കണ്ണൂര്: പ്രൊഫഷണല് നാടകവേദിക്ക് നവോന്മേഷം പകര്ന്നുകൊണ്ട് കേരള സംഗീത നാടക അക്കാദമി ആദ്യമായി മേഖലാടിസ്ഥാനത്തില് പ്രൊഫഷണല് നാടകമത്സരം സംഘടിപ്പിക്കുന്നു. കേരളത്തിന്റെ സ്വന്തം ജനപ്രിയ നാടകവേദിയെ കൂടുതല് ഗൗരവപൂര്ണ്ണമായ അന്വേഷണത്തിലേക്ക് നയിക്കുക, രൂപത്തിലും ഭാവത്തിലും പ്രൊഫഷണല് രംഗവേദിയെ നവീകരിക്കുക തുടങ്ങിയ ഉദ്ദേശലക്ഷ്യങ്ങളോടെയാണ് അക്കാദമി ഇദംപ്രഥമമായി ഇങ്ങനെ ഒരുദ്യമത്തിന് തുടക്കം കുറിക്കുന്നത്. അക്കാദമിയുടെ അറിയിപ്പുപ്രകാരം ലഭിച്ച എല്ലാ രചനകളും മേഖലാമത്സരത്തില് പങ്കെടുക്കുന്നു എന്ന സവിശേഷത കൂടി ഈ മത്സരത്തിനുണ്ട്.
സംസ്ഥാനപ്രൊഫഷണല് നാടകമത്സരത്തിന് മുന്നോടിയായുള്ള മത്സരത്തില് 47 നാടകങ്ങളാണ് 4 മേഖലകളിലായി മാറ്റുരയ്ക്കുന്നത്. സംസ്ഥാനതലമത്സരത്തിലേക്ക് തെരഞ്ഞെടുക്കപ്പെടുന്ന 10 നാടകങ്ങള്ക്കും 1 ലക്ഷം രൂപ വീതം സബ്സിഡിയും അക്കാദമി ഏര്പ്പെടുത്തിയിട്ടുണ്ട്. തിരുവനന്തപുരം, ചങ്ങനാശ്ശേരി, കൊരട്ടി, വടകര എന്നിങ്ങനെ 4 കേന്ദ്രങ്ങളില് ഡിസംബര് 8 വരെ തീയ്യതികളിലാണ് മത്സരങ്ങള് നടക്കുന്നത്. കേരളത്തിലെ പ്രൊഫഷണല് നാടകരംഗത്ത് പ്രവര്ത്തിക്കുന്ന സംഘങ്ങളെ അക്കാദമിയുടെ കീഴില് കൊണ്ടുവന്ന് അവരുടെ പ്രവര്ത്തനങ്ങള്ക്ക് ദിശാബോധം നല്കുന്നതിന് ഈ ഉദ്യമം കൊണ്ട് സാധിക്കുമെന്ന് അക്കാദമി പ്രത്യാശിക്കുന്നു.
