പാനൂര്‍: പാനൂര്‍ ലക്ഷംവീടുകള്‍ കേന്ദ്രീകരിച്ച് സിപിഎം ക്രിമിനലുകള്‍ വിഹരിക്കുന്നു. നടപടിയെടുക്കാതെ പാനൂര്‍ പോലീസ്. ഗുണ്ടാനേതാവ് പി.സജീവന്റെ നേതൃത്വത്തിലാണ് ഇവിടെ സിപിഎം അക്രമികള്‍ തമ്പടിക്കുന്നത്. ജനങ്ങളെ ഭീഷണിപ്പെടുത്തി വരുതിയിലാക്കി പാര്‍ട്ടി വളര്‍ത്തുകയായിരുന്നു പി.സജീവനും സംഘവും.ഇവരുടെ നേതൃത്വത്തിലാണ് കഴിഞ്ഞ ദിവസം ബിജെപി പ്രവര്‍ത്തകനായ കൂറ്റേരിയിലെ ജിത്തുവിനെ കൊല്ലാനായി ഒരു സംഘം വാഹനത്തിലെത്തിയത്. മാഹി, പന്തക്കല്‍ ഭാഗങ്ങളിലുളള സിപിഎം ക്രിമിനലുകളാണ് അക്രമിസംഘത്തിലുണ്ടായിരുന്നത്. ജിത്തുവിന്റെ അമ്മ പരാതി നല്‍കിയിട്ടും വേണ്ടത്ര ഗൗരവത്തില്‍ കേസന്വേഷണം മുന്നോട്ടു കൊണ്ടുപോകാന്‍ പോലീസ് തയ്യാറായിട്ടില്ല. വധശ്രമമടക്കം നിരവധി കേസുകളില്‍ പ്രതിയായ പി.സജീവന്‍ മുന്‍ പാനൂര്‍ ലോക്കല്‍ സെക്രട്ടറി കൂടിയായിരുന്നു. ക്രിമിനല്‍ പാശ്ചാത്തലം പ്രശ്‌നമായപ്പോള്‍ സ്ഥാനഭ്രംശം വരികയും ചെയ്തു. തെരഞ്ഞെടുപ്പില്‍ കൂറ്റേരി വാര്‍ഡില്‍ നിന്നും ഇയാള്‍ ബിജെപിക്കെതിരെ മത്സരിക്കുകയും ചെയ്തിരുന്നു. ഇവിടെ യുഡിഎഫുമായി സഹകരിച്ചാണ് ബിജെപിയെ നേരിട്ടത്. ഈ വാര്‍ഡില്‍ ബിജെപി വിജയം സുനിശ്ചിതമാണെന്ന് വ്യക്തമായതോടെയാണ് തിരഞ്ഞെടുപ്പിന് നേതൃത്വം നല്‍കിയ ജിത്തുവിനെ വധിക്കാന്‍ സിപിഎം തീരുമാനിച്ചത്. ഇതിനു മുന്‍പും ജിത്തുവിനെതിരെ അക്രമം നടന്നിരുന്നു. ആസൂത്രിതമായി സിപിഎം നടത്തിയ അക്രമത്തെക്കുറിച്ച് സമഗ്രമായി അന്വേഷണം നടത്താന്‍ പോലീസ് ഇതുവരെ തയ്യാറായിട്ടില്ല. ഇത് വന്‍പ്രതിഷേധത്തിന് കാരണമായിട്ടുണ്ട്. ലക്ഷംവീട് കേന്ദ്രീകൃതമായി പല വിധ്വംസക പ്രവര്‍ത്തനങ്ങളും നടക്കുന്നുണ്ട്. വന്‍ ആയുധശേഖരവും ഇവിടെ സജ്ജമാണ്. മേഖലയില്‍ എന്തു പ്രശ്‌നങ്ങളുണ്ടായാലും ഇവിടെ നിന്നാണ് അക്രമികള്‍ പോകുക. കഴിഞ്ഞ വര്‍ഷം സിപിഎം അനുഭാവിയായിരുന്ന ഫാസിലിനെ വധിക്കാന്‍ ശ്രമിച്ചത് സജീവന്റെ അറിവോടെ ലക്ഷം വീട്ടിലെ സഖാക്കളായിരുന്നു. ഇവിടെ നിന്നും അമ്പതോളം മുസ്ലീം കുടുംബങ്ങള്‍ രാജിവെച്ച് ലീഗിലേക്ക് ചേക്കേറുകയും ചെയ്തിരുന്നു. അക്രമികളുടെ വിഹാരകേന്ദ്രമായ പാനൂര്‍ ലക്ഷംവീട് ഭാഗം പൊതുസമൂഹത്തിന് ഭീഷണമായ വെല്ലുവിളിയാണ് ഉയര്‍ത്തുന്നത്. ഇത്തരം ക്രിമിനല്‍ സംഘങ്ങളെ നിലക്കു നിറുത്തേണ്ടത് അധികൃതരുടെ കടമയുമാണ്.
ലക്ഷംവീടുകള്‍ കേന്ദ്രീകരിച്ച് സിപിഎം ക്രിമിനലുകള്‍ വിഹരിക്കുന്നു
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
ജന്മഭൂമി ഓണ്‍ലൈന്‍© Mathruka Pracharanalayam Limited.
Tech-enabled by Ananthapuri Technologies.