ഏഴുപതിറ്റാണ്ടുകാലം തന്റെ സന്യാസ സപര്യകൊണ്ട് സമാജത്തെ ധന്യമാക്കിയ സൂര്യതേജസ്സായിരുന്നു സുധീന്ദ്രതീര്ത്ഥ സ്വാമികള്. ഗൗഡസാരസ്വത സമൂഹത്തിന്റെ ആത്മീയ തേജസ്സും കാശിമഠാധിപതിയുമായിരുന്ന സുധീന്ദ്രതീര്ത്ഥ സ്വാമികള് എളിമയുടെയും സൗമനസ്സിന്റെയും അറിവിന്റെയും നിറകുടമായിരുന്നു. സ്വസമുദായത്തിന്റെ ഐക്യത്തിനും ആചാരാനുഷ്ഠാനങ്ങള് ഊട്ടിയുറപ്പിക്കുന്നതിനും നിരന്തരം പ്രവര്ത്തിച്ചുകൊണ്ടേയിരുന്നു.
അതോടൊപ്പം ഹിന്ദുസമാജത്തിനാകമാനം ഐക്യത്തിന്റെ പ്രേരണയും വിശ്വാസത്തിലധിഷ്ഠിതമായ സേവന പദ്ധതിക്കും ഊന്നല് നല്കാന് കാശി മഠാധിപതി എന്ന നിലയില് അദ്ദേഹം ശ്രദ്ധാപൂര്വ്വം പ്രവര്ത്തിച്ചു.അറിവിന്റെ അഹന്തയോ ഉന്നതസ്ഥാനത്തിന്റെ അധികാരസ്വരമോ തൊട്ടുതീണ്ടാതെ പെരുമാറാന് സ്വാമികള്ക്ക് സാധിച്ചു.ജനകീയ പ്രശ്നങ്ങളോടുള്ള ഒരു ധര്മ്മഗുരുവിന്റെ സമഗ്രമായ കാഴ്ചപ്പാടും സത്യസന്ധമായ വിലയിരുത്തലും സ്വാമിജിയില്നിന്നും എന്നും ഉണ്ടായിരുന്നു.
പാവങ്ങളും ദരിദ്രരുമായവരുടെ വേദനയെല്ലാം ഏറ്റുവാങ്ങണമെന്ന സദുപദേശം നല്കുന്നതിന് വലുപ്പച്ചെറുപ്പം നോക്കാറില്ല. ആതുരാലയങ്ങളും വിദ്യാഭ്യാസ സ്ഥാപനങ്ങളും ആരംഭിച്ചതിലൂടെ ഒട്ടേറെ ജനക്ഷേമ പ്രവര്ത്തനങ്ങള്ക്ക് തുടക്കം കുറിക്കാന് സ്വാമിജിക്ക് കഴിഞ്ഞു. ജനോപകാരപ്രദമായ പദ്ധതികള് വഴി സാമൂഹ്യ ആധ്യാത്മിക ധാര്മ്മിക രംഗത്ത് വന്മുന്നേറ്റം സൃഷ്ടിച്ചു. വളരെ ലളിതമായ ആധ്യാത്മിക വിഷയങ്ങള് പ്രതിപാദിക്കുന്നതില് സ്വാമിജി സദാ ശ്രദ്ധാലുവായിരുന്നു. ഭാരതത്തിന്റെ ആദ്ധ്യാത്മിക നവോത്ഥാന മണ്ഡലത്തില് ഉദയസൂര്യനെപോലെ പ്രവര്ത്തിച്ച സുധീന്ദ്രതീര്ത്ഥ സ്വാമികള് സദാ സഞ്ചരിച്ചുകൊണ്ടേയിരുന്നു.
സുധീന്ദ്രതീര്ത്ഥ സ്വാമികളുടെ സന്ന്യാസജീവിതത്തില് സപ്തതി പിന്നിട്ടപ്പോള് നൂറിലേറെ ക്ഷേത്രങ്ങളാണ് ജീര്ണ്ണോദ്ധാരണേത്താടെ പുനഃപ്രതിഷ്ഠ നടത്തി ഉന്നതിയിലെത്തിച്ചത്. ആത്മീയഗുരു മാര്ഗ്ഗദര്ശനത്തിന്റെ പ്രേരണയും ഊര്ജ്ജവും ശക്തിയും പിന്ബലവും പകര്ന്ന് ഗൗഡസാരസ്വത ബ്രാഹ്മണ സമാജം ആത്മീയതയ്ക്കൊപ്പം സാമാജിക സേവനത്തിന്റെയും മാതൃകയായി ഐക്യത്തിന്റെയും സംഘടനാശക്തിയുടെയും ഉത്തമമാതൃകയായി ഈ സമാജം ഇന്ന് മാറിയെങ്കില് സ്വാമിജിയുടെ സ്നേഹമസൃണമായ ഇടപെടലുകളുടെ സ്വാധീനംകൊണ്ടാണ്.
