കണ്ണൂര്‍: കണ്ണൂര്‍ റെയില്‍വെ സ്റ്റേഷനിലെ മാലിന്യപ്രശ്‌നം സംബന്ധിച്ച് റെയില്‍വെയുടെ പാലക്കാട് ഡിവിഷന്‍ മാനേജര്‍, കണ്ണൂര്‍ കോര്‍പ്പറേഷന്‍ സെക്രട്ടറി എന്നിവരില്‍ നിന്ന് ് സംസ്ഥാന മനുഷ്യാവകാശ കമ്മീഷന്‍ റിപ്പോര്‍ട്ട് ആവശ്യപ്പെട്ടു. റെയില്‍വെ ട്രാക്കിലെയും സ്റ്റേഷനിലെയും മാലിന്യങ്ങള്‍ ആരോഗ്യപ്രശ്‌നങ്ങള്‍ക്ക് കാരണമാകുന്നതായി ചൂണ്ടിക്കാട്ടി അഡ്വ.സി പി ശശീന്ദ്രനാണ് കമ്മീഷനില്‍ പരാതി നല്‍കിയത്.
ദുരൂഹ സാഹചര്യത്തില്‍ ഭര്‍ത്താവ് മരിച്ച സംഭവത്തില്‍ അനേ്വഷണം ഊര്‍ജ്ജിതമാക്കണമെന്ന പരാതിയില്‍ അനേ്വഷണത്തിന്റെ നിലവിലുളള സ്ഥിതി സംബന്ധിച്ച് റിപ്പോര്‍ട്ട് സമര്‍പ്പിക്കുവാന്‍ ജില്ലാ പൊലീസ് മേധാവിയോട് ആവശ്യപ്പെട്ടു. മധു ചെല്ലാടന്റെ ദുരൂഹ മരണം സംബന്ധിച്ച് ഭാര്യയാണ് പരാതി നല്‍കിയത്.
എക്‌സൈസ് വകുപ്പ് ഉദേ്യാഗസ്ഥര്‍ മയക്കുമരുന്ന് കേസില്‍ കുടുക്കുമെന്ന് ഭീഷണിപ്പെടുത്തുന്നതായുളള രാജേന്ദ്രന്‍ എന്നയാളുടെ പരാതിയില്‍ അസി.എക്‌സൈസ് കമ്മീഷണറോട് വിശദീകരണം തേടി. ആശുപത്രിയില്‍ പോകവെ പൊലീസ് മര്‍ദ്ദനത്തെ ചോദ്യം ചെയ്തതിന് കളളക്കേസ്സില്‍ കുടുക്കാന്‍ ശ്രമിക്കുന്നതായി ടി.വി.കുഞ്ഞുമായന്‍ മനുഷ്യാവകാശ കമ്മീഷന്‍ മുമ്പാകെ പരാതി നല്‍കി. ഇതില്‍ കൂത്തുപറമ്പ് ഡിവൈഎസ്പി യോട് വിശദീകരണം തേടി.
വ്യാജപരാതി നല്‍കി പീഡനക്കേസില്‍ കുടുക്കാന്‍ ശ്രമിക്കുന്നതായി ഒരുകൂട്ടം നാട്ടുകാര്‍ നല്‍കിയ പരാതിയില്‍ ജില്ലാ പൊലീസ് മേധാവിയോട് അനേ്വഷിച്ച് റിപ്പോര്‍ട്ട് നല്‍കാന്‍ ആവശ്യപ്പെട്ടു.
താണയിലെ ജില്ലാ ആയുര്‍വേദ ആശുപത്രി 100 കിടക്കകളുളളതായി ഉയര്‍ത്താന്‍ സര്‍ക്കാര്‍ നടപടി ആരംഭിച്ചതായി ആശുപത്രി സൂപ്രണ്ട് കമ്മീഷന്‍ മുമ്പാകെ വിശദീകരിച്ചു. ആശുപത്രിയുടെ ശോച്യാവസ്ഥയെ കുറിച്ചുളള പരാതിയെ തുടര്‍ന്നായിരുന്നു സൂപ്ര ണ്ടിനോട് വിശദീകരണം തേടിയത്. ജില്ലയിലെ സ്‌പോര്‍ട്‌സ് ഹോസ്റ്റലുകളുടെ ശോചനീയാവസ്ഥയെക്കുറിച്ചുളള പരാതിയില്‍ സംസ്ഥാന സ്‌പോര്‍ട്‌സ് യുവജനകാര്യ വകുപ്പിനോട് വിശദീകരണം നല്‍കാന്‍ കമ്മീഷന്‍ നിര്‍ദ്ദേശിച്ചു.
ആത്മഹത്യ ചെയ്തയാളുടെ മഹസ്സര്‍ തയ്യാറാക്കുന്നതില്‍ വീഴ്ചവരുത്തിയെന്ന പരാതിയില്‍ പാനൂര്‍ സിഐയോട് റിപ്പോര്‍ട്ട് ആവശ്യപ്പെട്ടു. എടക്കാട് കുടിവെളള പദ്ധതിയുടെ പൊതു ടാപ്പുകള്‍ അകാരണമായി നീക്കം ചെയ്തുവെന്ന പരാതിയില്‍ ഗ്രാമപഞ്ചായത്ത് സെക്രട്ടറിയോട് റിപ്പോര്‍ട്ട് സമര്‍പ്പിക്കാന്‍ നിര്‍ദ്ദേശിച്ചു.
വ്യാഴാഴ്ച കമ്മീഷന്‍ അംഗം കെ മോഹന്‍കുമാര്‍ പങ്കെടുത്ത സിറ്റിങ്ങില്‍ 66 പരാതികളാണ് പരിഗണിച്ചത്. 9 കേസ് തീര്‍പ്പാക്കി. ബാക്കി കേസില്‍ തുടര്‍നടപടികള്‍ക്ക് നിര്‍ദ്ദേശം പുറപ്പെടുവിച്ചു.
