കോഴിക്കോട്: പ്രകൃതിയുടെ മടിത്തട്ടിലേക്കിറങ്ങിച്ചെന്ന സഞ്ചാരി കൂട്ടം തുഷാരഗിരിയെ മാലിന്യമുക്തമാക്കി. ഫെയ്സ്ബുക്ക് കൂട്ടായ്മയായ സഞ്ചാരിയുടെ കോഴിക്കോട് യൂണിറ്റിന്റെ ആഭിമുഖ്യത്തിലായിരുന്നു പരിപാടി സംഘടിപ്പിച്ചത്. കടല് മുതല് കാടുവരെ എന്ന ആശയം ഉയര്ത്തിപ്പിടിച്ചുള്ള യാത്രയില് പ്രകൃതിയുടെ സംരക്ഷണം ഉറപ്പു വരുത്തുന്നതായിരുന്നു. ദിവസേന നൂറുക്കണക്കിന് സന്ദര്ശകരെത്തുന്ന തുഷാരഗിരിയുടെ പരിസ്ഥിതി സംരക്ഷണത്തിന് പൂര്ണ പിന്തുണ നല്കാനായിരുന്നു സഞ്ചാരികള് എത്തിയത്. വെള്ളച്ചാട്ടത്തിനും പരിസരങ്ങളിലുമുണ്ടായിരുന്ന പ്ലാസ്റ്റിക് മാലിന്യം ശേഖരിക്കാനും അവര് മറന്നില്ല. പ്രകൃതി സംരക്ഷണത്തിന്റെ പ്രാധാന്യം അറിയിച്ചുകൊണ്ടുള്ള ബോര്ഡുകളും സ്ഥാപിച്ചു.
കോഴിക്കോട് ബീച്ചില് നിന്നും ആരംഭിച്ച റൈഡ് മലപ്പുറം എം.വി.ഐ സാജു ഫ്ളാഗ് ഓഫ് ചെയ്തു. രാവിലെ എട്ട് മണിക്ക് ബീച്ചില് നിന്നും ആരംഭിച്ച റൈഡില് ഇരുചക്ര വാഹനങ്ങളിലും കാറുകളിലുമായി നൂറോളം പേരാണ് പങ്കു ചേര്ന്നത്. പ്രകൃതിക്കൊപ്പം നിന്നുകൊണ്ടുള്ള യാത്രകള്ക്ക് പ്രധാന്യം നല്കിയ സഞ്ചാരിയുടെ യാത്രകളില് ഏറ്റവും മികവുറ്റതായിരുന്നു ഇന്നലെ കോഴിക്കോട് യൂണിറ്റിന്റെ ആഭിമുഖ്യത്തില് നടന്നത്. സഞ്ചാരി ഗ്രൂപ്പിന്റെ കോഴിക്കോട് യൂണിറ്റിന്റെ ആദ്യത്തെ പരിപാടിയെന്ന പ്രത്യേകതയും ഉണ്ടായിരുന്നു. കോഴിക്കോട് നഗരം ചുറ്റി മെഡിക്കല് കോളജ്, കുന്ദമംഗലം, കൊടുവള്ളി, താമരശ്ശേരി, അടിവാരം എന്നീ കേന്ദ്രങ്ങളില് നിന്നും കൂടുതല് സഞ്ചാരികള് യാത്രയില് പങ്കാളികളായി. സഞ്ചാരിക്കൊപ്പം യാത്രയില് പങ്കെടുക്കാന് താല്പര്യം പ്രകടിപ്പിച്ച് നിരവധി പേരായിരുന്നു വിവിധ കേന്ദ്രങ്ങളിലെത്തിയത്.
കോഴിക്കോട് ബീച്ചില് നടന്ന ചടങ്ങില് എം.വി.ഐ സാജു, റൈഡ് ക്യാപ്റ്റന് മുനീര് ഹുസൈന്, പ്രവീണ് സോമന് സംസാരിച്ചു. തുഷാരഗിരി വെള്ളച്ചാട്ടത്തിന് സമീപം കോടഞ്ചേരി ഗ്രാമപഞ്ചായത്ത് പ്രസിഡണ്ട് അന്നക്കുട്ടി ദേവസ്യയുടെ നേതൃത്വത്തിലുള്ള സംഘം സഞ്ചാരികളെ സ്വീകരിച്ചു. ഫോറസ്റ്റ് ഓഫീസര് ഷാജിവ്, ഡി.ടി.പി.സി ഇക്കോ ടൂറിസം മാനേജര് ഷെല്ലി മാത്യു തുടങ്ങിയവര് സംസാരിച്ചു. ട്രക്കിങ്ങിന് പരിസ്ഥിതി പ്രവര്ത്തകന് ഹാമിദലി വാഴക്കാട്, സാഹില് അരീക്കോട് എന്നിവര് നേതൃത്വം നല്കി.
