കോഴിക്കോട്: സ്ഥലം കയ്യേറി അയല്വാസി മരങ്ങള് മുറിച്ചുകടത്തിയെന്ന് പരാതി. ചാത്തമംഗലം സ്വദേശിയായ പട്ടികജാതിക്കാരന്റെ സ്ഥലം ബലംപ്രയോഗിച്ച് കയ്യേറി മരങ്ങള് മുറിച്ചുകടത്തിയെന്നാണ് പരാതി. ചാത്തമംഗലം സ്വദേശി കുഞ്ഞന്(63) എന്നയാളുടെ സ്ഥലമാണ് അയല്വാസിയായ വെള്ളലശ്ശേരി എരഞ്ഞിക്കല് വീട്ടില് മൂസക്കൂട്ടിഹാജി കയ്യേറിയതെന്നും ഇയാള്ക്കെതിരെയും കയ്യേറ്റത്തിന് കൂട്ടുനിന്ന കുന്ദമംഗലം എസ്ഐയ്ക്കെതിരെയും പട്ടികജാതി-വര്ഗ പീഡന നിരോധന നിയമപ്രകാരം കേസെടുക്കണമെന്നും പട്ടികജാതി-വര്ഗ ഐക്യവേദി സംസ്ഥാന ചെയര്മാന് ഐത്തിയൂര് സുരേന്ദ്രന് വാര്ത്താസമ്മേളനത്തില് ആവശ്യപ്പെട്ടു.
പിതാവ് തനിയന് വിലയാധാരമായി കുഞ്ഞന് 1981ല് നല്കിയ നാല്പ്പത്തിമൂന്നേ മുക്കാല് സെന്റ് സ്ഥലത്തില് മുപ്പത് സെന്റ് സ്ഥലം കയ്യേറി മൂസക്കുട്ടിഹാജി അഞ്ച് ലക്ഷം രൂപയിലധികം വിലവരുന്ന മരങ്ങള് മുറിച്ചു കടത്തുകയായിരുന്നെന്ന് സുരേന്ദ്രന് ആരോപിച്ചു. 2006 ല് കോഴിക്കോട് ജില്ലാ സഹകരണബാങ്കില് നിന്നും കുഞ്ഞന്റെ സ്ഥലം പണയം വെച്ച് കുഞ്ഞന് ഒന്നരലക്ഷം രൂപ ലോണെടുത്തിരുന്നു. ലോണ് അടച്ചുതീര്ത്ത് പ്രമാണം തിരിച്ചെടുക്കുകയും 2010 വരെ സ്ഥലത്തിനും വീടിനും നികുതി അടയ്ക്കുകയും ചെയ്തിട്ടുണ്ട്. 2010ല് അഞ്ച് ഗുണ്ടകള്ക്കൊപ്പമെത്തിയ മൂസക്കുട്ടിഹാജി അമ്പതിനായിരം രൂപ വിലവരുന്ന തേക്ക് മരം കുഞ്ഞന്റെ പുരയിടത്തില് നിന്ന് മുറിച്ചുമാറ്റുകയായിരുന്നു. അന്ന് കുന്ദമംഗലം പോലീസില് പരാതിനല്കിയെങ്കിലും എസ്ഐ മൂസക്കുട്ടിഹാജിയ്ക്ക് അനുകൂലമായ നിലപാടെടുക്കുകയും പരാതിക്കാരനെ ഭീഷണിപ്പെടുത്തുകയുമായിരുന്നു. ഇക്കഴിഞ്ഞ നവംബര് 24, 25 തീയ്യതികളില് ചെറുമകളുടെ വിവാഹത്തെത്തുടര്ന്ന് കുഞ്ഞനും കുടുംബവും മുക്കം വല്ലാത്തിപ്പാറയിലേക്ക് പോയ അവസരം ഉപയോഗപ്പെടുത്തി കൂടുതല് മരങ്ങള് മൂസക്കുട്ടിയും ബന്ധുക്കളും മുറിച്ചുകടത്തി. 27 ന് രണ്ട് മരങ്ങള് കൂടി ബലംപ്രയോഗിച്ച് കുഞ്ഞന്റെ പറമ്പില് നിന്നും മുറിച്ചു കടത്തുകയും ചെയ്തു. കുന്ദമംഗലം പോലീസില് പരാതി നല്കിയിട്ടും പോലീസ് നടപടിയെടുത്തില്ല.
മൂസക്കുട്ടിഹാജി, ബന്ധുക്കളായ അഷ്റഫ്, സലാം പാറക്കണ്ടി, സല്മാന്, പുതിയേടത്ത് അഷ്റഫ് എന്നിവര്ക്കെതിരെയും ഇവര്ക്ക് കൂട്ടുനിന്ന കുന്ദമംഗലം എസ് ഐമാരായ ഗണേഷ്കുമാര്, ജേക്കബ് എന്നിവരുടെ പേരിലും കേസെടുക്കണമെന്നും കയ്യേറി മുറിച്ചുകടത്തിയ മരങ്ങളുടെ വിലയും ഭൂമിയും കുഞ്ഞന് തിരിച്ചുനല്കണമെന്നും സുരേന്ദ്രന് കൂട്ടിച്ചേര്ത്തു. കുഞ്ഞന്, മകന് വേലായുധന്, ഭാസ്കരന്, എം. ചാത്തുക്കുട്ടി, ഗംഗാദേവി എന്നിവരും വാര്ത്താസമ്മേളനത്തില് പങ്കെടുത്തു.