കാശിമഠത്തിന്റെ ശാഖാവികസനങ്ങള്ക്കൊപ്പം വൃദ്ധാശ്രമങ്ങളും ബാലാശ്രമങ്ങളും വേദപാഠശാല, സംസ്കൃതഭാഷാഭിരുചി വളര്ത്തല്, സമാജിക ഐക്യസംഘടന, യുവജനശക്തി സംഘടന, ആതുരശുശ്രൂഷാ കേന്ദ്രങ്ങള്, പാര്പ്പിട കേന്ദ്രങ്ങള്, ക്ഷേത്രസമുച്ചയങ്ങള് തുടങ്ങി വിവിധതലങ്ങളില് സമാജികശക്തി പ്രകടമാക്കി മാതൃകാ സമാജമാക്കി മാറ്റുവാനും സ്വാമിജിക്കായി.നാരായണസേവയ്ക്കൊപ്പം നരസേവയും ശരിയായ രീതിയില് നടത്താന് സമാജത്തെ അദ്ദേഹം പ്രേരിപ്പിച്ചു. ഭാരതത്തിന്റെ റിസര്വ്വ് ബാങ്ക് ഗവര്ണ്ണര് സ്ഥാനം മുതല് രാജ്യഭരണകേന്ദ്രങ്ങളിലും സമാജത്തിന്റെ വിവിധതലങ്ങളിലും ഉന്നതശ്രേണി തലവന്മാരെവരെ സംഭാവന നല്കിയ ജിഎസ്ബി സമൂഹത്തിന് ശക്തിയും പ്രേരണയും പകര്ന്നുനല്കിയ ധന്യതയാണ് സന്ന്യാസ സപ്തതി വര്ഷത്തിന്റേത്.
1944ല് തുടങ്ങിയ സന്ന്യാസജീവിതത്തില് ദരിദ്രനാരായണന്മാരെ ധര്മ്മമാര്ഗത്തിലൂടെ അദ്ധ്വാനശീലരാക്കി കുബേരനാക്കുന്ന മാര്ഗദര്ശനമാണ് സ്വാമിജി സമാജത്തിന് പകര്ന്നുനല്കിയത്. ജന്മനക്ഷത്രനവതിയിലും സന്ന്യാസശ്രമസപ്തതിയിലും സുധീന്ദ്രതീര്ത്ഥ സ്വാമികള് ഭാരത സന്ന്യാസ പരമ്പരകളില് സര്വ്വാദരണീയനായി മാറി. ചാതുര്മാസാചരണമാണ് വിശ്രമങ്ങള്ക്കും വിശ്വാസങ്ങള്ക്ക് ദൃഡതയും പകരാന് ഉള്ള സമയം. മറ്റ് മാസങ്ങളെല്ലാം സമാജത്തിനിടയിലൂടെയുള്ള ആത്മീയ യാത്രയാണ്.
ഗൗഡസാരസ്വത സമൂഹത്തിന്റെ പരമാചാര്യനായിത്തീരാന് ഒരു കേരളീയന് സാധിച്ചത് തന്നെ നമുക്കാകെ സുകൃതം പകരുന്നതായിരുന്നു. സമൂഹത്തിലാകെ അനൈക്യവും അനാശാസ്യ പ്രവണതകളും പടരുന്ന കാലമാണിത്. എന്നാല് ഒരു സമൂഹമെന്ന നിലയില് ഗൗഡസാരസ്വത ബ്രാഹ്മണരില് താരതമ്യേന ഇന്നും ദുഷ്പ്രവണതകള് കുറയുന്നതിന്റെ മുഖ്യകാരണം തേടിയാല് ആത്മീയാചാര്യന്മാരുടെ സല്സംഗവും ഇടപെടലും കൊണ്ടാണെന്ന് തിരിച്ചറിയാന് പ്രയാസമില്ല. സുധീന്ദ്രതീര്ത്ഥ സ്വാമികളുടെ ജീവിതംപോലെ തന്നെയാണ് മഹാസമാധിയും. സ്വാമികള്ക്കത് മുന്കൂട്ടി അറിയാന് കഴിഞ്ഞു എന്നതാണ് രോഗശയ്യയില് നിന്നും ഉടന് കാശിയിലെത്താന് അദ്ദേഹം ആശിച്ചത്. കാശിയിലെത്തി വൈകാതെതന്നെ ആ സൂര്യതേജസ്സ് സ്വര്ഗാരോഹണവും നടത്തി. ധര്മ്മഗുരുവിന്റെ പാദാരവിന്ദങ്ങളില് ഞങ്ങളും നമ്രശിരസ്കരാകുന്നു.
