കണ്ണൂര്‍: യുദ്ധം ജനങ്ങളില്‍ ഒരു പ്രത്യേക മാനസികാവസ്ഥ രൂപപ്പെടുത്തുമെന്നും യുദ്ധത്തിന്റെ ഭീകരത പറഞ്ഞറിയിക്കാനാകാത്തതാണെന്നും ആര്‍എസ്എസ് പ്രാന്തീയ സഹസംഘചാലക് അഡ്വ.കെ.കെ.ബല്‍റാം അഭിപ്രായപ്പെട്ടു. അഖില ഭാരതീയ പൂര്‍വ്വ സൈനിക സേവാപരിഷത്ത് കണ്ണൂര്‍ ജില്ലാ കമ്മിറ്റി തെക്കീബസാര്‍ ഗുരുഭവനില്‍ സംഘടിപ്പിച്ച ഇന്ത്യാ-പാക് യുദ്ധ വിജയദിനാഘോഷം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. 1971ല്‍ നടന്ന ഇന്ത്യാ-പാക് യുദ്ധം ലോകചരിത്രത്തില്‍തന്നെ രേഖപ്പെടുത്തിയ ഒന്നാണ്. ഈ യുദ്ധം ഉണ്ടാക്കിയ പരിവര്‍ത്തനം വളരെ വലുതാണ്. ഇതിന്റെ പരിണിത ഫലമായി ഒരു രാഷ്‌ട്രംതന്നെ രൂപംകൊണ്ടു. ഭാരതത്തിന്റെ അഖണ്ഡതയും ഐക്യവുമാണ് 13 ദിവസം നീണ്ട യുദ്ധത്തില്‍ ഭാരതത്തിന് ജയം കൈവരിക്കാന്‍ കാരണമായത്. യുദ്ധത്തില്‍ ഭാരതീയര്‍ ഒരുമിച്ച് അണിനിരന്നു എന്നത് ഭാരതത്തിന്റെ പ്രത്യേകതയാണ്. യുദ്ധത്തില്‍ പിടിയിലായ 90000 പാക് പട്ടാളക്കാരെ മാന്യമായാണ് ഇന്ത്യ വിവിധ ഭാഗങ്ങളില്‍ പാര്‍പ്പിച്ചത്. യുദ്ധാനന്തരം ഇന്ത്യയിലേക്കെത്തിയ ഒരു കോടിയോളം അഭയാര്‍ത്ഥികള്‍ക്ക് അഭയം നല്‍കാനും ഭാരതം മടിച്ചില്ലെന്നും ഇത്രയേറെ പരിവര്‍ത്തനങ്ങള്‍ക്കിടയാക്കിയ ഈ യുദ്ധത്തിന്റെ വിജയദിനം ആചരിക്കേണ്ടത് ആവശ്യമാണെന്നും അദ്ദേഹം പറഞ്ഞു. ഇത്തരം യുദ്ധങ്ങള്‍ ഉണ്ടായതും അതുണ്ടാക്കിയ പരിവര്‍ത്തനങ്ങളും സംബന്ധിച്ച് ക്ലാസ്സുകള്‍ തന്നെ സംഘടിപ്പിക്കേണ്ടതുണ്ടെന്നും അദ്ദേഹം ഓര്‍മ്മപ്പെടുത്തി. ചടങ്ങില്‍ ജില്ലാ സൈനികക്ഷേമ ഓഫീസര്‍ ജോഷി ജോസഫ് അദ്ധ്യക്ഷത വഹിച്ചു. സൈനിക പരിഷത്തിന്റെ പ്രവര്‍ത്തനങ്ങള്‍ എന്നും പ്രശംസിക്കത്തക്ക തരത്തിലുള്ളതാണെന്നും ഇനിയും ഇത്തരം പ്രവര്‍ത്തനങ്ങള്‍ ഉണ്ടാകണമെന്നും അദ്ദേഹം ഓര്‍മ്മപ്പെടുത്തി. ജില്ലാ പ്രസിഡന്റ് പി.ആര്‍.രാജന്‍ സ്വാഗതം പറഞ്ഞു. അഖില വിപിന്‍ വന്ദേമാതരം ആലപിച്ചു.
സൈനിക പരിഷത്തിന്റെ കണ്ണൂര്‍ അശോകാ ആശുപത്രിക്ക് സമീപം ആരംഭിച്ച പുതിയ ഓഫീസ് സംഘടനാ രക്ഷാധികാരി പി.വി.ഡി.നമ്പാര്‍ ഉദ്ഘാടനം ചെയ്തു. തുടര്‍ന്ന് നടന്ന സംഘടനാ ജില്ലാ സമ്മേളനം പൂര്‍വ്വ സൈനിക സേവാപരിഷത്ത് സംസ്ഥാന പ്രസിഡന്റ് റിട്ട.കേണല്‍ രാംദാസ് ഉദ്ഘാടനം ചെയ്തു. ജില്ലാ പ്രസിഡന്റ് പി.ആര്‍.രാജന്‍ അദ്ധ്യക്ഷത വഹിച്ചു. പിഎസ്എസ്പി സംസ്ഥാന ഓര്‍ഗനൈസിംഗ് സെക്രടട്‌റി സേതുമാധവന്‍ പ്രഭാഷണം നടത്തി. ജില്ലാ സെക്രട്ടറി സ്വാഗതം പറഞ്ഞു. സൈന്യമാതൃശക്തി സംസ്ഥാന സെക്രട്ടറി സാവിത്രി മോഹനന്‍ ആശംസയും പിഎസ്എസ്പി ജില്ലാ ട്രഷറര്‍ കെ.ശശിധരന്‍ നന്ദിയും പ്രകാശിപ്പിച്ചു.
