കടുത്തുരുത്തി: കഞ്ചാവ്, മയക്കുമരുന്ന് മാഫിയയിക്കെതിരെ പ്രവര്ത്തിക്കാന് ഗ്രാമീണ പോലീസ് കമ്മിറ്റി രൂപീകരിച്ചു. മാഞ്ഞൂര് പഞ്ചായത്തിലെ ചാമക്കാലയിലാണ് ഒരുഗ്രാമം കേന്ദ്രീകരിച്ച് ഗ്രാമീണ പോലീസ് കമ്മിറ്റിക്ക് രൂപം നല്കിയത്. ഗ്രാമത്തില് നടക്കുന്ന സംഭവങ്ങള് പോലീസിന്റെ ശ്രദ്ധയില് കൊണ്ടുവരിക, അപരിചിതരായവര് ഒറ്റയ്ക്കും കൂട്ടായും താമസിക്കുകയാണെങ്കില് ഇക്കാര്യം പരിശോധിക്കുക, ലഹരിമാഫിയായുടെ പ്രവര്ത്തനങ്ങള് കണ്ടെത്തുകയും വിവരങ്ങള് പോലീസിന് കൈമാറുകയും ചെയ്യുക എന്നതും ഗ്രാമീണ പോലീസ് കമ്മിറ്റിയുടെ പ്രധാന ചുമതലകളാണ്. ഗ്രാമത്തില് പോലീസുമായി ബന്ധപ്പെട്ട് എന്ത് സഹായങ്ങളും ജനകീയ കമ്മിറ്റിയില് നിന്നും നാട്ടുകാര്ക്ക് ലഭ്യമാകും.
ചാമക്കാലാ പ്രദേശത്ത് ലബരി മാഫിയ പിടിമുറുക്കിയതോടെ ഇവര്ക്കെതിരെ ശക്തമായ പ്രതിരോധത്തിന് നാട്ടുകാര് സംഘടിച്ച് കഴിഞ്ഞദിവസം ജനകീയ കമ്മിറ്റിക്ക് രൂപം നല്കിയിരുന്നു. ഇതിന്റെ തുടര്ച്ചയായിട്ടാണ് ഗ്രാമീണ പോലീസ് കമ്മിറ്റിക്ക് രൂപം നല്കിയതെന്ന് വാര്ഡ് മെമ്പര് ബിനോയ് ഇമ്മാനുവേല് പറഞ്ഞു.
