കൂടാളി: ഭാരതീയ സംസ്കാരം ഉള്ക്കൊള്ളുന്നവരുടെ വോട്ട് ബാങ്ക് ശക്തമായാലേ ഭാരതത്തിന്റെ സുരക്ഷ ഉറപ്പിക്കനാകുകയുള്ളൂ എന്ന് ഹിന്ദു ഐക്യവേദി സംസ്ഥാന ജനറല് സെക്രട്ടറി കെ.പി.ഹരിദാസ് പ്രസ്താവിച്ചു. കഴിഞ്ഞ 19 മുതല് കൂടാളി ഹയര്സെക്കണ്ടറിയില് നടന്നുവരുന്ന രാഷ്ട്രീയ സ്വയംസേവകസംഘം വിദ്യാര്ത്ഥികളുടെ പ്രാഥമിക ശിക്ഷാവര്ഗ്ഗിന്റെ സമാപനത്തോടനുബന്ധിച്ചുള്ള പൊതുപരിപാടിയില് മുഖ്യ പ്രഭാഷണം നടത്തുകയായിരുന്നു അദ്ദേഹം. സനാതന ധര്മ്മം നിലനിന്നാല് മാത്രമേ ഭാരതം നിലനില്ക്കുകയുള്ളൂ. ധര്മ്മം നശിച്ചാല് ഭാരതം നശിക്കും. ധര്മ്മം നശിക്കാതിരിക്കാന് ഭാരതീയ സംസ്കാരം ഉള്ക്കൊള്ളുന്നവരുടെ വോട്ടുബാങ്ക് ഉണ്ടാകണമെന്നും അദ്ദേഹം അഭിപ്രായപ്പെട്ടു. അത്തരത്തിലുള്ള ഒരു ജനശക്തിക്കുമാത്രമേ ലോകത്തിന്റെ മുഴുവന് സുഖത്തിനും വേണ്ടി പ്രാര്ത്ഥിക്കാന് സാധിക്കുകയുള്ളൂ. 1983ലെ വിശാല ഹിന്ദു സമ്മേളനത്തിന്റെ ലക്ഷ്യം പൂര്ത്തീകരിക്കേണ്ട സാഹചര്യമാണ് ഇന്ന് കേരളത്തില് നിലനില്ക്കുന്നത്. സജ്ജന ശക്തി സമാഹരണത്തിലൂടെ സംഘപ്രസ്ഥാനങ്ങള്ക്ക് നേരെയുള്ള കുപ്രചരണങ്ങള്ക്ക് മറുപടി പറയണമെന്നും അദ്ദേഹം പറഞ്ഞു. ആരോടും വെറുപ്പും വിദ്വേഷവും ഇല്ലാത്തവരും ജനങ്ങളുടെ സുഹൃത്തും വഴികാട്ടിയും അധ്യാപകനും സാമൂഹ്യ മാറ്റത്തിന് വേണ്ടി പ്രവര്ത്തിക്കുന്നവരുമാകണം സ്വയംസേവകരെന്നും പണ്ഡിറ്റ് ദീനദയാല് ഉപാധ്യായജിയുടെ വാക്കുകള് സദാ നാം ഓര്മ്മിക്കണമെന്നും അദ്ദേഹം പറഞ്ഞു.
ചടങ്ങില് കേരള ഗ്രാമീണ്ബേങ്ക് റിട്ട.ചീഫ് മാനേജര് പി.ദേവീദാസന് അധ്യക്ഷത വഹിച്ചു. വര്ഗ്ഗ് കാര്യവാഹ് ഡോ.പി.രാജേഷ് സ്വാഗതം പറഞ്ഞു. പി.കെ.അരവിന്ദാക്ഷന് സന്നിഹിതനായിരുന്നു. ഇതോടനുബന്ധിച്ച് ശിബിരാര്ത്ഥികളുടെ പഥസഞ്ചലനവും കായിക പ്രദര്ശനവും നടന്നു.
