എട്ട് പൂട്ടുകളിട്ട് പൂട്ടിയ കടയില്‍ വീണ്ടും കള്ളനെത്തി

പയ്യന്നൂര്‍: തുടര്‍ച്ചയായി നടന്ന മോഷണം തടയാനായി എട്ട് സ്ഥലങ്ങളില്‍ പൂട്ടുകളിട്ട് പൂട്ടിയ കടയില്‍ വീണ്ടും മോഷ്ടാവെത്തി കവര്‍ച്ച നടത്തി. പയ്യന്നൂര്‍ മുകുന്ദ് ആശുപത്രിക്ക് സമീപത്തെ കിഴക്കുംകര ബാലകൃഷ്ണന്‍ നടത്തുന്ന കാന്റീനിലാണ് കഴിഞ്ഞദിവസം വീണ്ടും മോഷണം നടന്നത്. മേശവലിപ്പിലുണ്ടായിരുന്ന 2000 രൂപ, 30 പാക്കറ്റ് സിഗരറ്റ്, തോര്‍ത്ത്, ലേഡീസ് വാച്ച് എന്നിവ മോഷ്ടിച്ച കള്ളന്‍ ഫ്രിഡ്ജ് കുത്തിത്തുറന്ന് അതിനകത്ത് സൂക്ഷിച്ചിരുന്ന മത്സ്യമെടുത്ത് കറി വെച്ച് കടയിലുണ്ടായിരുന്ന ചപ്പാത്തി കഴിച്ച ശേഷമാണ് സ്ഥലം വിട്ടത്. പോകുമ്പോള്‍ കടയിലുണ്ടായിരുന്ന വാക്കത്തിയും കൊണ്ടുപോയി. കടയില്‍ മോഷണം പതിവായതോടെ എല്ലാ വാതിലുകള്‍ക്കും പൂട്ടു പിടിപ്പിക്കുകയും ചുറ്റും ഗ്രില്‍സ് സ്ഥാപിക്കുകയും ചെയ്തിരുന്നു. ഇതിനെല്ലാമായി എട്ടോളം പൂട്ടുകളിട്ട് പൂട്ടിയാണ് ബാലകൃഷ്ണന്‍ രാത്രി വീട്ടിലേക്ക് പോയത്. നേരത്തെ അഞ്ച് തവണ ഈ കടയില്‍ മോഷണം നടന്നിരുന്നു. ചെറിയ ഗ്രില്‍സ് തകര്‍ത്താണ് മോഷ്ടാവ് അകത്ത് കയറി കവര്‍ച്ച നടത്തുകയും ഭക്ഷണം ഉണ്ടാക്കി കഴിക്കുകയും ചെയ്തിരുന്നത്. എന്നാല്‍ ഇത്തവണ വെന്റിലേറ്റര്‍ തകര്‍ത്താണ് കള്ളന്‍ അകത്ത് കയറിയത്. സംഭവത്തില്‍ പയ്യന്നൂര്‍ പോലീസില്‍ പരാതി നല്‍കിയെങ്കിലും വിരുതനായ കള്ളനെ കണ്ടെത്താനായില്ല എന്നത് പോലീസിന് തന്നെ അപമാനമായി മാറിയിരിക്കുകയാണ്.