ചൊക്ലി: ചൊക്ലി ഉപജില്ലാ കേരള സ്കൂള് കലോത്സവം 27, 30 ഡിസംബര് 1, 2 തിയ്യതികളില് എന്എഎം ഹയര്സെക്കണ്ടറി സ്കൂളില് വെച്ച് നടത്തുമെന്ന് സംഘാടകര് വാര്ത്താ സമ്മേളനത്തില് അറിയിച്ചു. 27ന് സ്റ്റേജിതര മത്സരങ്ങളും 30, 1, 2 തിയ്യതികളില് സ്റ്റേജ് മത്സരങ്ങളുമാണ് നടക്കുന്നത്. ചൊക്ലി ഉപജില്ലയിലെ 76 സ്കൂളുകളില് നിന്നായി 2600 കുട്ടികള് മേളയില് പങ്കെടുക്കും. മേളയുടെ ഉദ്ഘാടനം പ്രശസ്ത സാഹത്യകാരന് രാമനുണ്ണി 30ന് 10 മണിക്ക് നിര്വ്വഹിക്കും. പാനൂര് നഗരസഭാ ചെയര്പേഴ്സണ് കെ.വി.റംല ടീച്ചര് അധ്യക്ഷത വഹിക്കും. പ്രശസ്ത മാപ്പിളപ്പാട്ട് കലാകാരന് എം.എ.ഗഫൂര് മുഖ്യാതിഥിയായിരിക്കും. പാനൂര് ബ്ലോക്ക് പഞ്ചായത്ത് പ്രസിഡണ്ട് കെ.ഇ.കുഞ്ഞബ്ദുള്ള സുവനീര് പ്രകാശനം നിര്വ്വഹിക്കും. ചൊക്ലി ഉപജില്ലാ വിദ്യാഭ്യാസ ഓഫീസര് കെ.പുരുഷോത്തമന് സുവനീര് ഏറ്റുവാങ്ങും. കണ്ണൂര് ആര്ഡിഡി സതീറാണി ഉപഹാര സമര്പ്പണം നടത്തും.
നാല് ദിനങ്ങളിലായി നടക്കുന്ന മേളയുടെ സമാപന സമ്മേളനം 2ന് വൈകുന്നേരം 4 മണിക്ക് പാനൂര് നഗരസഭാ വൈസ് ചെയര്മാന് എം.കെ.പത്മനാഭന്റെ അധ്യക്ഷതയില് വി.ടി.മുരളി ഉദ്ഘാടനം ചെയ്യും. പത്രസമ്മേളനത്തില് ചൊക്ലി എഇഒ കെ.പുരുഷേത്തമന്, എന്എഎംഎച്ച്എസ്എസ് പ്രിന്സിപ്പാള് മുഹമ്മദലി വിളക്കോട്ടൂര് എന്നിവര് പങ്കെടുത്തു.
