കണ്ണൂര്: അഖില കേരള തന്ത്രി സമാജം ഉത്തര മേഖലാ ഘടകത്തിന്റെ ആസ്ഥാന മന്ദിര സമര്പ്പണ വാര്ഷികത്തോടനുബന്ധിച്ച് കൊളത്തൂര് അദ്വൈതാശ്രമം മഠാധിപതി സ്വാമി ചിദാനന്ദപുരിയുടെ ആര്ഷ ജ്ഞാന സദസ്സ് നടക്കും. മലബാര് ദേവസ്വം പ്രസിഡണ്ട് സജീവ് മാറോളി സമ്മേളനം ഉദ്ഘാടനം ചെയ്യും. തന്ത്രി സമാജം ഉത്തര മേഖലാ ഘടകത്തിന്റെ മൂന്നാമത് വാര്ഷിക ആഘോഷത്തിന്റെ ഭാഗമായാണ് ചിദാനന്ദപുരി സ്വാമികളുടെ നേതൃത്വത്തിലുള്ള വിചാര സദസ്സ് സംഘടിപ്പിച്ചിട്ടുള്ളത്. കണ്ണൂര് കക്കാട് ചേനോളി ഗുരു ഭഗവതി ക്ഷേത്രപരിസരത്താണ് പരിപാടികള് നടക്കുക. വൈകുന്നേരം മൂന്നരയ്ക്ക് സാംസ്കാരിക സമ്മേളനം നടക്കും. സംസ്ഥാന മുന്നോക്ക ക്ഷേമ കോര്പ്പേറേഷന് ഡയറക്ടര് എം.പി.മുരളി സംസാരിക്കും.
കാലത്ത് സൂര്യകാലടി സൂര്യന് പരമേശ്വരന് ഭട്ടതിരിപ്പാടിന്റെ കാര്മ്മികത്വത്തില് മഹാഗണപതി ഹോമം, വേഴപ്പറമ്പ കൃഷ്ണന് നമ്പൂതിരിപ്പാടിന്റെ കാര്മ്മികത്വത്തില് മഹാമൃത്യുഞ്ജയഹോമം, ചെട്ടിക്കുളങ്ങര ഭഗവതി ക്ഷേത്രം തന്ത്രി പ്ലാക്കുടി ഉണ്ണികൃഷ്ണന് നമ്പൂതിരിയുടെ കാര്മ്മികത്വത്തില് നവഗ്രഹ പൂജ, വേദ ജപം എന്നിവയും നടക്കും. തുടര്ന്ന് നടക്കുന്ന ആചാര്യ സംഗമത്തില് കേരളത്തിലെ വിവിധ മഹാക്ഷേത്രങ്ങളിലെ താന്ത്രിക പ്രമുഖരെ ആദരിക്കും.
