ചങ്ങനാശേരി: എന്എസ്എസ് വിദ്യാലയങ്ങളിലെ നഴ്സറി വിഭാഗം മുതല് പ്ലസ്ടു, ടിടിസിതലം വരെ പഠിക്കുന്ന വിദ്യാര്ത്ഥികള്ക്കായി സംസ്ഥാനതലത്തില് സംഘടിപ്പക്കുന്ന മന്നം ട്രോഫി കലാ-കായിക മേള 21 മുതല് 24വരെ നടക്കും. 3500ല്പ്പരം കലാ-കായിക പ്രതിഭകള് പതിനൊന്ന് വേദികളിലായി ഈ മേളയില് പങ്കാളികളാവും. മത്സരങ്ങള്ക്കുള്ള രജിസ്ട്രേഷന് 20ന് ഉച്ചയ്ക്ക് 2 മുതല് പെരുന്ന എന്എസ്എസ് ബോയ്സ് ഹൈസ്കൂളില് ആരംഭിക്കും. എന്എസ്എസ് ജനറല് സെക്രട്ടറി ജി.സുകുമാരന് നായരാണ് സംഘാടക സമിതിയുടെ രക്ഷാധികാരി. 21ന് രാവിലെ 8.30ന് പെരുന്ന എന്എസ്എസ് ബോയ്സ് ഹൈസ്കൂളില് പ്രൊഫ.കെ.വി.രവീന്ദ്രനാഥന് നായര് പതാക ഉയര്ത്തുന്നതോടുകൂടി കലാ-കായികമേളയുടെ ചടങ്ങുകള് ആരംഭിക്കും. 10.30ന് മന്നത്തുപത്മനാഭന്റെ സമാധിമണ്ഡപത്തില് നിന്നുമുള്ള ഭദ്രദീപഘോഷയാത്രയുടെ പ്രോജ്വലനം ജനറല് സെക്രട്ടറി ജി.സുകുമാരന് നായര് നിര്വ്വഹിക്കും. മന്ത്രി തിരുവഞ്ചൂര് രാധാകൃഷ്ണന് കലാ-കായികമേളയുടെ ഉദ്ഘാടനം നിര്വ്വഹിക്കും. എന്എസ്എസ് പ്രസിഡന്റ്പി.എന്.നരേന്ദ്രനാഥന് നായര് അദ്ധ്യക്ഷത വഹിക്കും.
22ന് വൈകിട്ട് 5ന് കേരള കലാമണ്ഡലം കല്പ്പിത സര്വ്വകലാശാല വൈസ് ചാന്സിലര് പി.എന്.സുരേഷ് കലാമത്സരങ്ങളുടെ സമ്മാനദാനം നിര്വ്വഹിക്കും. എന്എസ്എസ് ട്രഷറര് ഡോ. എം.ശശികുമാര് യോഗത്തില് അദ്ധ്യക്ഷത വഹിക്കും.
23ന് രാവിലെ 9ന് മന്നത്തു പത്മനാഭന്റെ സമാധിമണ്ഡപത്തില് നിന്നുള്ള ദീപശിഖാ പ്രയാണം എന്എസ്എസ് ഹിന്ദുകോളേജ് ഗ്രൗണ്ടിലെത്തും. തുടര്ന്ന് കായിക മത്സരങ്ങളുടെ ഉദ്ഘാടനം കാഞ്ഞിരപ്പള്ളി എംഎല്എ ഡോ.എന്.ജയരാജ് വിര്വ്വഹിക്കും. 24ന് വൈകിട്ട് 4.30ന് നടക്കുന്ന സമാപനസമ്മേളനത്തില് ജി.സുകുമാരന് നാായര് വിജയികള്ക്ക് സമ്മാനദാനം നിര്വ്വഹിക്കും. എന്എസ്എസ് ഡയറക്ടര് ബോര്ഡ് മെമ്പര് ഹരികുമാര് കോയിക്കല് സമ്മേളനത്തില് അദ്ധ്യക്ഷത വഹിക്കും.
