കോഴിക്കോട്:പാര്‍ശ്വവത്കരിക്കപ്പെട്ട ജനവിഭാഗങ്ങളുടെ നീതിക്കു വേണ്ടി അഹോരാത്രം പ്രവര്‍ത്തിച്ച ജസ്റ്റിസ് വി.ആര്‍ കൃഷ്ണയ്യര്‍ മനുഷ്യത്വത്തിന്റെ ആള്‍രൂപമായിരുന്നുവെന്ന് ഗവര്‍ണര്‍ ജസ്റ്റിസ് പി സദാശിവം അഭിപ്രായപ്പെട്ടു. കൊയിലാണ്ടി ഗവ. വൊക്കേഷണല്‍ ഹയര്‍ സെക്കന്ററി സ്‌കൂളില്‍ കെ.ദാസന്‍ എം.എല്‍.എയുടെ ആസ്തി വികസന ഫണ്ട് ഉപയോഗിച്ച് നിര്‍മിച്ച ജസ്റ്റിസ് വി.ആര്‍ കൃഷ്ണയ്യര്‍ സ്മാരക കെട്ടിടത്തിന്റെ ഉദ്ഘാടനവും അദ്ദേഹത്തിന്റെ ഛായാചിത്രഅനാഛാദനവും നിര്‍വഹിക്കുകയായിരുന്നു അദ്ദേഹം. മനുഷ്യത്വപരമായ നീതിന്യായങ്ങള്‍ക്കുവേണ്ടി പ്രവര്‍ത്തിച്ച വി.ആര്‍ കൃഷ്ണയ്യരുടെ പല കാഴ്ചപ്പാടുകളും കര്‍മമണ്ഡലത്തില്‍ പിന്തുടര്‍ന്നിട്ടുണ്ടെന്നും ജയില്‍ നവീകരണം, കുറ്റവാളികളുടെ പുനരധിവാസം എന്നീ കാര്യങ്ങളില്‍ അദ്ദേഹം സ്വീകരിച്ച കണിശത പിന്തുടരേണ്ടതാണെന്നും അദ്ദേഹം പറഞ്ഞു.
തമിഴ്‌നാട്ടിലെ ഉള്‍നാടന്‍ സര്‍ക്കാര്‍ സ്‌കൂളിലെ തന്റെ പഠനാനുഭവങ്ങള്‍ പങ്കുവെച്ച ഗവര്‍ണര്‍ ഗവ. സ്‌കൂളുകളിലെ ഭൗതിക സാഹചര്യം മെച്ചപ്പെടുത്തേണ്ടതിന്റെ ആവശ്യകത ഊന്നിപ്പറഞ്ഞു. തൊഴിലില്ലായ്‌മയ്‌ക്ക് പരിഹാരം കാണാന്‍ വൊക്കേഷണല്‍ സ്‌കൂളുകള്‍ക്ക് സാധിക്കണമെന്നും മികവുറ്റ വിദ്യാര്‍ത്ഥികളെ സൃഷ്ടിക്കാന്‍ ലൈബ്രറി, ഓഡിറ്റോറിയം തുടങ്ങിയ ഭൗതികസാഹചര്യങ്ങളൊരുക്കേണ്ടത് അനിവാര്യമാണെന്നും ഇക്കാര്യത്തില്‍ ജനപ്രതിനിധികള്‍ കൂടുതല്‍ ശ്രദ്ധിക്കണമെന്നും അദ്ദേഹം പറഞ്ഞു.
കെ.ദാസന്‍ എം.എല്‍.എ അധ്യക്ഷത വഹിച്ച ചടങ്ങില്‍ കെട്ടിടത്തിന്റെ നിര്‍മ്മാണം പൂര്‍ത്തിയാക്കിയ യു.എല്‍.സി.സി പ്രസിഡന്റ് രമേശന്‍ പാലേരിക്ക് ഗവര്‍ണര്‍ ഉപഹാരം നല്‍കി. കൊയിലാണ്ടി നഗരസഭാ ചെയര്‍മാന്‍ അഡ്വ. കെ സത്യന്‍, പി.ഡബ്ല്യു.ഡി എക്‌സി.എഞ്ചിനീയര്‍ പി.ഗോകുല്‍ദാസ്, മുന്‍ എം.എല്‍.എ പി.വിശ്വന്‍, യു.കെ ചന്ദ്രന്‍ എച്ച്.എസ്.ഇ ആര്‍.ഡി.ഡി ഗോകുലകൃഷ്ണന്‍, യു. രാജീവന്‍, കെ.ഷിജു, സി.കെ വാസു, പി.വത്സല എന്നിവര്‍ സംസാരിച്ചു.
