതില്ലെന്നാണ് ഇവരുടെ നിലപാട്. അക്രമങ്ങള്‍ക്ക് നേതൃത്വം കൊടുത്തവര്‍ തന്നെ പ്രശ്‌നങ്ങള്‍ക്കും പരിഹാരം കാണട്ടെയെന്ന സമീപനമാണ് ഇവരുടേത്. പാര്‍ട്ടി നേതൃത്വം എന്തെഴുതിക്കൊടുത്താലും തൊണ്ടതൊടാതെ മാധ്യമപ്രവര്‍ത്തകരെ വിളിച്ച് വരുത്തി വായിച്ച് തീര്‍ക്കുന്ന വിഎസ് പോലും ജയരാജന് വേണ്ടി രംഗത്ത് വന്നില്ല എന്നതും ശ്രദ്ധേയമാണ്. സമാനതകളില്ലാത്ത കൊലപാതക പരമ്പരകള്‍ക്ക് നേതൃത്വം കൊടുത്തവര്‍ ഇരുമ്പഴിക്കുള്ളിലാകുമ്പോള്‍ നിയമം നടപ്പിലായി എന്ന് രഹസ്യമായി പ്രതികരിക്കുന്നവരും പാര്‍ട്ടിക്കകത്തുണ്ട്. വരും നാളുകളില്‍ സിപിഎമ്മിനെ പ്രതിസന്ധിയിലാക്കുന്നത് അക്രമരാഷ്‌ട്രീയത്തില്‍ പാര്‍ട്ടിക്കകത്ത് ഉടലെടുത്ത രൂക്ഷമായ അഭിപ്രായ വ്യത്യാസങ്ങളായിരിക്കും.