കണ്ണൂര്: ജില്ലാ അഗ്രി ഹോര്ട്ടിക്കള്ച്ചറല് സൊസൈറ്റിയുടെ ആഭിമുഖ്യത്തിലുള്ള കണ്ണൂര് പുഷ്പോത്സവത്തിന് കലക്ടറേറ്റ് മൈതാനിയില് (ടൗണ് സ്ക്വയര്) തുടക്കമായി. വൈകിട്ട് 5 മണിക്ക് സൊസൈറ്റി പ്രസിഡന്റുകൂടിയായ ജില്ലാ കലക്ടര് പി ബാലകിരണിന്റെ അധ്യക്ഷതയില് പി കെ ശ്രീമതി ടീച്ചര് എംപി ഉദ്ഘാടനം ചെയ്തു. മികച്ച ജനപങ്കാളിത്തത്തോടെ ഒരു ജനകീയോത്സവമായി മാറാന് കണ്ണൂര് പുഷ്പോത്സവത്തിന് കഴിയുന്നുണ്ടെന്ന് എംപി പറഞ്ഞു. കോര്പറേഷന് മേയര് ഇ പി ലത മുഖ്യാതിഥിയായി. മേയറുടെ ദുരിതാശ്വാസനിധിയിലേക്ക് അഗ്രി ഹോര്ട്ടിക്കള്ച്ചറല് സൊസൈറ്റിയുടെ സംഭാവനയായി 50000 രൂപയുടെ ചെക്ക് സൊസൈറ്റി ട്രഷറര് വി.പി.കിരണ് മേയര്ക്ക് കൈമാറി.
പതിനായിരം ചതുരശ്ര അടി സ്ഥലത്ത് തയ്യാറാക്കിയ ഉദ്യാനം പുഷ്പോല്സവ നഗരിയിലെ പ്രധാന ആകര്ഷണമാണ്. ആറളം ഫാം, കരിമ്പത്തെ ജില്ലാ കൃഷിത്തോട്ടം, മില്മ, റെയ്ഡ്കോ തുടങ്ങിയവയുടെ പവലിയനുകളും ഒരുക്കിയിട്ടുണ്ട്. കേരളത്തില് നിന്നും തമിഴ്നാട്ടില് നിന്നുമുളള നഴ്സറികളുടെ അമ്പതോളം സ്റ്റാളുകളില് വൈവിധ്യമാര്ന്ന സസ്യജാലങ്ങളും പച്ചക്കറിഫലവൃക്ഷ തൈകളും മറ്റു നടീല് വസ്തുക്കളും ഔഷധ സസ്യങ്ങളും മിതമായ നിരക്കില് ലഭ്യമാണ്.
പുഷ്പോത്സവത്തോടനുബന്ധിച്ച് പുഷ്പാലങ്കാരം, വെജിറ്റബിള് കാര്വിങ്ങ്, പാചകം, പോട്ട് പെയിന്റിങ്ങ്, സാലഡ് അറേഞ്ച്മെന്റ്, മൈലാഞ്ചിയിടല്, പുഷ്പറാണി, പുഞ്ചിരി, ഓലമടയല്, കൊട്ടമടയല്, തേങ്ങ പൊതിക്കല്, തേങ്ങ ചിരവല് തുടങ്ങിയ വിവിധ മത്സരങ്ങളും സംഘടിപ്പിച്ചിട്ടുണ്ട്. ജനുവരി 18 ന് വിഷമില്ലാത്ത പച്ചക്കറി വീട്ടുമുറ്റത്ത്, 20 ന് ക്ഷീരവികസന മേഖല പ്രശ്നങ്ങളും പരിഹാരങ്ങളും, 22 ന് ഉറവിട മാലിന്യ നിര്മ്മാര്ജ്ജനംപ്രസക്തിയും പ്രായോഗികതയും എന്നീ വിഷയങ്ങളില് ശില്പശാലകളും സംഘടിപ്പിച്ചിട്ടുണ്ട്. എല്ലാ ദിവസവും വൈകിട്ട് കലാപരിപാടികളുമുണ്ടാവും.
ഉദ്ഘാടനച്ചടങ്ങില് ജില്ല അഗ്രി ഹോര്ട്ടി കള്ച്ചറല് സൊസൈറ്റി സെക്രട്ടറിയും പുഷ്പോത്സവം ജനറല് കണ്വീനറുമായ ബി.പി.റൗഫ്, വൈസ് പ്രസിഡണ്ടുമാരായ ഗൗരി നമ്പ്യാര്, പി.സി.മിത്രന്, ട്രഷറര് വി.പി.കിരണ്, പ്രോഗ്രാം കണ്വീനര് പി.വി.രത്നാകരന് തുടങ്ങിയവര് സംബന്ധിച്ചു.
