മട്ടന്നൂര്: തിങ്കളാഴ്ച മലപ്പുറം ഐക്കരപ്പടിയിലുണ്ടായ വാഹനാപകടത്തില് മരിച്ച മട്ടന്നൂര് തെരൂര് സ്വദേശികളും ബന്ധുക്കളുമായ അഞ്ച് പേര്ക്ക് നാടിന്റെ അന്ത്യാഞ്ജലി.
ദുരന്തത്തിനിരയാവരെ അവസാനമായി ഒരുനോക്ക് കണ്ട് ആദരാഞ്ജലികളര്പ്പിക്കാനായി മൃതദേഹങ്ങള് പൊതുദര്ശനത്തിന് വെച്ച തെരൂര് യുപി സ്കൂളില് ജനസാഗരമാണ് ഒഴുകിയെത്തിയത്. മന്ത്രിമാര്, എംപിമാര്, എംഎല്എമാര്, ജില്ലാ കലക്ടര് അടക്കമുള്ള ഉദ്യോഗസ്ഥര്, ജനപ്രതിനിധികള്, വിവിധ രാഷ്ട്രീയ പാര്ട്ടി നേതാക്കള് തുടങ്ങിയവരും തെരൂര് യുപി സ്കൂളിലെത്തി അന്ത്യോപചാരമര്പ്പിച്ചു.
പോസ്റ്റ്മോര്ട്ടം അടക്കമുള്ള നടപടികള് പൂര്ത്തിയാക്കി അഞ്ച് മൃതദേഹങ്ങളും തിങ്കളാഴ്ച വൈകുന്നേരം തന്നെ കണ്ണൂരിലെത്തിച്ചിരുന്നു. അഞ്ചരക്കണ്ടി മെഡിക്കല് കോളേജ്, എകെജി ആശുപത്രി, ധനലക്ഷ്മി ആശുപത്രി എന്നിവിടങ്ങളിലായി സൂക്ഷിച്ച മൃതദേഹങ്ങള് അഞ്ച് ആംബുലന്സുകളിലായി ചൊവ്വാഴ്ച രാവിലെ 7.45 ഓടെയാണ് തെരൂര് യുപി സ്കൂളിലെത്തിച്ച് പൊതുദര്ശനത്തിന് വെച്ചത്.
മൃതദേഹങ്ങള് പൊതുദര്ശനത്തിന് വെച്ചതു മുതല് ജില്ലയുടെ പല ഭാഗങ്ങളില് നിന്നും പുറത്തുനിന്നുമായി ജനസാഗമാണ് ചേതനയറ്റ ശരീരങ്ങള് അവസാനമായി ഒരുനോക്കു കാണാനായി തെരൂര് യുപി സ്കൂളിലേക്ക് ഒഴുകിയെത്തിയത്. മരിച്ചവരില് സഹോദരങ്ങളും വിദ്യാര്ത്ഥികളുമായ സൂര്യ, അതുല് എന്നിവരെ കാണാനായി നിറകണ്ണുകളും വിതുമ്പുന്ന മനസ്സുമായി അവരുടെ സഹപാഠികളും എത്തിയിരുന്നു. സൂര്യ കൂടാളി എച്ച്എസ്എസ്സില് എട്ടാം ക്ലാസ് വിദ്യാര്ത്ഥിനിയും അതുല് എളമ്പാറ എല്പി സ്കൂളില് അഞ്ചാം ക്ലാസ് വിദ്യാര്ത്ഥിയുമാണ്. ഇവരുടെ നിര്യാണത്തില് അനുശോചിച്ച് രണ്ട് സ്കൂളുകള്ക്കും അതിനു പുറമേ മൃതദേഹങ്ങള് പൊതുദര്ശനത്തിന് വെച്ച തെരൂര് യുപി സ്കൂളിനും ഇന്നലെ അവധി നല്കിയിരുന്നു. ഇവരുടെ മാതാപിതാക്കളാ അജിതയും സുനിലും അപകടത്തില് പരിക്കേറ്റ് കോഴിക്കോട് മെഡിക്കല് കോളേജില് ചികിത്സയിലായതിനാല് തങ്ങളുടെ പൊന്നോമനകളെ അവസാനമായി ഒരുനോക്കു കാണാന് സാധിച്ചില്ലെന്നത് ഏവരെയും ദുഖത്തിലാഴ്ത്തി.
രാവിലെ 10.45 ഓടെ മൃതദേഹങ്ങള് ഇവരുടെ തറവാട് വീടുകളിലെത്തിച്ച് പൊതുദര്ശനത്തിന് വെച്ചു. വീടുകളിലും വന് ജനാവലിയാണ് അന്ത്യോപചാരമര്പ്പിക്കാനെത്തിയത്. ഉച്ചയോടെ മൃതദേഹങ്ങള് സംസ്കരിക്കാനായി കൊണ്ടുപോയി. സൂര്യ, അതുല് എന്നിവരുടെ മൃതദേഹങ്ങള് കുറ്റിയാട്ടൂര് പഞ്ചായത്ത് പൊതുശ്മശാനത്തിലും രവീന്ദ്രന്റെയും ദേവിയുടെയും മൃതദേഹങ്ങള് പയ്യാമ്പലത്തും സംസ്കരിച്ചു. ശശികലയുടെ മൃതദേഹം ജന്മദേശമായ നീലേശ്വരത്തേക്ക് കൊണ്ടുപോയി. കീഴല്ലൂര് പഞ്ചായത്തില് ഇന്നലെ ഉച്ചവരെ ഹര്ത്താല് ആചരിച്ചു.
