…………
കൊല്ലം: ജില്ലയിലും സമീപജില്ലകളിലും കറങ്ങി നടന്ന് മോഷണം നടത്തുന്ന രണ്ടുപേര് കൊല്ലം ഈസ്റ്റ് പോലീസിന്റെ പിടിയിലായി. തിരുവനന്തപുരം മേലേവെട്ടൂര് പുതുവല് പുത്തന് വീട്ടില് വിഷ്ണു(22), കൊല്ലം കരീപ്ര പ്ലാക്കോട് കുപ്പണ കിണറുവിള വീട്ടില് ദിലീപ് (31) എന്നിവരെയാണ് ഈസ്റ്റ് പോലീസ് അറസ്റ്റു ചെയ്തത്.
വാഹനപരിശോധനക്കിടെ സംശയകരമായ സാഹചര്യത്തിലായിരുന്നു അറസ്റ്റ്. പ്രതികളുടെ കൈവശം ഉണ്ടായിരുന്ന മോട്ടോര്സൈക്കിള് മോഷ്ടിച്ചതാണെന്ന് കണ്ടെത്തി. 2015 സെപ്തംബര് മാസത്തില് കല്ലമ്പലം തോട്ടയ്ക്കാട് എന്ന സ്ഥലത്ത് നിന്നും പ്രതികള് മോഷ്ടിച്ചതാന്നെും കല്ലമ്പലം സ്വദേശിയായ സക്കീര് ഹുസൈന്റെതാണ് ബൈക്ക് എന്നും തിരിച്ചറിഞ്ഞു. കൂടുതല് ചോദ്യം ചെയ്തതില് ഇരുവരും ചേര്ന്ന് 2015 ആഗസ്റ്റില് കായംകുളം റെയില്വെ സ്റ്റേഷന് സമീപമുള്ള പെരിങ്ങാല നല്ലവീട്ടില് ദേവീക്ഷേത്രവഞ്ചിയില് നിന്നും പണം മോഷ്ടിച്ചതായി പ്രതികള് പറഞ്ഞു. കൊല്ലം ശങ്കേഴ്സ് ആശുപത്രിക്ക് സമീപമുള്ള ഓര്ത്തഡോക്സ് പള്ളിയിലെ വഞ്ചി കവര്ന്നതും കിളികൊല്ലൂര് കല്ലുംതാഴത്ത് വച്ച് സ്നേഹ നഗര് 10 മംഗലത്ത് വീട്ടില് പ്രതാപചന്ദ്രന്റെ ബജാജ് പള്സര് മോട്ടോര്സൈക്കിളും മൊബൈല് ഫോണും മോഷണം നടത്തിയതും ഇവരാണ്. മുമ്പും മോഷണകേസുകളില് ജയില് ശിക്ഷ അനുഭവിച്ച പ്രതികളെ കൂടുതല് അന്വേഷണം നടത്താനായി കസ്റ്റഡിയില് വാങ്ങുമെന്ന് കൊല്ലം ഈസ്റ്റ് എസ്ഐ ആര്. രാജേഷ് കുമാര് അറിയിച്ചു.
