ആലപ്പുഴ: സര്‍ക്കാര്‍ ആശുപത്രികളില്‍ സൗജന്യ ചികിത്സയുണ്ടായിട്ടും പൊതുജനത്തിന്റെ നികുതിപ്പണം ഉപയോഗിച്ച് സ്വകാര്യ ആശുപത്രികളില്‍ ചികിത്സ നടത്തിയ വകയില്‍ ജില്ലയിലെ ജനപ്രതിനിധികള്‍ ചെലവഴിച്ചത് കോടികള്‍. ജില്ലയില്‍ നിന്നുള്ള ഒന്‍പത് എംഎല്‍എമാരും പൊതുജനത്തിന്റെ പണമുപയോഗിച്ച് ചികിത്സ നടത്തിയിട്ടുണ്ട്. സംസ്ഥാനത്തെ 117 എംഎല്‍എമാര്‍ ആകെ ചെലവഴിച്ചത് 4.61 കോടിരൂപയാണെന്ന് വിവരാവകാശ നിയമപ്രകാരം സര്‍ക്കാര്‍തന്നെ വെളിപ്പെടുത്തിയിട്ടുണ്ട്. ഇതില്‍ 2.15 കോടി രൂപയും വാങ്ങിയത് ജില്ലയില്‍ നിന്നുള്ള എംഎല്‍എമാരാണെന്നതാണ് ശ്രദ്ധേയം.
കുട്ടനാട് എംഎല്‍എ തോമസ് ചാണ്ടിയാണ് സംസ്ഥാനത്തുതന്നെ ചികിത്സാ സഹായം കൈപ്പറ്റിയവരില്‍ മുമ്പില്‍. 1.91 കോടിയാണ് അദ്ദേഹം ചികിത്സയിനത്തില്‍ സര്‍ക്കാരില്‍ നിന്നും കൈപ്പറ്റിയത്. അരൂര്‍ എംഎല്‍എയായ എ.എം. ആരിഫ് 4.99 ലക്ഷമാണ് ചികിത്സായിനത്തില്‍ സര്‍ക്കാരില്‍ നിന്നും വാങ്ങിയത്. മാവേലിക്കര എംഎല്‍എ ആര്‍. രാജേഷ് 97,018 രൂപ മാത്രമാണ് ചികിത്സയ്‌ക്ക് വാങ്ങിയിട്ടുള്ളത്. മന്ത്രികൂടിയായ ഹരിപ്പാട് എംഎല്‍എ രമേശ് ചെന്നിത്തല 2.86 ലക്ഷം രൂപ വാങ്ങിയെടുത്തു. കായംകുളം എംഎല്‍എ സി.കെ. സദാശിവന്‍ 3.59 ലക്ഷമാണ് ചികിത്സയ്‌ക്കായി വാങ്ങിയത്. അമ്പലപ്പുഴ എംഎല്‍എ ജി. സുധാകരന്‍ 2.88 ലക്ഷമാണ് വാങ്ങിയത്. ചേര്‍ത്തല എംഎല്‍എ പി. തിലോത്തമന്‍ 3.07 ലക്ഷം രൂപ വാങ്ങി. ചെങ്ങന്നൂര്‍ എംഎല്‍എ പി.സി. വിഷ്ണുനാഥ് വാങ്ങിയത് 1.73 ലക്ഷമാണ്.
എന്നാല്‍ ഇവര്‍ ഏതു രോഗത്തിനാണ് ചികിത്സ നടത്തിയതെന്ന വിവരം വെളിപ്പെടുത്താന്‍ സ്വകാര്യതയെ മാനിച്ച് വെളിപ്പെടുത്താനാവില്ലെന്നാണ് നിയമസഭാ സെക്രട്ടറി വ്യക്തമാക്കുന്നത്. ജില്ലയിലെ സാധാരണക്കാര്‍ സര്‍ക്കാരാശുപത്രികളുടെ ശോച്യാവസ്ഥമൂലം മതിയായ ചികിത്സ ലഭിക്കാതെ നെട്ടോട്ടമോടുമ്പോഴാണ് ജില്ലയില്‍ നിന്നുള്ള എംഎല്‍എമാര്‍ സ്വകാര്യ ആശുപത്രികളില്‍ ചികിത്സ തേടി കോടികള്‍ ചെലവഴിച്ചത്. സര്‍ക്കാര്‍ ആതുരാലങ്ങളുടെ ശോച്യാവസ്ഥ പരിഹരിക്കാന്‍ യാതൊരു നടപടിയും ഇപ്പോഴും ഉണ്ടാകുന്നില്ല. ഭരണകക്ഷി എംഎല്‍എമാര്‍ ഇക്കാര്യത്തില്‍ ദയനീയ പരാജയമാണ്.
ഈ വിഷയത്തില്‍ ശക്തമായി ഇടപെടാന്‍ പ്രതിപക്ഷഎംഎല്‍എ മാരും പരാജയപ്പെട്ടു. ഈ സാഹചര്യത്തിലാണ് ജനത്തിന്റെ നികുതിപ്പണം ഉപയോഗിച്ചുള്ള എംഎല്‍എ മാരുടെ ചികിത്സ.
