ആലപ്പുഴ: വീടുകളില് വളര്ത്തുന്ന നായ്ക്കളില് അടുത്തയിടെയായി വൈറസ് രോഗം പടര്ന്നുപിടിക്കുന്നത് ആശങ്കയുയര്ത്തുന്നു. കഴിഞ്ഞ ഏതാനും ആഴ്ചകളായി വായുവിലുടെ പകരുന്ന രോഗം പട്ടണത്തില് വ്യാപകമായിരിക്കുകയാണ്. ചികിത്സിക്കാന് വൈകുന്ന നായ്ക്കള് ഒന്നോ രണ്ടോ ദിവസത്തിനകം ചത്തൊടുങ്ങുന്നു.
ഇത്തരം രോഗങ്ങള് നായ്ക്കളുമായി ഇടപഴകുന്ന മനുഷ്യര്ക്കും ദോഷമാണെന്നുള്ളത് ഗൗരവതരമായി കാണേണ്ടതുണ്ട്. ഡിസ്റ്റെംബര്, ഹെപറ്റൈറ്റിസ്, പാര്വോവൈറസ് തുടങ്ങിയ വൈറസ് ബാധകളാണ് വ്യാപകം. രോഗബാധ ഗുരുതരമായിട്ടും സര്ക്കാരും മുനിസിപ്പാലിറ്റിയും വേണ്ട മുന്കരുതലുകളും രോഗപ്രതിരോധ നടപടികളും സ്വീകരിക്കുന്നില്ല. രോഗബാധ തെരുവുനായ്ക്കളിലേക്കും വ്യാപിച്ചു തുടങ്ങിയിട്ടുണ്ട്.
സര്ക്കാര് വക മൃഗാശുപത്രികളില് നായ്ക്കള്ക്കു കുത്തിവയ്ക്കണമെങ്കില് ഉടമകള് പുറത്തു നിന്നു മരുന്നു വാങ്ങി നല്കണം. അവസരത്തിനൊത്തു മരുന്നു കമ്പനികള് മരുന്നുകളുടെ വില വര്ധിപ്പിച്ചുകൊണ്ടിരിക്കുയാണ്. ഉദാഹരണത്തിനു നായ്ക്കളിലുള്ള വൈറസ് ബാധയ്ക്ക് എതിരായി ഉപയോഗിക്കുന്ന മെഗാവാക് 6 എന്ന അലോപ്പതി കുത്തിവയ്പ്പു മരുന്ന് ഒരു മില്ലിലിറ്റര് അടങ്ങിയ കുപ്പിയ്ക്ക് അഞ്ഞൂറു രൂപയാണ് വില്പനവില. വിലക്കൂടുതല് കാരണം പലരും നായ്ക്കളെ കുത്തിവയ്പ്പിക്കാന് മടിക്കും.
അതു സമൂഹത്തിനാകെ ദോഷകരമായി ബാധിക്കുകയും ചെയ്യും. വൈറസ് ബാധകള്ക്കതിരേയുള്ള മരുന്നുകള് സൗജന്യനിരക്കില് വിതരണം ചെയ്യാന് അധികൃതര് തയാറാകണമെന്നു തത്തംപള്ളി റസിഡന്റ്സ് അസോസിയേന് പ്രസിഡന്റ് തോമസ് മത്തായി കരിക്കംപള്ളില് ആവശ്യപ്പെട്ടു.
.
