കണ്ണൂര്: കണ്ണൂര് റവന്യൂ കായിക മേളയില് പയ്യന്നൂര് ഉപജില്ലക്ക് ഓവറോള് കിരീടം. കഴിഞ്ഞ മൂന്ന് ദിവസമായി പോലീസ് പരേഡ് ഗ്രൗണ്ടില് നടന്ന കായിക മേളയില് എതിരാളികളെ ബഹുദൂരം പിന്നിലാക്കി കോഴിച്ചാലിന്റെയും പ്രാപൊയില് സ്കൂളിന്റെയും പിന്ബലത്തിലാണ് പയ്യന്നൂര് ഓവറോള് കിരീടം ചൂടിയത്. ആകെയുള്ള 96 ഇനങ്ങളിലെ മല്സരങ്ങള് പൂര്ത്തിയായപ്പോള് 193 പോയന്റുമായാണ് പയ്യന്നൂര് ഒന്നാം സ്ഥാനത്തെത്തിയത്. രണ്ടാം സ്ഥാനത്തുള്ള ഇരിട്ടി 103 പോയന്റ് നേടിയപ്പോള് 91 പോയന്റ് വീതം നേടി തളിപ്പറമ്പ് നോര്ത്തും ഇരിക്കൂറും മൂന്നാം സ്ഥാാനം നേടി. പയ്യന്നൂരിന് 15 സ്വര്ണവും 24 വെള്ളിയും 18 ഓടും ലഭിച്ചപ്പോള് രണ്ടാം സ്ഥാനക്കാരായ ഇരിട്ടിക്ക് 13 സ്വര്ണവും എട്ട് വെള്ളിയും ആറ് ഓടും ലഭിച്ചു.
സ്കൂള് വിഭാഗത്തില് കോഴിച്ചാല് ഗവ. ഹയര്സെക്കന്ററി സ്കൂള് 50 പോയന്റ് നേടി ഒന്നാം സ്ഥാനത്തെത്തി. പ്രാപ്പൊയില് ഗവ. ഹയര്സെക്കന്ററി സ്കൂള് 38 പോയിന്റുമായി രണ്ടാം സ്ഥാനം നേടി. എളയാവൂര് സിഎച്ച്എംഎച്ച്എസ്എസ് (കണ്ണൂര് നോര്ത്ത്) 29 പോയിന്റുമായി മൂന്നാം സ്ഥാനത്താണ്. മൂന്നാം ദിനത്തിലും ഒരു മീറ്റ് റെക്കാര്ഡ് പിറന്നു. സീനിയര് ഗേള്സ് ഹാമര്ത്രോയിലാണ് ഇന്നലെ റെക്കാര്ഡ് പിറന്നത്. കണ്ണൂര് ഗവ. വൊക്കേഷണല് ഹയര് സെക്കന്ററി സ്കൂളിലെ വി.വിഅര്ഷനയാണ് പുതിയ മീറ്റ് റെക്കാര്ഡ് കരസ്ഥമാക്കിയത്. ഹാമര്ത്രോയില് നിലവിലെ റെക്കാര്ഡായ 25.80 മീറ്റര് 32.25 മീറ്റര് എറിഞ്ഞാണ് മിന്നും പ്രകടനം കാഴച് വെച്ചത്. മൂന്ന് ദിവസത്തെ മീറ്റില് പതിനാറ് റെക്കാര്ഡുകളാണ് പിറന്നത്. സമാപന ചടങ്ങില് അസിസ്റ്റന്റ് കമാണ്ടന്റ് (എആര് ക്യാമ്പ് ) അബ്ദുള് നിസാര് സമ്മാനങ്ങള് വിതരണം ചെയ്തു. ഡിഇഒ യു.കരുണാകരന് അധ്യക്ഷതവഹിച്ചു. എ.പി.അനില്കുമാര്, എം.സെല്വമണി, കെ.പി.വാസു, കെ.എം.സുനില്കുമാര്, വി.എം.രാജീവന്, പി.പി.മുഹമ്മദലി എന്നിവര് സംസാരിച്ചു.
