ഹരിപ്പാട്: മത്സരങ്ങളുടെ ആധിക്യത്തിലുള്ള പോര്മുഖം തുറക്കാതെ സാഹോദര്യത്തിന്റെ പ്രതീകം ഉയര്ത്തി തൃക്കുന്നപ്പുഴ ദേശത്തിന് കലാവസന്തം സമ്മാനിച്ച് ഭാരതീയ വിദ്യാനികേതന് ജില്ലാ കലോത്സവം.
തൃക്കുന്നപ്പുഴ വേദവ്യാസ വിദ്യാപീഠത്തിന്റെ ആഭിമുഖ്യത്തില് മംഗലം ഹയര്സെക്കന്ററി സ്കൂളിലെ എട്ട് വേദികളിലായി ഇന്നലെ രാവിലെ ആരംഭിച്ച കലോത്സവം ഇന്ന് സമാപിക്കും. ജില്ലയിലെ 23 വിദ്യാലയങ്ങളിലെ എണ്ണൂറിലധികം കലാപ്രതിഭകളാണ് വിവിധ മത്സരങ്ങള് മാറ്റുരയ്ക്കുന്നത്.
ഇന്നലെ രാവിലെ മുതല് എല്പി, യുപി, എച്ച്എസ് വിഭാഗത്തില് ഭരതനാട്യം, മോഹിനിയാട്ടം, കുച്ചുപ്പുടി, മോണോ ആക്ട്, യോഗ്ചാപ്, നാടോടിനൃത്തം, ഏകാഭിനയം, ലളിതഗാനം, ശാസ്ത്രീയ സംഗീതം, ഭഗവത്ഗീത, പദ്യം ചൊല്ലല്, പ്രസംഗം (സംസ്കൃതം, മലയാളം), രാമായണ പാരായണം, ഗാനാലാപനം (സംസ്കൃതം), അക്ഷര ശ്ലോകം തുടങ്ങിയ മത്സരങ്ങളാണ് നടന്നത്. മത്സരം ഇന്നും തുടരും.
കലോത്സവ വിളംബര റാലിക്കു ശേഷം ബിഡിഒ: അശോക്കുമാര് പതാക ഉയര്ത്തിയതോടെയാണ് കലാമേളയ്ക്ക് തുടക്കം കുറിച്ചത്. തുടര്ന്ന് നടന്ന സമ്മേളനത്തില് ആറാട്ടുപുഴ ഗ്രാമ പഞ്ചായത്ത് പ്രസിഡന്റ് അജിത.എസ് കലാമേളയുടെ ഉദ്ഘാടനവും വിദ്യാനികേതന് ജില്ലാ അദ്ധ്യക്ഷന് പി.ഡി. കേശവന്നമ്പൂതിരി ദീപപ്രോജ്ജ്വലനവും നിര്വ്വഹിച്ചു.
ഭാരതീയ വിദ്യാനികേതന് സംസ്ഥാന സഹകാര്യദര്ശി എ.ജി. രാധാകൃഷ്ണന് അനുഗ്രഹ പ്രഭാഷണം നടത്തി. ജില്ലാ പഞ്ചായത്തംഗം ബബിതജയന്, മുതുകുളം ബ്ലോക്ക് പഞ്ചായത്തംഗം ഷംസുദ്ദീന് കായിപ്പുറം എന്നിവര് പ്രസംഗിച്ചു. സ്വാഗതസംഘം ജനറല് കണ്വീനര് പ്രദീപ്കുമാര് സ്വാഗതവും കലോത്സവ പ്രമുഖ് മനോജ്കുമാര് കൃതജ്ഞതയും പറഞ്ഞു.
ഇന്ന് വൈകിട്ട് മൂന്നിന് നടക്കുന്ന സമാപന സഭയില് തിരക്കഥാകൃത്ത് ഫ്രാന്സിസ്.ടി. മാവേലിക്കരയും സംവധായകന് മനു കണ്ണന്താനവും സമ്മാനദാനം നിര്വ്വഹിക്കും. വിദ്യാനികേതന് ജില്ലാ വൈസ്പ്രസിഡന്റുമാരായ ഡോ.പി.ആര്. സത്യകീര്ത്തി, അഡ്വ.ജ്യോതി ഗോപിനാഥ് എന്നിവര് പ്രസംഗിക്കും
