ഇരിട്ടി: പട്ടാളക്കാര്‍ക്ക് ഒരു വികാരമേ ഉള്ളൂ, പിറന്ന നാടിനെ സംരക്ഷിക്കുക. പിറന്ന മണ്ണിനെ അമ്മയായി കാണുന്നവരാണ് അവര്‍. അവര്‍ക്കിടയില്‍ ജാതിയോ മതമോ മറ്റ് വേര്‍തിരിവുകളോ ഇല്ല. പ്രശസ്ത സിനിമാ സംവിധായകനും റിട്ട.മേജറുമായ മേജര്‍ രവി പറഞ്ഞു. ഇരിട്ടി പ്രഗതി സര്‍ഗ്ഗോത്സവത്തിന്റെ ഭാഗമായി സംഘടിപ്പിച്ച സാംസ്‌കാരിക സമ്മേളനം വള്ളിയാട് ആശ്വിനികുമാര്‍ നഗറില്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. മതവും ജാതിയും ഒരു ലേബര്‍ റൂമില്‍ നഴ്‌സ് വിചാരിച്ചാല്‍ മാറാവുന്നതേ ഉള്ളൂ. അധികാര കസേരക്ക് വേണ്ടി കടിപിടികൂടുന്നവരാണ് ഇവിടെ ജനങ്ങളെ വേര്‍തിരിച്ചു ജാതിയും മതവും വളര്‍ത്തുന്നത്. മനുഷ്യനെ മനുഷ്യനായി കാണാന്‍ കഴിഞ്ഞാല്‍ ഇവിടെ ഇത്തരം വിഭാഗീയ ചിന്തകളെ നമുക്ക് ഇല്ലാതാക്കാന്‍ കഴിയും. രാജ്യത്തോടുള്ള സ്‌നേഹം എന്നും നമ്മള്‍ മനസ്സില്‍ കൊണ്ട് നടക്കുകയാണെങ്കില്‍ മതം, ജാതി എന്നീ വിഷയങ്ങള്‍ നമ്മില്‍ നിന്നും മറയും. അദ്ദേഹം പറഞ്ഞു.
സമ്മേളനത്തില്‍ കോളേജ് പ്രിന്‍സിപ്പാള്‍ വത്സന്‍ തില്ലങ്കേരി അദ്ധ്യക്ഷത വഹിച്ചു. മുമ്പേ ഭീകരാക്രമണത്തില്‍ ഭീകരരോട് ഏറ്റുമുട്ടി പരിക്കേറ്റ ജവാന്‍ മനേഷ് കുമാര്‍ അഴീക്കോട് മുഖ്യാതിഥി ആയിരുന്നു. പേരാവൂര്‍ പ്രഗതി കോളേജ് പ്രിന്‍സിപ്പല്‍ വി.ശങ്കരന്‍ പുന്നാട്, മുന്‍സിപ്പല്‍ കൗണ്‍സിലര്‍ പി.രഘു എന്നിവര്‍ സംസാരിച്ചു. സതീഷ് മാസ്റ്റര്‍ സ്വാഗതവും കെ.കിരണ്‍ നന്ദിയും പറഞ്ഞു.
രാവിലെ നടന്ന വിളംബര ജാഥയില്‍ കോളേജിലെ രണ്ടായിരത്തി അഞ്ഞൂറോളം വിദ്യാര്‍ഥിനീ വിദ്യാര്‍ഥികള്‍ പങ്കെടുത്തു. പയഞ്ചേരിയില്‍ നിന്നും ആരംഭിച്ച വിളംബര ജാഥ വള്ള്യാട് വയലില്‍ സജ്ജമാക്കിയ അശ്വിനി കുമാര്‍ നഗറില്‍ സമാപിച്ചു. മുത്തുക്കുടകളും വാദ്യമേളങ്ങളും നിരവധി നിശ്ചല ദൃശ്യങ്ങളും ജാഥക്ക് കൊഴുപ്പ് കൂട്ടി. ഇന്ന് നടക്കുന്ന സമാപന പൊതു സമ്മേളനത്തില്‍ പ്രശസ്ത സിനിമാതാരം കുഞ്ചാക്കോ ബോബന്‍, പ്രശസ്ത പാമ്പ് പിടുത്ത വിദഗ്ധന്‍ വാവാ സുരേഷ് എന്നിവര്‍ പങ്കെടുക്കും. ഉച്ചക്ക് ശേഷം ശിവദാസ് മട്ടന്നൂര്‍ അവതരിപ്പിക്കുന്ന മെഗാ കോമഡി ഷോ അരങ്ങേറും.
