ഇരിട്ടി: തെരഞ്ഞെടുപ്പില് വിജയരഥമേറിയ ഇരിട്ടി നഗരസഭയിലേയും മുഴക്കുന്ന്, തില്ലങ്കേരി ഗ്രാമപഞ്ചായത്തുകളിലെയും ബിജെപി സാരഥികള്ക്ക് ബിജെപി ഇരിട്ടി മുനിസിപ്പല് കമ്മറ്റിയുടെ നേതൃത്വത്തില് ഉജ്ജ്വല സ്വീകരണം നല്കി. മാരാര്ജി മന്ദിരത്തില് നടന്ന ചടങ്ങില് ഇരിട്ടി നഗരസഭയിലേക്ക് മത്സരിച്ചു വിജയിച്ച പി.എം.രവീന്ദ്രന്, സത്യന് കൊമ്മേരി, പി..രഘു, സി..വി.രവീന്ദ്രന്, പി.വി.ദീപ എന്നിവരും മുഴക്കുന്ന് ഗ്രാമപഞ്ചായത്തിലെ വിജയികളായ എം.വിനീത, കെ.കെ.ഉമേശന്, തില്ലങ്കേരി പഞ്ചായത്തിലെ വിജയി എ.കെ.ശങ്കരന് എന്നിവരും പങ്കെടുത്തു.
ജില്ലാ പ്രസിഡന്റ് കെ.രഞ്ജിത്ത് പരിപാടി ഉദ്ഘാടനം ചെയ്തു. തങ്ങളുടെ കര്മ്മ മണ്ഡലങ്ങളില് എങ്ങിനെ നീങ്ങണമെന്നും കിട്ടിയ സ്ഥാനങ്ങള് എങ്ങിനെ പ്രയോജനപ്പെടുത്തണമെന്നും ജില്ലാ പ്രസിഡന്റ് കെ.രഞ്ജിത്ത് വിശദീകരിച്ചു. ആര്ക്കും ഭൂരിപക്ഷമില്ലാത്ത ഇരിട്ടി നഗരസഭയില് തങ്ങളാണ് നിര്ണ്ണായകശക്തിയെന്നും ഇത് തങ്ങള് വിജയിച്ച വാര്ഡില് മാത്രമല്ല ഈ നാടിനും നാട്ടിലെ ജനങ്ങള്ക്കും വികസന പ്രവര്ത്തനങ്ങള്ക്കും പ്രയോജനപ്പെടുത്തണമെന്നും അദ്ദേഹം പറഞ്ഞു. തുടര്ന്ന് സംസാരിച്ച ആര്എസ്എസ് പ്രാന്തകാര്യകാരി സദസ്യന് വത്സന് തില്ലങ്കേരിയും വിജയികള്ക്ക് മാര്ഗ്ഗ നിര്ദ്ദേശം നല്കി.
ചടങ്ങില് മണ്ഡലം പ്രസിഡണ്ട് പി.കൃഷ്ണന് അധ്യക്ഷത വഹിച്ചു. ജില്ലാ വൈസ് പ്രസിഡന്റ് വി.വി.ചന്ദ്രന്, ആര്എസ്എസ് വിഭാഗ് കാര്യകാരി സദസ്യന് കെ.സജീവന് ആറളം, ശങ്കരന് പുന്നാട്, തുടങ്ങിയവര് പ്രസംഗിച്ചു. തെരഞ്ഞെടുപ്പ് വിശകലനവും നടന്നു.
