കോഴിക്കോട്: ചിന്മയ യുവക് കേന്ദ്രത്തിന്റെ ആഭിമുഖ്യത്തില് നാളെ നഗരത്തില് മിനി മാരത്തോണ് നടക്കും. ‘ഞാന് ഭാരതത്തിനുവേണ്ടി, ചെന്നൈക്ക് വേണ്ടി ഓടും’ എന്ന മുദ്രാവാക്യമുയര്ത്തി ചെന്നൈ മഴ പ്രളയത്തില് കെടുതികളനുഭവിക്കുന്നവര്ക്ക് സഹായം നല്കാനാണ് മിനി മാരത്തോണ് സംഘടിപ്പിച്ചിരിക്കുന്നതെന്ന് സംഘാടകര് വാര് ത്താസമ്മേളനത്തില് പറഞ്ഞു. ചിന്മയ വിദ്യാലയത്തില് നിന്നാരംഭിച്ച് അരയിടത്ത് പാലം മേല്പ്പാലം, മൊഫ്യൂസില് ബസ് സ്റ്റാന്റ്, കെഎസ്ആര്ടിസി, ബാങ്ക് റോഡ്, സി.എച്ച് ഓവര് ബ്രിഡ്ജ്, റെഡ് ക്രോസ് റോഡ് വഴി കോഴിക്കോട് കടപ്പുറത്ത് മാരത്തോണ് സമാപിക്കും.
രാവിലെ 7 നാണ് 5 കി. മീറ്റര് മാരത്തോണിന്റെ തുടക്കം. കലക്ടര് എന്. പ്രശാന്ത് ഫ്ളാഗ് ഓഫ് ചെയ്യും. ചെന്നൈ ചിന്മയ മിഷന് ആചാര്യന് സ്വാമി മിത്രാനന്ദ മാരത്തോണിന് നേതൃത്വം നല്കും. ചെന്നൈ ദുരിതാശ്വാസത്തിനായി ചിന്മയ യുവക് കേന്ദ്ര പ്രവര്ത്തകര് ധനശേഖരണം നടത്തും. വാര്ത്താ സമ്മേളനത്തില് ചിന്മ മിഷന് ട്രസ്റ്റി വി.യു ഏറാടി, ആര്. ജയന്ത്കുമാര്, ചിന്മയ യുവ കേന്ദ്ര സംസ്ഥാന കോ-ഓര്ഡിനേറ്റര് സുജിത് എം. നായര്, കണ്വീനര് ആര്. ജയകൃഷ്ണന് എന്നിവര് പങ്കെടുത്തു. മിനി മാരത്തോണില് പങ്കെടുക്കാനാഗ്രഹിക്കുന്നവര്ക്ക് 9961535470, 9495170607 എന്നീ നമ്പറുകളില് ബന്ധപ്പെടാം.
