കോഴിക്കോട്: ഭാഷാനയത്തിന് രാഷ്ട്രീയമായ ഇച്ഛാശക്തി ആവശ്യമാണെന്നും ഭാഷയുടെ കരുത്താണ് പ്രധാനമെന്നും പ്രൊഫ കെ.വി തോമസ് പറഞ്ഞു. ശ്രേഷ്ഠഭാഷാദിനത്തിന്റെ ഭാഗമായി ജില്ലാ ഇന്ഫര്മേഷന് ഓഫീസും ഭാഷാസമന്വയവേദിയും സംഘടിപ്പിച്ച ‘ഭാഷയുടെ ശക്തിദൗര്ബല്യങ്ങള് സാമൂഹ്യമാധ്യമങ്ങളില്’ എന്ന വിഷയത്തെ അധികരിച്ച് സംസാരിക്കുകയായിരുന്നു അദ്ദേഹം.ഭാഷയെന്നത് ഏകശിലാസ്തംഭമല്ല.പുതിയ സാങ്കേതികവിദ്യകള് കടന്നുവരുമ്പോള് ഭാഷയ്ക്ക് ഉലച്ചില് തട്ടും.ലേഖനവിദ്യ വന്നപ്പോള് വാങ്മയശൈലിയ്ക്കു വന്ന കോട്ടവും വൃത്തവും പ്രാസവും അലങ്കാരമായി ഒതുങ്ങിയതും ഇതിനൊരുദാഹരണമാണ്.പുതിയ മാറ്റങ്ങള് നിലവിലുള്ള ധാരണകളെ അലോസരപ്പെടുത്തുമ്പോഴുണ്ടാകുന്ന പ്രശ്നങ്ങളാണ് ഭാഷാനയത്തിലും പ്രകടമാകുന്നതെന്നും അദ്ദേഹം പറഞ്ഞു.
ഭാരതീയ സാഹിത്യത്തിന്റെ വിശാലമായ ഭൂപടത്തില് മലയാളത്തിന്റെ ഗരിമയും മഹിമയും അടയാളപ്പെടുത്തിയ അഗ്രഗാമിയായിരുന്നു ജി.ശങ്കരക്കുറുപ്പെന്ന് ഡോ.ആര്സു അഭിപ്രായപ്പെട്ടു.’ജി.കവിതകളുടെ ഭാരതീയ സന്ദര്ഭങ്ങള്’ എന്ന വിഷയത്തില് സംസാരിക്കുകയായിരുന്നു അദ്ദേഹം.ശ്രേഷ്ഠഭാഷ എന്ന ആശയം വരു്ന്നതിനു മുമ്പ് തന്നെ മലയാളത്തിന്റെ ശബ്ദം പാശ്ചാത്യരാജ്യങ്ങളില് വേറിട്ടു കേള്പ്പിക്കാന് ജ്ഞാനപീഠപുരസ്കാരലബ്ധിയിലൂടെ അദ്ദേഹത്തിനു സാധിച്ചു.ഹിന്ദി സംസ്കൃതം,ഇംഗ്ലീഷ്,ബംഗാളി ഭാഷകളില് അദ്ദേഹത്തിനുണ്ടായിരുന്ന പാണ്ഢിത്യം അദ്ദേഹത്തിന്റെ ഭാവനയെ സമ്പുഷ്ടമാക്കി.വ്യത്യസ്ത ഭാഷകളിലെഴുതുന്ന കവിതകള് അതിന്റെ ഭാഷയില് മാത്രമേ വേറിട്ടുനില്ക്കുന്നുള്ളൂ എന്നും കാവ്യസംസ്കാരത്തില് ഏകമാനമാണെന്നും അദ്ദേഹം പറഞ്ഞു.
തുടര്ന്ന നടന്ന ജി.കവിതകളുടെ ആലാപനത്തില് ഡോ.എം.കെ പ്രീത,പ്രഭാകരന്നായര് ഏരിമല,അജിതകുമാരി,സി.ടി ശോഭ,പി.കെ ഷീന,അനശ്വര്,വരദേശ്വരി,ശ്രീജ ചേളന്നൂര് എന്നിവര് കവിതകള് ആലപിച്ചു.
ഭാഷാസമന്വയവേദി സെക്രട്ടറി ഡോ.പി.കെ ചന്ദ്രന് അധ്യക്ഷത വഹിച്ച ചടങ്ങില് ജില്ലാ ഇന്ഫര്മേഷന് ഓഫീസര് ഖാദര് പാലാഴി,വേലായുധന് പള്ളിക്കല്,നിസാര് ഒളവണ്ണ എന്നിവര് സംസാരിച്ചു.
