തുറവൂര്: പാലത്തിലെ ഡിപ്പ് അപകടക്കെണിയാകുന്നു. കുത്തിയതോട് പാലത്തിനും അപ്രോച്ച് റോഡിനുംഇടയിലുള്ള വിടവാണ് അപകടമുണ്ടാക്കുന്നത്.
കഴിഞ്ഞദിവസം പാലത്തിലുണ്ടായ അപകടത്തില് ടോറസും കാറും തമ്മിലിടിച്ചു. ഇടിയുടെ ആഘാതത്തില് കാര് നിശേഷം തകര്ന്നു. എറണാകുളം അത്തിയന് ഹൗസില് എബി ഫിലിപ്പിന്റെ കാറാണ് തകര്ന്നത്. എറണാകുളം ഭാഗത്തു നിന്ന് ശബരിമലയിലേക്ക് പോകുകയായിരുന്ന കാര് ലോറിയെ മറികടക്കാന് ശ്രമിക്കുന്നതിനിടെ പാലത്തിലെ ഡിപ്പ് കണ്ട് കാര് ബ്രേക്ക് ചെയ്തപ്പോള് ടോറസ് ലോറി ശക്തിയായി പിന്നിലിടിക്കുകയായിരുന്നു.
ഇടിയുടെ ആഘാതത്തില് വട്ടം കറങ്ങിയ കാറിന്റെ മുന് വശവും ലോറി ഇടിച്ചു തകര്ന്നു. അപകടത്തെത്തുടര്ന്ന് കുത്തിയതോട് എസ്ഐ എ.എല്. അഭിലാഷും സംഘവും ഓടിയെത്തി കാറിന്റെ ചില്ലു തകര്ത്താണ് ഡ്രൈവറെ പുറത്തെടുത്തത്. കാറുടമ കൂടിയായ ഇയാള് പൂര്ണ്ണമായി തകര്ന്ന വാഹനത്തില് നിന്ന് പരിക്കേല്ക്കാതെ അത്ഭുതകരമായി രക്ഷപ്പെട്ടു.
ശബരിമലയിലെ കുടിവെള്ള വിതരണക്കരാറുകാരനാണ്. അവിടെയ്ക്കുള്ള യാത്രയ്ക്കിടയിലാണ് അപകടത്തില്പ്പെട്ടത്. കഴിഞ്ഞ ആഴ്ചയിലും ഇവിടെ ഇത്തരത്തില് ഒരുവാഹനം അപകടത്തില്പ്പെട്ടിരുന്നു. കുത്തിയതോട് പാലത്തില് ഡിപ്പില് ചാടിയുള്ള അപകടങ്ങള് പതിവായിരിക്കുകയാണ്.
ഇവിടെ അപകടങ്ങളൊഴിവാക്കാനുള്ള സംവിധാനങ്ങള് ഏര്പ്പെടുത്തണമെന്ന് ആവശ്യപ്പെട്ട് ദേശീയപാത അധികൃതര്ക്കും മറ്റും നിരവധി തവണ പരാതി നല്കിയിട്ടും നടപടി സ്വീകരിക്കാത്തതാണ് നിരന്തരം അപകടങ്ങളുണ്ടാകാന് കാരണമത്രെ.
