കൊട്ടാരക്കര: തപാല് വോട്ടിന് സമ്മാനമായി സാരിയും സ്കോച്ചും വരെ. പോളിംഗ് ഡ്യൂട്ടിയുള്ളവര്ക്ക് നിരവധി ഓഫറുകളുമായി സ്ഥാനാര്ഥികള്. ജനഹിതം പെട്ടിയിലായെങ്കിലും ജനപ്രതിനിധികളാകാന് പോകുന്നവര്ക്ക് വിശ്രമമില്ല. ഒരു വോട്ട് പോലും വിധി നിര്ണ്ണയിക്കുന്ന തെരഞ്ഞെടുപ്പില് ഓരോവോട്ടിന്റേയും വിലയറിയാവുന്നവര് ഇപ്പോള് തപാല്വോട്ടിന്റെ പിറകെയാണ്. പോസ്റ്റുമാനെ സ്വാധീനിച്ച് തപാല്വോട്ട് എത്തുന്ന ദിവസം അറിഞ്ഞ് ഓഫറുകളുമായി അവര് പായുകയാണ്.
കിഴക്കന് മേഖലയിലെ ഒരു അധ്യാപികക്ക് പട്ടുസാരിയാണ് കാശുള്ള ഒരു സ്ഥാനാര്ഥി ഓഫര് ചെയ്തത്. കൈയ്യോടെ പോസ്റ്റല് ബാലറ്റ് കൊടുക്കുകയും ചെയ്തു. എന്നാല് സംഗതി പാട്ടായതോടെ ഓഫര് റിസല്ട്ടിന് ശേഷം നല്കാമെന്ന് പറഞ്ഞ് തടിയൂരി. കൊട്ടാരക്കര മണ്ഡലത്തിലെ ഒരു ജീവനക്കാരന് മുന്തിയ ഇനം സ്കോച്ചാണ് ഓഫര് വന്നത്. എന്നാല് സര്വ്വീസ് സംഘടനയില് സജീവമായ ജീവനക്കാരന് ഓഫര് നിരസിച്ചു.
പലര്ക്കും വീണുപോകുന്ന നല്ല ഓഫറുകള് നല്കുന്നവരുമുണ്ട്. സ്ഥലംമാറ്റത്തിന് സഹായം, പ്രമോഷന് തുടങ്ങി ഓഫറുകള് നീളുകയാണ്.
