കോട്ടയം: സംസ്ഥാനത്തെ ദേവസ്വം ബോര്ഡിന് കീഴിലുള്ള ക്ഷേത്ര ഭരണം ഹിന്ദുക്കളെ തിരിച്ചേല്പ്പിക്കണമെന്ന് ഹിന്ദുഐക്യവേദി സംസ്ഥാന ജനറല് സെക്രട്ടറി ഇ.എസ്. ബിജു ആവശ്യപ്പെട്ടു.
കോട്ടയം ജില്ലാ സമിതി കാര്യാലയത്തില് ചേര്ന്ന ഹിന്ദുഐക്യവേദി ജില്ലാ സമ്പൂര്ണ്ണ സമിതിയോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഹിന്ദുക്കളുടെ ആരാധനാലയം മാത്രം സര്ക്കാര് നിയന്ത്രണത്തില് നിലനിര്ത്തുന്നത് നീതീകരിക്കാന് കഴിയില്ല. അഴിമതി കഥകളും കയ്യിട്ടുവാരലും കെടുകാര്യസ്ഥതയും നിറഞ്ഞ ദേവസ്വം ബോര്ഡുകള് ഹിന്ദുക്കള്ക്ക് ആവശ്യമില്ല. തിരുവിതാംകൂര് ദിവാന് കേണല് മണ്ട്രോ ഏകപക്ഷീയമായി ഏറ്റെടുത്ത ക്ഷേത്രങ്ങളും സ്വത്തുക്കളും ദേവസ്വം ബോര്ഡ് രൂപീകരിച്ച് അതിന്റെ കീഴിലാക്കുകയാണ് ചെയ്തത്. ഏകാധിപത്യ ഭരണ ക്രമങ്ങള് നടപ്പിലാക്കിയ വൈദേശിക ഭരണ കര്ത്താക്കളുടെ നടപടി ക്രമങ്ങള് ജനാധിപത്യ സര്ക്കാര് തുടരുന്നത് ശരിയല്ല. ദേവസ്വം സ്വത്തുവകകള് ഏറ്റെടുത്തതിന്റെ പേരില് വാര്ഷികാശനമായി നല്കിവരുന്ന തുക പോലും സര്ക്കാര് ഗ്രാന്റായും ഔദാര്യമായും പ്രഖ്യാപിക്കുന്ന ദേവസ്വം മന്ത്രി ഹിന്ദുക്കളെ അവഹേളിക്കുകയാണ്. ദേവസ്വം ഫണ്ട് വിനിയോഗം ഓഡിറ്റിന് വിധേയമാക്കാതെ ദേവസ്വം സ്വത്ത് ധുര്വിനിയോഗം ചെയ്യുകയാണ്. കഴിഞ്ഞ 5 വര്ഷത്തെ ദേവസ്വം ബോര്ഡിന്റെ ധനവിനിയോഗം സംബന്ധിച്ച് ധവളപത്രം ഇറക്കണമെന്നും ഇ.എസ്. ബിജു ആവശ്യപ്പെട്ടു.
ജില്ലാ പ്രസിഡന്റ് കെ.കെ. തങ്കപ്പന് അദ്ധ്യക്ഷത വഹിച്ച യോഗത്തില് സംസ്ഥാന രക്ഷാധികാരി കെ.എന്. രവീന്ദ്രനാഥ്, സംസ്ഥാന വൈസ് പ്രസിഡന്റ് പി.ആര്. ശിവരാജന്, സംസ്ഥാന സെക്രട്ടറി ആര്.എസ്. അജിത്, ബിന്ദുമോഹന്, പി. പ്രസാദ്, ആര്. ഹരിലാല്, തമ്പിപട്ടാശ്ശേരി, കെ.എസ്. ഓമനക്കുട്ടന്, കണ്ണന് ചോറ്റി, വി.ടി. രാജു എന്നിവര് പ്രസംഗിച്ചു.
