കായംകുളം: കൗമാര കലാമാമാങ്കത്തിന് നാളെ തിരി തെളിയും. ഇന്ന് രാവിലെ 11 മുതല്‍ കലോത്സവത്തിലെ മത്സരാര്‍ഥികളുടെ രജിസ്‌ട്രേഷന്‍ നടക്കും. നാളെ രാവിലെ ഒന്‍പതിന് നഗരസഭാ ചെയര്‍മാന്‍ എന്‍.ശിവദാസന്‍ പതാക ഉയര്‍ത്തും. ഉച്ചയ്‌ക്ക് 2.30 ന് ഗവ.ബോയ്‌സ് എച്ച്എസ്എസില്‍ നിന്നും സാംസ്‌കാരിക ഘോഷയാത്ര ആരംഭിക്കും. മാര്‍ക്കറ്റ് റോഡ്, പാര്‍ക്ക് ജങ്ഷന്‍ വഴി പ്രധാന വേദിയില്‍ എത്തിച്ചേരും. ഉപജില്ലയിലെ 22 സ്‌കൂളുകളിലെ വിദ്യാര്‍ഥികള്‍ ഘോഷയാത്രയില്‍ പങ്കെടുക്കും. വൈകിട്ട് നാലിന് നടക്കുന്ന സമ്മേളനം കെ.സി.വേണുഗോപാല്‍ എംപി ഉദ്ഘാടനം ചെയ്യും. ദേശീയ പുരസ്‌കാര ജേതാവ് അമ്പലപ്പുഴ എഇഒ: കെ.പി.കൃഷ്ണദാസിനെ കൊടിക്കുന്നില്‍ സുരേഷ് എംപിയും സംസ്ഥാന അധ്യാപക അവാര്‍ഡ് ജേതാക്കളെ എ.എം.ആരിഫ് എംഎല്‍എയും ആദരിക്കും. സിനിമാതാരം അനൂപ്ചന്ദ്രന്‍ വിശിഷ്ടാതിഥിയായിരിക്കും. എംഎല്‍എമാരായ ജി.സുധാകരന്‍, പി.സി.വിഷ്ണുനാഥ്, ആര്‍.രാജേഷ് എന്നിവര്‍ പങ്കെടുക്കും. നഗരസഭാ ചെയര്‍മാന്‍ എന്‍.ശിവദാസന്‍ അധ്യക്ഷത വഹിക്കും. ഒന്‍പതിന് വൈകിട്ട് നാലിന് സമാപന സമ്മേളനം സി.കെ.സദാശിവന്‍ എംഎല്‍എ ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്റ് ജി.വേണുഗോപാല്‍ അധ്യക്ഷത വഹിക്കും. എംഎല്‍എമാരായ ടി.എം.തോമസ്‌ഐസക്, തോമസ്ചാണ്ടി, ടി.തിലോത്തമന്‍ എന്നിവര്‍ സമ്മാനദാനം നടത്തും. ചുനക്കര ജനാര്‍ദ്ദനന്‍നായര്‍ സുവനീര്‍ പ്രകാശനം നിര്‍വഹിക്കും. ഉപഹാര സമര്‍പ്പണം ആര്‍എംഎസ്എ അഡീഷണല്‍ ഡയറക്ടര്‍ ജിമ്മിജോസ് നിര്‍വഹിക്കും. അഞ്ചു ദിനരാത്രങ്ങളില്‍ 10 വേദികളിലായി നടക്കുന്ന മത്സരങ്ങളില്‍ അപ്പീലുകാര്‍ ഉള്‍പ്പെടെ ആറായിരത്തോളം വിദ്യാര്‍ഥികള്‍ പേര്‍ പങ്കെടുക്കും. കായംകുളം എസ്.എന്‍ വിദ്യാപീഠത്തിലാണ് ഭക്ഷണശാല ക്രമീകരിച്ചിരിക്കുന്നത്. ഇന്ന് വൈകിട്ട് അഞ്ചിന് പാചകപ്പുരയില്‍ പാല്‍ കാച്ചല്‍ നടക്കും. അമ്പലപ്പുഴ സ്വദേശി രാജേഷിന്റെ നേതൃത്വത്തിലാണ് പാചകം ഒരുക്കുന്നത്.
കൗമാരകലാമാമാങ്കത്തിന് നാളെ തിരി തെളിയും
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
ജന്മഭൂമി ഓണ്‍ലൈന്‍© Mathruka Pracharanalayam Limited.
Tech-enabled by Ananthapuri Technologies.