മുല്ലപ്പെരിയാര്‍: സ്വീപ്പേജ് വെളളത്തിന്റെ അളവില്‍ വന്‍ വര്‍ദ്ധന

കുമളി: മുല്ലപ്പെരിയാര്‍ അണക്കെട്ടിലെ സ്വീപ്പേജ് വെളളത്തിന്റെ അളവില്‍ വന്‍ വര്‍ദ്ധനയുളളതായി കണ്ടെത്തി. ഇന്നലെ മുല്ലപ്പെരിയാര്‍ ഉപസമിതിയംഗങ്ങള്‍ നടത്തിയ പരിശോധനയിലാണ് 161.059 ലിറ്റര്‍ വെള്ളമാണ് സ്വീപ്പേജ് വഴി ഒഴുകുന്നതെന്ന് കണ്ടെത്തിയിരിക്കുന്നത്. എക്കാലത്തെയും കൂടുതല്‍ വെളളമാണ് ചോരുന്നത്. കേരളത്തിന്റെ മൂന്ന് പ്രതിനിധികളും തമിഴ് നാടിന്റെ ഒരു പ്രതിനിധിയുമാണ് മുല്ലപ്പെരായര്‍ അണക്കെട്ട് സന്ദര്‍ശിച്ചത്.ഒന്നാം മൈലില്‍ മുല്ലപ്പെരിയാര്‍ ഓഫിസില്‍ നടന്ന യോഗത്തില്‍ ജലവിഭവ വകുപ്പ് എക്‌സിക്യൂട്ടീവ് എന്‍ജിനീയര്‍ ജോര്‍ജ് ഡാനിയലിനെ കഴിഞ്ഞ 8,9 തീയതികളില്‍ നടന്ന ഉപസമിതി ഡാം സന്ദര്‍ശനത്തില്‍ ഗാലറിയില്‍ ഇറങ്ങുന്നതിനും കൂടുതല്‍ സമയം ചിലവഴിക്കുന്നതിലും തമിഴ്‌നാട് എതിര്‍പ്പ് പ്രകടിപ്പിച്ചതില്‍ കേരളം പ്രതിഷേധംഅറിയിച്ചു. തേക്കടിയിലെ വന പ്രദേശമായ മുല്ലക്കുടി ഭാഗത്തുളള ജലനിരപ്പിന്റെ അളവ് തമിഴ് നാടിന് വേണമെന്ന ആവശ്യം വനം വകുപ്പിന്റെ സഹായത്തോടെ കേരളം തമിഴ് നാടിന് കൈമാറും. നിലവിലെ ജലനിരപ്പ് 141.24 അടിയാണ്. അണക്കെട്ടിലേക്ക് ഒഴുകിയെത്തുന്ന ജലത്തിന്റെ അളവ് 1636 ഘനയടിയും തമിഴ്‌നാട് കൊണ്ട് പോകുന്ന വെളളത്തിന്റെ അളവ് 2100 ഘനയടിയുമാണ്.അടുത്തമാസം വീണ്ടും ഉപസമിതി യോഗം ചേരും.