പാലാ നഗരസഭാദ്ധ്യക്ഷയായി ലീന സണ്ണി

പാലാ: നഗരസഭയുടെ 13-ാമത് അദ്ധ്യക്ഷയായി ലീന സണ്ണി പുരയിടം ചുമതലയേറ്റു. സ്ഥാനമൊഴിഞ്ഞ ചെയര്‍മാന്‍ കുര്യാക്കോസ് പടവനാണ് ഉപാദ്ധ്യക്ഷന്‍. വരണാധികാരി ജോസ് ഡൊമിനിക്കിന്റെ അദ്ധ്യക്ഷതയിലാണ് ഇരു സ്ഥാനങ്ങളിലേക്കുമുള്ള തെരഞ്ഞെടുപ്പ് നടപടികള്‍ പൂര്‍ത്തിയാക്കി സ്ഥാനാരോഹണ ചടങ്ങുകള്‍ നടന്നത്. ലീന സണ്ണിക്ക് വരണാധികാരി സത്യവാചകം ചൊല്ലിക്കൊടുത്തു.26 അംഗം ഭരണസമിതിയുടെ അദ്ധ്യക്ഷ സ്ഥാനത്തേക്ക് തെരഞ്ഞെടുപ്പിലൂടെയാണ് ലീന സണ്ണിയെ തെരഞ്ഞെടുത്തത്. പ്രതിപക്ഷത്തുനിന്നുള്ള സുഷമരഘുവായിരുന്നു എതിര്‍സ്ഥാനാര്‍ത്ഥി. യുഡിഎഫിലെ കേരള കോണ്‍ഗ്രസ്(എം) അംഗം ലീന സണ്ണിക്ക് 20ഉം സുഷമരഘുവിന് 5ഉം വോട്ട് ലഭിച്ചു. ബിജെപി അംഗം അഡ്വ.ബിനു പുളിക്കക്കണ്ടം വോട്ടെടുപ്പില്‍ നിന്ന് വിട്ടുനിന്നു. ഉച്ചകഴിഞ്ഞ് നടന്ന ഉപാദ്ധ്യക്ഷന്റെ തെരഞ്ഞെടുപ്പില്‍ കേരളകോണ്‍ഗ്രസ് അംഗം കുര്യാക്കോസ് പടവനെതിരെ പ്രതിപക്ഷത്തു നിന്നും റോയി ഫ്രാന്‍സീസ് മത്സരിച്ചു. ബിജെപി അംഗം അഡ്വ.ബിനു പുളിക്കക്കണ്ടം ഉപാദ്ധ്യക്ഷന്‍ തെരഞ്ഞടുപ്പിലും വിട്ടുനിന്നു 20-5 ആയിരുന്നു ഇത്തവണയും വോട്ടിംഗ് നില. നഗരസഭാദ്ധ്യക്ഷ ലീന സണ്ണി കുര്യാക്കോസ് പടവന് സത്യവാചകം ചൊല്ലിക്കൊടുത്തു. നഗരസഭയുടെ 24-ാം(കൊട്ടാരമറ്റം) വാര്‍ഡിലെ ജനറല്‍ സീറ്റില്‍ കൗണ്‍സിലര്‍ ജിമ്മി ജോസഫിനെതിരെ മത്സരിച്ചാണ് ലീന സണ്ണി നഗരസഭയിലെത്തിയത്. ഇത് മൂന്നാം തവണയാണ് ലീന നഗരസഭാംഗമാകുന്നത്. കഴിഞ്ഞ ഭരണ സമിതിയില്‍ ക്ഷേമസമിതി സ്റ്റാന്‍ഡിംഗ് കമ്മിറ്റിയദ്ധ്യക്ഷയായിരുന്നു. പുതുതായി ചുമതലയേറ്റ ചെയര്‍പേഴ്‌സന് ആശംസയര്‍പ്പിച്ച് സ്ഥാനമൊഴിഞ്ഞ ചെയര്‍മാന്‍ കുര്യാക്കോസ് പടവന്‍, ബിജെപി അംഗം അഡ്വ.ബിനു പുളിക്കക്കണ്ടം, പ്രൊഫ. സതീഷ് ചൊള്ളാനിക്കല്‍, ടോണി തോട്ടം, റോയി ഫ്രാന്‍സീസ്, മേരി ഡൊമിനിക് എന്നിവര്‍ പുതിയ ചെയര്‍പേഴ്‌സന് ആശംസയര്‍പ്പിച്ചു.