ശബരിമല സീസണില്‍ മുല്ലപ്പെരിയാര്‍ ഡാമിന്റെ തകര്‍ച്ച പ്രചരണത്തിന് പിന്നില്‍ ചില ഗൂഢശക്തികള്‍ : പി.സി. ജോര്‍ജ്ജ്

കോട്ടയം: ശബരിമല തീര്‍ത്ഥാടന കാലത്ത് മാത്രം മുല്ലപ്പെരിയാര്‍ ഡാം പൊട്ടാന്‍ പോകുന്നു എന്ന വ്യാപകമായ പ്രചരണത്തിന് പിന്നില്‍ ചില ഗൂഢശക്തികള്‍ പ്രവര്‍ത്തിക്കുന്നുണ്ടെന്ന് കേരളാ കോണ്‍ഗ്രസ് സെക്യുലര്‍ ലീഡര്‍ പി.സി. ജോര്‍ജ്ജ്. പ്രസ് ക്ലബ്ബില്‍ പത്രസമ്മേളനത്തില്‍ സംസാരിക്കുകയായിരുന്നു അദ്ദേഹം. ഇത്തരത്തില്‍ ഗൂഢാലോചന ഉണ്ടായിരുന്നുവോ എന്നതിന്റെ സത്യം തുറന്നു പറയുവാന്‍ മന്ത്രി പി.ജെ. ജോസഫ് ഇനിയെങ്കിലും തയ്യാറാവണം. മുല്ലപ്പെരിയാര്‍ ഡാമിലെ ജലനിരപ്പ് 134 അടി ഉയര്‍ന്നപ്പോഴാണ് ജനങ്ങളുടെ സുരക്ഷയേക്കുറിച്ച് ചിന്തിച്ച് ഉറങ്ങാന്‍ കഴിയുന്നില്ല എന്ന പ്രഖ്യാപനത്തോടെ ഡാം തകരാന്‍ പോകുന്നുവെന്ന ആശങ്ക വ്യാപകമായി മന്ത്രി പി.ജെ.ജോസഫിന്റെ നേതൃത്വത്തില്‍ പ്രചരിപ്പിച്ചത്. ഇപ്പോള്‍ മുല്ലപ്പെരിയാര്‍ ഡാമിലെ ജലനിരപ്പ് 139 അടിയില്‍ അധികമായിട്ടും യാതൊരു ആശങ്കകളും ഇല്ലാതെ പി.ജെ.ജോസഫിന് ഉറങ്ങാന്‍ കഴിയുന്നതിനെ സംശയത്തോടെ അല്ലാതെ വീക്ഷിക്കുവാന്‍ കഴിയുകയില്ല. മണ്ഡല – മകരവിളക്ക് കാലത്തെ ശബരിമല തീര്‍ത്ഥാടനം അട്ടിമറിക്കാന്‍ നടത്തിയ ആസൂത്രിതമായ ഗുഢാലോചനയാണ് 134 അടി ജലനിരപ്പുണ്ടായിരുന്നപ്പോള്‍ മുല്ലപ്പെരിയാര്‍ ഡാം തകരാന്‍ പോകുന്നുവെന്ന വ്യാപക പ്രചാരണം നടത്തിയതിന്റെ പിന്നിലെന്ന ആശങ്ക ഭൂരിപക്ഷ സമുദായങ്ങള്‍ക്കിടയില്‍ ശക്തമാണ്. 142 അടിയായി ജലനിരപ്പ് ഉയര്‍ത്തുക എന്ന തമിഴ്‌നാട് തല്‍പര്യം യഥാര്‍ത്ഥ്യമാക്കിയെടുക്കുവാനുള്ള ഒത്താശയും സംസ്ഥാനത്തിന് അകത്തു നിന്നും ഉണ്ടായി എന്ന സംശയവും ശക്തമാണ്. ഈ സാഹചര്യത്തില്‍ ഗൂഢാലോചന നടന്നുവോ എന്നതിന്റെ സത്യം തുറന്നു പറയാന്‍ മന്ത്രി പി.ജെ.ജോസഫിന് ബാദ്ധ്യതയുണ്ട്. ഇപ്പോള്‍ ജലനിരപ്പ് 139 അടിയും കഴിഞ്ഞ് ക്രമാതീതമായി ഉയര്‍ന്ന സാഹചര്യത്തില്‍ ജനങ്ങളുടെ സുരക്ഷയ്‌ക്കായി എന്തു നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കുവാന്‍ മുഖ്യമന്ത്രി ഉമ്മന്‍ചാണ്ടിയ്‌ക്കും മന്ത്രി പി.ജെ.ജോസഫിനും ബാദ്ധ്യതയുണ്ട്. ഡാമിന്റെ നിലവിലെ അവസ്ഥയെ കുറിച്ച് ജനങ്ങളോട് സത്യം പറയുവാനും ജനങ്ങളുടെ ഭീതി അകറ്റി അവരുടെ സ്വത്തിനും ജീവനും സംരക്ഷണം നല്‍കുവാനുള്ള ഭരണഘടനാപരമായ ബാദ്ധ്യത കേരളസര്‍ക്കാര്‍ നിറവേറ്റണമെന്നും പി.സി.ജോര്‍ജ് ആവശ്യപ്പെട്ടു. പത്ര സമ്മേളനത്തില്‍ കേരളാ കോണ്‍ഗ്രസ് സെക്യുലര്‍ സംസ്ഥാന ജനറല്‍ സെക്രട്ടറി മാലേത്ത് പ്രതാപചന്ദ്രനുംപങ്കെടുത്തു.