ധര്‍മ്മടം: ധര്‍മ്മടം സ്വാമിക്കുന്ന് സമീപത്തെ നടന്ന ബോംബ് സ്‌ഫോടനത്തെ തുടര്‍ന്ന് കോണ്‍ഗ്രസ് പ്രവര്‍ത്തകര്‍ സജീവന്‍ കൊല്ലപ്പെടാന്‍ ഇടയാക്കിയ സംഭവത്തെക്കുറിച്ച് സമഗ്ര അന്വേഷണം നടത്തണമെന്ന് ബിജെപി ധര്‍മ്മടം മണ്ഡലം കമ്മറ്റി ആവശ്യപ്പെട്ടു. സജീവന്റെ മരണം ബിജെപി, ആര്‍എസ്എസ് പ്രവര്‍ത്തകരുടെ മേല്‍കെട്ടിവെക്കാനുള്ള എംഎല്‍എയുടെയും കോണ്‍ഗ്രസ് നേതാവ് സുനില്‍കുമാറിന്റെയും ശ്രമം പരിഹാസ്യമാണെന്ന് ബിജെപി ധര്‍മ്മടം മണ്ഡലം കമ്മറ്റി പത്രക്കുറിപ്പില്‍ പറഞ്ഞു.
കഴിഞ്ഞ പഞ്ചായത്ത് തെരഞ്ഞെടുപ്പില്‍ ബിജെപി-സിപിഎം പ്രചാരണ ബോര്‍ഡുകള്‍ നശിപ്പിച്ചത് ഈ നേതാവിന്റെ നേതൃത്വത്തിലാണ് എന്ന് നാട്ടുകാര്‍ക്ക് നന്നായി അറിയാം. ബിജെപിയുടെ ആത്മസംയമനമാണ് വലിയ സംഘര്‍ഷമൊഴിവാക്കാന്‍ കാരണം. ബിജെപി-സിപിഎം സംഘര്‍ഷമുണ്ടാക്കി തെരഞ്ഞെടുപ്പില്‍ വിജയിക്കാനുള്ള ശ്രമം പരാജയപ്പെട്ടപ്പോള്‍ വോട്ടെണ്ണലിന് ശേഷം സംഘര്‍ഷമുണ്ടാക്കുന്നതിന്‌വേണ്ടി കോണ്‍ഗ്രസ് നേതൃത്വം കരുതിവെച്ചതാണ് ബോംബുകള്‍. ഈ നേതാവിന്റെ നിര്‍ദ്ദേശപ്രകാരം മാറ്റാന്‍ സജീവനോട് നിര്‍ദ്ദേശിച്ചതിന്റെ അടിസ്ഥാനത്തില്‍ മാറ്റാന്‍ ശ്രമിക്കുമ്പോഴാണ് പൊട്ടിത്തെറിയുണ്ടായതും കൊല്ലപ്പെടാന്‍ ഇടയായതും. ശവസംസ്‌കാരത്തിന് ശേഷം ഒരു അനുശോചനയോഗം പോലും ചേരാന്‍ കോണ്‍ഗ്രസ് നേതൃത്വം തയ്യാറാകാത്തതിലും ദുരൂഹതയുണ്ട്.
ത്രിതല പഞ്ചായത്ത് തെരഞ്ഞെടുപ്പിന് ശേഷം ആ ഭാഗത്തേക്ക് നാട്ടുകാരെ കടത്തി വിടാന്‍ സിപിഎമ്മുകാര്‍ തയ്യാറായില്ല. വഴിയില്‍ കയര്‍കെട്ടി നാട്ടുകാരെയും മറ്റുള്‌ഴവരെയും തടയുകയായിരുന്നു. പോലീസില്‍ പരാതിപ്പെട്ടതിന് ശേഷമാണ് വഴി തുറന്ന് കൊടുത്തത്. കണ്ണൂര്‍ പോളിയിലെ ക്രമിനല്‍ വിദ്യാര്‍ത്ഥിയടക്കം നിരവധി ക്രിമിനലുകള്‍ക്ക് ഒളിത്താവളമാണ് സിപിഎമ്മിന്റെ നേതൃത്വത്തില്‍ ഇവിടെ ഉണ്ടായിരുന്നത് എന്നാണ് ജനസംസാരം. ഇത് നാട്ടുകാര്‍ പരസ്യമായി തന്നെ പറയുന്നുമുണ്ട്. ബിജെപി-ആര്‍എസ്എസ് പ്രവര്‍ത്തകര്‍ വൈകുന്നേരം നാട്ടുകാരുടെ കൂടെ പന്തുകളിക്കുന്നതിന്റെ പേരില്‍ തെങ്ങിന്‍തോപ്പിന്റെ ഇടയില്‍ കോണ്‍ഗ്രസ്, സിപിഎം നേതാക്കള്‍ ഇടപെട്ട് തെങ്ങിന്‍ തൈ നട്ടുപിടിപ്പിച്ചതും ഈ പ്രദേശത്ത് ജനങ്ങള്‍ ചര്‍ച്ചചെയ്യുന്നു. വസ്തുതകള്‍ ഇതായിരിക്കെ സ്‌ഫോടനത്തിന്റെയും കൊലപാതകത്തിന്റെയും ഉത്തരവാദിത്വം ബിജെപി-ആര്‍എസ്എസ് സംഘടനകളുടെ മേല്‍ ചാരി തെറ്റിദ്ധാരണ പരത്തി ജനവികാരത്തില്‍ നിന്നും രക്ഷപ്പെടാനുള്ള ശ്രമം അനുവദിക്കില്ലെന്നും, മുഴുവന്‍ കുറ്റക്കാരെയും മുഖം നോക്കാതെ നിയമത്തിന്റെ മിമ്പില്‍ കൊണ്ടുവരണമെന്നും അല്ലാത്തപക്ഷം ശക്തമായ പ്രക്ഷോഭത്തിന് ബിജെപി നേതൃത്വംകൊടുക്കുമെന്നും ധര്‍മ്മടം മണ്ഡലം കമ്മറ്റി ആവശ്യപ്പെട്ടു. യോഗത്തില്‍ മണ്ഡലം പ്രസിഡണ്ട് ആര്‍.കെ.ശശിധരന്‍, ജനറല്‍സെക്രട്ടറി ഹരീഷ് ബാബു, പി.ആര്‍.രാജന്‍ തുടങ്ങിയവര്‍ സംസാരിച്ചു.
