തുറവൂര്‍: പിഎസ്‌സി റാങ്ക് ലിസ്റ്റില്‍ നിന്ന് നിയമനം നടത്താത്തത് ഉദ്യോഗാര്‍ത്ഥികളെ ദുരിതത്തിലാക്കുന്നു. 2011 നവംബറില്‍ പിഎസ്‌സി നടത്തിയ കെഎസ്ഇബി മസ്ദൂര്‍ തസ്തികയിലേക്കുളള റാങ്ക് ലിസ്റ്റില്‍ ഉള്‍പ്പെട്ട ഉദ്യോഗാര്‍ത്ഥികളെയാണ് കാലാവധി അവസാനിക്കാറായിട്ടും നിയമനം നല്‍കാതെ വലയ്‌ക്കുന്നതെന്നാണ് ആക്ഷേപം.
അടിസ്ഥാന വിദ്യാഭ്യാസം മാത്രമുള്ള ഇവര്‍ക്ക് മറ്റൊരു ജോലിക്കും അപേക്ഷിക്കാന്‍ യോഗ്യതയില്ലാത്തവരാണെന്നും പട്ടികയിലുള്‍പ്പെട്ടവര്‍ ചൂണ്ടിക്കാട്ടുന്നു. മാത്രമല്ല ഇവരില്‍ ഭൂരിഭാഗത്തിന്റേയും പ്രായപരിധി കഴിയാറായവരാണ്. 1996-1997കാലഘട്ടത്തില്‍ അന്‍പതു ലക്ഷം ഉപഭോക്താക്കള്‍ക്ക് ഇരുപത്തെണ്ണായിരം ജീവനക്കാരാണ് ഉണ്ടായിരുന്നത്. 2015-ആയപ്പോഴേക്കും ഉപഭോക്താക്കളുടെ എണ്ണം ഒരു കോടി പതിനഞ്ചു ലക്ഷമായി വര്‍ധിച്ചെങ്കിലും ജീവനക്കാരുടെ എണ്ണത്തില്‍ മാത്രം വര്‍ധനവുണ്ടായില്ല.
നിലവിലുള്ള ജീവനക്കാരുടെ മേല്‍ അമിത ജോലിഭാരം അടിച്ചേല്‍പ്പിച്ചാണ് ബോര്‍ഡ് ജീവനക്കാരുടെ കുറവു നികത്തുന്നത്. എന്നാല്‍ ഉപഭോക്താക്കള്‍ക്കുണ്ടാകുന്ന ചെറിയ പ്രശ്‌നങ്ങള്‍ പരിഹരിക്കുന്നതില്‍ പോലും വലിയകാലതാമസമാണ് ഇതുമൂലമുണ്ടാകുന്നത്. സംസ്ഥാനത്താകെ ഏഴായിരത്തി ഒരുന്നൂറ്റി മുപ്പത് വര്‍ക്കര്‍മാരുടെ ഒഴിവുകളാണ് റിപ്പോര്‍ട്ട് ചെയ്തിട്ടുള്ളത്.
കാലാവധി അവസാനിക്കാന്‍ കേവലം പത്തുമാസം മാത്രം അവശേഷിക്കുന്ന ഈ റാങ്ക് ലിസ്റ്റില്‍ നിന്ന് നിയമനം നടത്തിയാല്‍ പട്ടികയിലുള്‍പ്പെട്ടിട്ടുള്ള മുഴുവന്‍ പേര്‍ക്കും നിയമനം ലഭിക്കുമെന്നും ഉദ്യോഗാര്‍ത്ഥികള്‍ ചൂണ്ടിക്കാട്ടി.
റാങ്ക് ലിസ്റ്റിന്റെകാലാവധി അവസാനിക്കുന്നതോടെ വന്‍ തുക കോഴവാങ്ങി പിന്‍ വാതില്‍ നിയമനം നടത്തുകയെന്ന രഹസ്യ അജണ്ടയാണ് നിയമന നടപടികള്‍ വൈകിപ്പിക്കുന്നതിനു പിന്നിലെന്ന് ആരോപണമുണ്ട്. റിപ്പോര്‍ട്ട് ചെയ്യപ്പെട്ട ഒഴിവുകളില്‍ അടിയന്തരമായി നിയമനം നടത്തിയില്ലെങ്കില്‍ മുഴുവന്‍ ഉദ്യോഗാര്‍ത്ഥികളും കുടുംബ സമേതം സമരത്തിനിറങ്ങുമെന്ന് അവര്‍ മുന്നറിയിപ്പു നല്കി.
