കായംകുളം: കൊല്ലം അഴീക്കല്‍ ബീച്ചില്‍ പാറയിടുക്കില്‍ ആറുമാസം പ്രായമായ ശിവാനി എന്ന കുഞ്ഞിനെ കൊന്ന് ഒളിപ്പിച്ച സംഭവത്തില്‍ ഒരാള്‍ കൂടി അറസ്റ്റില്‍. ബീഹാറിലെ മോത്തിയാഗിരി ജില്ലയില്‍ തൃക്കവലിയ പോലീസ് സ്‌റ്റേഷന്‍ അതിര്‍ത്തിയില്‍ സെമരബസാറില്‍ ഘനരാജ്പ്രമോദി(സനോജ്-33)നെയാണ് കായംകുളം സര്‍ക്കിള്‍ ഇന്‍സ്പക്ടര്‍ ഉദയഭാനുവിന്റെ നേതൃത്വത്തിലുള്ള പോലീസ് സംഘം മേടമുക്കിലുള്ള കടയില്‍ നിന്നും അറസ്റ്റ് ചെയ്തത്. കുട്ടിയുടെ മാതാപിതാക്കളും യുപി സ്വദേശികളുമായ ബശുദേവ്, ഭാര്യ പ്രതിഭ എന്നിവരെ കഴിഞ്ഞ ഒക്‌ടോബര്‍ 23 ന് കരുനാഗപ്പള്ളി സര്‍ക്കിള്‍ ഇന്‍സ്പക്ടര്‍ കെ.എ.വിദ്യാധരന്‍ അറസ്റ്റ് ചെയ്തിരുന്നു. തുടര്‍ന്ന് കായംകുളം പോലീസ് നടത്തിയ അന്വേഷണത്തിലാണ് ഘനരാജ് അറസ്റ്റിലായത്. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.
സംഭവത്തെ കുറിച്ച് പോലീസ് പറയുന്നതിങ്ങനെ: ദമ്പതികള്‍ക്ക് ജനിച്ച കുട്ടി പെണ്ണായതിനാല്‍ കുട്ടിയെ ഉപദ്രവിക്കുക പതിവായിരുന്നു. കായംകുളം മേടമുക്കിനു സമീപം വാടകയ്‌ക്ക് താമസിക്കുകയായിരുന്നു ഇവര്‍. കൊലപാതകത്തിനു മുമ്പ് കുഞ്ഞിന്റെ കൈകാലുകള്‍ ഒടിച്ചു. കുഞ്ഞ് നിലവിളിക്കുന്നത് കേട്ട് അയല്‍വാസികള്‍ എത്തിയപ്പോള്‍ കട്ടിലില്‍ നിന്ന് വീണതാണെന്ന് പറഞ്ഞ് താലൂക്ക് ആശുപത്രിയില്‍ എത്തിച്ചു. തുടര്‍ന്ന് ആലപ്പുഴ മെഡിക്കല്‍ കോളജ് ആശുപത്രിയിലേക്ക് മാറ്റി. ഡോക്ടര്‍ക്ക് സംശയം തോന്നിയതോടെ ഇവര്‍ അവിടെ നിന്നും മുങ്ങി ഒക്‌ടോബര്‍ 12ന് രാത്രിയില്‍ കായംകുളത്തെത്തി കുട്ടിയെ നിലത്തടിച്ചു കൊന്നു. തുടര്‍ന്ന് സഞ്ചിയിലാക്കി ഓട്ടോയില്‍ വലിയഴീക്കല്‍ കടപ്പുറത്തെത്തി പാറ ഇടുക്കില്‍ ഉപേക്ഷിച്ചു. ചൂണ്ടയിടാന്‍ എത്തിയവര്‍ അറിയിച്ചതിനെ തുടര്‍ന്ന് പോലീസെത്തി മൃതദേഹം തിരുവനന്തപുരം മെഡിക്കല്‍ കോളജ് ആശുപത്രിയിലേക്ക് മാറ്റി.
പോസ്റ്റ്‌മോര്‍ട്ടത്തില്‍ കൊലപാതകമാണെന്ന് തെളിഞ്ഞതോടെ നടത്തിയ അന്വേഷണത്തിലാണ് ഒക്‌ടോബര്‍ 23ന് മാതാപിതാക്കളെ അറസ്റ്റു ചെയ്തത്. അയല്‍വാസികളോട് കുട്ടിയെ സഹോദരി കൊണ്ടുപോയതായി പറഞ്ഞു. ഇവരുമായി ബന്ധമുണ്ടെന്ന് സംശയിച്ചാണ് സനോജിനെ പോലീസ് ചോദ്യം ചെയ്തതെങ്കിലും ഇയാള്‍ കുറ്റം സമ്മതിച്ചില്ല. ദമ്പതികള്‍ താമസിച്ചിരുന്ന വീടിന്റെ മറ്റൊരു മുറിയിലായിരുന്നു ഇയാള്‍ താമസിച്ചിരുന്നത്. സനോജിന്റെയും പ്രതിഭയുടെയും ഫോണ്‍കോളുകള്‍ പരിശോധിച്ച് നടത്തിയ അന്വേഷണത്തില്‍ ഇരുവര്‍ക്കും വഴിവിട്ട ബന്ധമുള്ളതായി പോലീസ് കണ്ടെത്തി. കുട്ടിയെ കൊന്ന ശേഷം കടലിടുക്കില്‍ തള്ളാന്‍ ഇയാളും സഹായിച്ചിരുന്നു.
നാട്ടില്‍ മരിച്ചയാളുകളെ കടലില്‍ തള്ളുകയാണ് പതിവെന്നും ഇതിനാലാണ് പാറയിടുക്കില്‍ വച്ചതെന്നും ഇയാള്‍ പോലീസിനോട് പറഞ്ഞു. ഡി.വൈ.എസ്.പി: ഷിഹാബുദീന്റെ മേല്‍നോട്ടത്തില്‍ കരീലക്കുളങ്ങര എസ്‌ഐ: ബി.അശോകന്‍, സിവില്‍ പോലീസ് ഓഫീസര്‍മാരായ റെജി, ജിതേഷ്, അലക്‌സ്, ബിജുരാജ്, അതുല്യമോള്‍ തുടങ്ങിയവരും അന്വേഷണ സംഘത്തിലുണ്ടായിരുന്നു
