പാനൂര്: ബിജെപി പ്രവര്ത്തകന്റെ ഫര്ണ്ണിച്ചര് ഷോപ്പിനു നേരെ ബോംബേറ്. ബിജെപി പ്രവര്ത്തകനായ മലുങ്കൂന്റവിട സുരേന്ദ്രന്റെ ഉടമസ്ഥതയിലുളള എല്ലാങ്കോട് വൈദ്യര്പീടികയിലുളള കുഞ്ഞപ്പ സണ്സ് എന്ന ഫര്ണ്ണിച്ചര് കടയ്ക്കു നേരെയാണ് ഞായറാഴ്ച രാത്രി പത്തരയോടെ ബോംബേറുണ്ടായത്. ബോംബേറില് ഷട്ടറിന് ദ്വാരം വന്നു. കടയുടെ ഉളളില് നിന്നും സ്റ്റീല് ബോംബിന്റെ അവശിഷ്ടങ്ങള് പോലീസിന് ലഭിച്ചു. പാനൂര് എസ്ഐ ടി.എന്.സന്തോഷ്കുമാര് സംഭവസ്ഥലം പരിശോധിച്ചു. ഇന്നലെ കടതുറക്കാന് വന്നപ്പോഴാണ് ബോംബേറ് നടന്നത് ശ്രദ്ധയില്പ്പെടുന്നത്.ഉടന് പോലീസിന് പരാതി നല്കുകയായിരുന്നു. ബിജെപിയുടെ നഗരസഭാംഗം കെ.കാര്ത്തികയുടെ സഹോദരനാണ് സുരേന്ദ്രന്. ബോംബേറിനു പിന്നിലുളള ഇരുട്ടിന്റെ ശക്തികളെ പുറത്തു കൊണ്ടുവരണമെന്ന് ബിജെപി ജില്ലാവൈസ് പ്രസിഡണ്ട് പി.സത്യപ്രകാശ് പ്രസ്താവനയില് ആവശ്യപ്പെട്ടു. ബോധപൂര്വ്വം സംഘര്ഷം സൃഷ്ടിക്കാനുളള ഗൂഡനീക്കമാണ് സുരേന്ദ്രന്റെ കടയ്ക്ക് നേരെ നടന്ന ബോംബാക്രമണത്തിലൂടെ അക്രമികള് ലക്ഷ്യമിടുന്നത്. ഇത് ഗൗരവത്തോടെ കണ്ട് അക്രമികളെ നിയമത്തിനു മുന്നില് കൊണ്ടുവരണമെന്ന് പി.സത്യപ്രകാശ് ആവശ്യപ്പെട്ടു.
















