വൈക്കം: മത്സ്യഫെഡിന്റെ പബ്ലിക്ക് അക്വേറിയം വൈക്കത്തഷ്ടമിക്ക് എത്തുന്നവര്ക്ക് കൗതുകമാകുന്നു. മത്സ്യഫെഡും വൈക്കം നഗര സഭയും സഹകരിച്ച് ബോട്ടു ജട്ടിക്കു സമീപം സ്ഥാപിച്ചിരിക്കുന്ന അക്വേറിയം കാണാന് നൂറുകണക്കിന് ആളുകളാണ് എത്തുന്നത്. അലങ്കാര മത്സ്യകൃഷി പ്രോല്സാഹിപ്പിക്കുക എന്ന ലക്ഷ്യത്തോടെയാണ് അക്വേറിയം ഒരുക്കിയത്. അഫ്രിക്ക, മധ്യ അമേരിക്ക, ന്യൂസിലന്റ് തുടങ്ങിയ രാജ്യങ്ങളില് നിന്നുള്ള അനബന്റോയിഡ്, അഫ്രിക്കന് സിക്ലിഡുകള്, ഗപ്പി, എയ്ഞ്ചല് ഫിഷ് തുടങ്ങി 30ഓളം അലങ്കാര മത്സ്യങ്ങള് ഇവിടെയുണ്ട്. വിശാലമായ മുറിയില് മീന് കുളവും നിര്മ്മിച്ചിട്ടുണ്ട്. മീനുകളുടെ ജീവിത സാഹചര്യത്തിന് അനുസരിച്ചാണ് വെള്ളത്തിന്റെ പി.എച്ച് ലെവല് ക്രമീകരിച്ചിരിക്കുന്നത്. ഓരോ മീനുകളുടെ പ്രത്യേകതകള് വിവരിക്കുന്ന ഫോട്ടോ പ്രദര്ശനവും സജ്ജീകരിച്ചിട്ടുണ്ട്. വെള്ളിയാഴ്ചകളില് ഇവിടെ അലങ്കാര മത്സ്യ വിപണനവും നടക്കുന്നുണ്ട്. അഞ്ച് രൂപ മുതലാണ് മത്സ്യത്തിന്റെ വില.
അക്വേറിയം ടാങ്കും സെറ്റു ചെയ്തു കൊടുക്കുന്നു. മത്സ്യങ്ങള്ക്കുള്ള ഭക്ഷണവും രോഗത്തിനുള്ള മരുന്നും ഇവിടെ ലഭിക്കും. അലങ്കാര മത്സ്യ കൃഷിയെകുറിച്ച് പരിശീലന ക്ലാസ്, അലങ്കാര മത്സ്യങ്ങളുടെ അക്വാഷോ എന്നിവയും ഇവിടെ സംഘടിപ്പിക്കുന്നു. ക്ലാസില് പങ്കെടുക്കാന് താല്പര്യമുള്ളവര് 1500 രൂപ ഫീസ് അടച്ച് പേര് രജിസ്റ്റര് ചെയ്യണം. മീനുകളെ വളര്ത്തുന്നതിനുള്ള വെള്ളത്തിന്റെ അസിഡിറ്റി, ഭക്ഷണം, രോഗം വരാതിരിക്കുന്നതിനുള്ള മുന്കരുതലുകള് എന്നിവയെ കുറിച്ചാണ് ക്ലാസ്. ചെലവുകുറഞ്ഞ രീതിയില് സ്വയം തൊഴില് കണ്ടെത്താനാകുന്നതിനാല് നിരവധിപേര് പരിശീലനത്തില് പങ്കെടുക്കുന്നുണ്ടെന്നും അക്വേറിയം തുടങ്ങിയതില് പിന്നെ അന്പതോളം പേര് അലങ്കാര മത്സ്യ കൃഷി ക്ലാസില് പങ്കെടുക്കുകയും കൃഷി തുടങ്ങുകയും ചെയ്തുവെന്നും മത്സ്യഫെഡ് ജില്ലാ മാനേജരായ എന് രാമദാസ് പറഞ്ഞു.
