കണ്ണൂര്: കണ്ണൂര് റവന്യൂ ജില്ലാ സ്കൂള് കലോത്സവം ജനുവരി 4 മുതല് 8വരെ കണ്ണൂരില്വെച്ച് നടക്കും. 4ന് സ്റ്റേജിതര മത്സരങ്ങളും തുടര്ന്നുള്ള ദിവസങ്ങളില് സ്റ്റേജ് മത്സരങ്ങളുമാണ് നടക്കുക. ജില്ലയിലെ 15 സബ് ജില്ലകളില് നിന്നായി 5000ല് പരം കുട്ടികള് മേളയില് പങ്കെടുക്കും.
കലോത്സവം വിജയകരമായി നടത്തുന്നതിന് കണ്ണൂര് കോര്പറേഷന് ചെയര്പേഴ്സണ് ചെയര്മാനും കണ്ണൂര് വിദ്യാഭ്യാസ ജില്ലാ ഡെപ്യൂട്ടി ഡയരക്ടര് ജനറല് കണ്വീനറുമായി വിപുലമായ സംഘാടക സമിതി രൂപീകരിച്ചു.
കണ്ണൂര് വൊക്കേഷണല് ഹയര്സെക്കണ്ടറി സ്കൂളില് ചേര്ന്ന സംഘാടക സമിതി യോഗം കണ്ണൂര് കോര്പറേഷന് ചെയര്പേഴ്സണ് ഇ.പി.ലത ഉദ്ഘാടനം ചെയ്തു. വിദ്യാഭ്യാസ ഡെപ്യൂട്ടി ഡയരക്ടര് ഇ.വസന്തന് അധ്യക്ഷത വഹിച്ചു. വിവിധ അധ്യാപക സംഘടനാ ഭാരവാഹികള് കണ്വീനര്മാരും ജനപ്രതിനിധികള് ചെയര്മാന്മാരുമായി വിവിധ സബ് കമ്മറ്റികള് രൂപീകരിച്ചു. മന്ത്രിമാരായ കെ.സി.ജോസഫ്, കെ.പി.മോഹനന്, ജില്ലയിലെ എം.പിമാര്, എംഎല്എമാര്, ജില്ലാ, ബ്ലോക്ക്, നഗരസഭാ അധ്യക്ഷന്മാര് എന്നിവര് മുഖ്യ രക്ഷാധികാരികളായിരിക്കും. കണ്ണൂര് ഡിഇഒ കരുണാകരന് ബഡ്ജറ്റ് അവതരിപ്പിച്ചു. സി.പി.പ്രസൂനന് സംഘാടക സമതി പാനല് അവതരിപ്പിച്ചു.
യോഗത്തില് ലിഷ ദീപക്, സുശീല, സി.എന്.ബാലകൃഷ്ണന്, പി.കെ.ഗോപിനാഥന്, ശശിധരന് കുനിയില്, കെ.കെ.ശോഭന, ജ്യോതിലക്ഷ്മി, സല്വ മണി തുടങ്ങിയവര് പ്രസംഗിച്ചു. വി.എച്ച്എസ്ഇ പ്രിന്സിപ്പാള് വിമ ടി.സ്വാഗതവും എച്ച്എം ഫോറം സെക്രട്ടറി രാമദാസ് നന്ദിയും പറഞ്ഞു.
